സഊദി അറേബ്യയ്ക്ക് 48 എഫ്-35 യുദ്ധവിമാനങ്ങൾ വിൽക്കാൻ അമേരിക്കൻ അനുമതി; തീരുമാനം ഇസ്റാഈൽ എതിർപ്പ് അവഗണിച്ച് 

• മിഡിൽ ഈസ്റ്റിൽ ഈ യുദ്ധ വിമാനങ്ങൾ ഉപയോഗിക്കുന്ന ഏക രാജ്യമായ ഇസ്റാഈലിന് പിറകെ രണ്ടാം രാജ്യമായി സഊദി അറേബ്യ

വാശിങ്ടൺ: സഊദി അറേബ്യയ്ക്ക് 48 എഫ്-35 (F-35) സ്റ്റെൽത്ത് യുദ്ധവിമാനങ്ങൾ വിൽക്കുന്നതിന് അമേരിക്ക അനുമതി നൽകിയതായി സ്റ്റേറ്റ് ഡിപ്പാർട്ട്മെന്റ് വ്യാഴാഴ്ച അറിയിച്ചു. ഇറാനുമായുള്ള സംഘർഷം ആരംഭിച്ചതിന് ശേഷമുള്ള സഊദിയുടെ ഏറ്റവും വലിയ ആയുധ ഇടപാടാണിത്. 24.3 ബില്യൺ ഡോളർ മൂല്യമുള്ള ഇടപാടുകളാണ് നടക്കുക. ഏറ്റവും അത്യാധുനിക സംവിധാനങ്ങൾ ഉൾകൊള്ളുന്ന ഈ യുദ്ധ വിമാനം പ്രതിരോധ രംഗത്ത് ഏറെ ശ്രദ്ധേയമാണ്.

എഫ്-35 വിമാനങ്ങൾ വാങ്ങാൻ സഊദി അറേബ്യ ഏറെക്കാലമായി ശ്രമിച്ചുവരികയായിരുന്നു. എന്നാൽ, മിഡിൽ ഈസ്റ്റിൽ നിലവിൽ ഈ വിമാനങ്ങൾ ഉപയോഗിക്കുന്ന ഏക രാജ്യമായ ഇസ്റാഈൽ, സഊദിക്ക് ഇവ വിൽക്കുന്നതിനെതിരെ ആശങ്ക പ്രകടിപ്പിച്ചിരുന്നു. സഊദിയുമായുള്ള ബന്ധം സാധാരണ നിലയിലാക്കാനുള്ള നീക്കങ്ങൾ നടക്കുമ്പോഴും ഈ എതിർപ്പ് നിലനിന്നിരുന്നു.

നിർദ്ദിഷ്ട വിൽപ്പന, സഊദി അറേബ്യയുടെ ആഭ്യന്തര പ്രതിരോധം ശക്തിപ്പെടുത്തുന്നതിലൂടെയും യുഎസ് സേനയുമായുള്ള പ്രവർത്തനപരമായ ഏകോപനം മെച്ചപ്പെടുത്തുന്നതിലൂടെയും നിലവിലുള്ളതും ഭാവിയിലുള്ളതുമായ ഭീഷണികളെ നേരിടാനുള്ള അവരുടെ ശേഷി വർദ്ധിപ്പിക്കുമെന്ന് സ്റ്റേറ്റ് ഡിപ്പാർട്ട്മെന്റ് പ്രസ്താവനയിൽ പറഞ്ഞു.

ഇത് സഊദി അറേബ്യയുടെ പ്രതിരോധ പ്രവർത്തനസജ്ജമായ വിമാനങ്ങളുടെ എണ്ണം വർദ്ധിപ്പിക്കുകയും, വായുവിൽ നിന്ന് വായുവിലേക്കും വായുവിൽ നിന്ന് കരയിലേക്കുമുള്ള സ്വയം പ്രതിരോധ ശേഷി മെച്ചപ്പെടുത്തുകയും ചെയ്യും എന്നും പ്രസ്താവനയിൽ വ്യക്തമാക്കി. വാഷിംഗ്ടണിലെ സഊ ദി എംബസി ഈ ഇടപാടിനെ പ്രശംസിക്കുകയും, ഇത് അമേരിക്കയുമായുള്ള ബന്ധത്തിന്റെ ശക്തിയെയും ദൃഢതയെയും പ്രതിഫലിപ്പിക്കുന്നുവെന്ന് പറയുകയും ചെയ്തു.

എന്നാൽ, യുഎസ് നിയമനിർമ്മാതാക്കളുടെ അനുമതി ആവശ്യമുള്ള ഈ വിൽപ്പനയെക്കുറിച്ച് സ്റ്റേറ്റ് ഡിപ്പാർട്ട്മെന്റ് കോൺഗ്രസിനെ അറിയിച്ചിട്ടുണ്ട്. എന്നാൽ, വിമാനങ്ങൾ കൈമാറുന്നതിനുള്ള സമയപരിധി അവർ വ്യക്തമാക്കിയിട്ടില്ല. മേഖലയിലെ എതിരാളികളേക്കാൾ സൈനികമായി മുൻതൂക്കം ഇസ്റാഈലിനുണ്ടായിരിക്കണം എന്ന യുഎസിന്റെ ദീർഘകാല നയത്തിന് അനുസൃതമായി, F-35 വിമാനങ്ങളുടെ വിൽപ്പന “മേഖലയിലെ സൈനിക സന്തുലിതാവസ്ഥയിൽ മാറ്റം വരുത്തില്ല” എന്ന് സ്റ്റേറ്റ് ഡിപ്പാർട്ട്മെന്റ് അറിയിച്ചു. യൂറോപ്പിലെ നാറ്റോ (NATO) സഖ്യരാജ്യങ്ങളും ഇസ്റാഈലും ഉൾപ്പെടെയുള്ള തങ്ങളുടെ ഏറ്റവും അടുത്ത സഖ്യരാജ്യങ്ങൾക്ക് മാത്രമേ ഇതുവരെ F-35 വിമാനങ്ങൾ വിൽക്കാൻ യുഎസ് അനുമതി നൽകിയിട്ടുള്ളൂ.