സിക്ക് ലീവ് ഇനി പെട്ടെന്ന് കിട്ടില്ല; കടുത്ത നിയന്ത്രണവുമായി സഊദി ആരോഗ്യ മന്ത്രാലയം, നിരീക്ഷണ കാംപയിൻ ആരംഭിച്ചു

malayalampress
2 Min Read

റിയാദ്: സഊദിയിൽ സിക്ക് ലേക് അനുവദിക്കുന്നതിൽ കടുത്ത നിയന്ത്രണങ്ങളുമായി സഊദി ആരോഗ്യ മന്ത്രാലയം. വ്യാപകമായി ദുരുപയോഗം ചെയ്യപ്പെടുന്നതായി കണ്ടെത്തിയതിനെ തുടർന്നാണ് മന്ത്രാലയ നീക്കം. ഇതിനായി മന്ത്രാലയം പ്രത്യേക നിരീക്ഷണ കാമ്പയിൻ തന്നെ ആരംഭിച്ചിട്ടുണ്ട്. രോഗ ചികിത്സകരും ആരോഗ്യ സംരക്ഷണ സൗകര്യങ്ങളും സിക്ക് ലീവ് നൽകുന്നതിനുള്ള അംഗീകൃത ചട്ടങ്ങൾ പാലിക്കുന്നത് വർദ്ധിപ്പിക്കുന്നതിനും അവരുടെ വിശ്വാസ്യതയും സുതാര്യതയും വർദ്ധിപ്പിക്കുന്നതിനുമായി പരിശോധന കാമ്പയിൻ ആരംഭിച്ചതായി ആരോഗ്യ മന്ത്രാലയം ഇന്ന് (ചൊവ്വാഴ്ച) പ്രഖ്യാപിച്ചു.

സിക്ക് ലീവ് നൽകുന്നതിന് ആവശ്യമായ മെഡിക്കൽ കാരണങ്ങളുടെ നിലനിൽപ്പ് പരിശോധിക്കുക, ഭരണ സംവിധാനങ്ങളും ബൈലോകളും പാലിക്കുന്നുണ്ടെന്ന് ഉറപ്പാക്കുക, ആരോഗ്യ പരിപാലന സൗകര്യങ്ങൾ അംഗീകൃത ഇലക്ട്രോണിക് സംവിധാനങ്ങൾ ഉപയോഗിക്കുന്നുണ്ടെന്ന് ഉറപ്പാക്കുക എന്നിവയെ അടിസ്ഥാനമാക്കിയാണ് കാമ്പയിൻ എന്ന് മന്ത്രാലയം വിശദീകരിച്ചു. അസുഖ അവധി നൽകുന്നതിനുള്ള ചട്ടങ്ങൾ ലംഘിക്കുന്ന രീതികൾ നിരീക്ഷിക്കുക, നിയമലംഘകർക്കെതിരെ നിയമനടപടി സ്വീകരിക്കുക എന്നിവയും കാമ്പയിനിൽ ഉൾപ്പെടുന്നു. ഏകീകൃത കോൾ സെന്റർ 937 വഴി അസുഖ അവധി നൽകുന്നതിലെ ലംഘനങ്ങൾ റിപ്പോർട്ട് ചെയ്യാൻ മന്ത്രാലയം ആവശ്യപ്പെട്ടു.

രോഗിയുടെ അവസ്ഥയെക്കുറിച്ചുള്ള വൈദ്യപരിശോധനയുടെ അടിസ്ഥാനത്തിൽ, നിലവിലുള്ള ചട്ടങ്ങളും നടപടിക്രമങ്ങളും പാലിച്ചുകൊണ്ട് മാത്രമേ സിക്ക് ലീവ് അനുവദിക്കുകയുള്ളൂവെന്ന് ആരോഗ്യ മന്ത്രാലയം കഴിഞ്ഞയാഴ്ച വ്യക്തമാക്കിയിരുന്നു. രോഗിയുടെ അഭ്യർത്ഥനയോ ഇഷ്ടമോ മാത്രം പരിഗണിച്ചല്ല ഇത് നൽകുന്നത്. രോഗിയുടെ യഥാർത്ഥ ആരോഗ്യസ്ഥിതിയും, ആ അവസ്ഥ അവരുടെ ജോലി ചെയ്യാനോ ദൈനംദിന കാര്യങ്ങൾ നിർവഹിക്കാനോ ഉള്ള കഴിവിനെ എത്രത്തോളം ബാധിക്കുന്നു എന്നതും കണക്കിലെടുത്ത് ഒരു ഡോക്ടറാണ് അവധിയുടെ ദൈർഘ്യം തീരുമാനിക്കുന്നത്.

രോഗാവസ്ഥയും രോഗനിർണയവും അടിസ്ഥാനമാക്കിയാണ് അവധിയുടെ കാലാവധി നിശ്ചയിക്കുന്നത്. ഡോക്ടർമാർക്കും ആരോഗ്യ സ്ഥാപനങ്ങൾക്കും നൽകിയിട്ടുള്ള അധികാരപരിധിക്ക് ഉള്ളിൽ നിന്നുകൊണ്ട് വേണം ഇത് ചെയ്യാൻ. ചികിത്സിക്കുന്ന ഡോക്ടറുടെ അധികാരപരിധിക്ക് അപ്പുറമുള്ള അവധി ആവശ്യങ്ങൾക്ക്, അംഗീകൃത മാർഗ്ഗനിർദ്ദേശങ്ങളും സമയപരിധികളും അനുസരിച്ച് മറ്റ് ഡോക്ടർമാരുടെയോ, പ്രത്യേക മെഡിക്കൽ കമ്മിറ്റികളുടെയോ, ബന്ധപ്പെട്ട മെഡിക്കൽ ബോഡികളുടെയോ അനുമതി ആവശ്യമാണ്.

ശരിയായ വൈദ്യപരിശോധനയ്ക്ക് ശേഷം, അംഗീകൃത ആരോഗ്യ സ്ഥാപനങ്ങളിൽ നിന്ന് മാത്രമേ സിക്ക് ലീവ് നേടാവൂ എന്ന് മന്ത്രാലയം ഊന്നിപ്പറഞ്ഞു. ഇലക്ട്രോണിക് ആയി നൽകുന്ന അവധികൾ ‘സെഹത്തി’ (Sehhaty) ആപ്പിൽ കാണാവുന്നതാണ്. ‘സെഹ’ (Seha) പ്ലാറ്റ്‌ഫോമിലെ അന്വേഷണ സേവനം (inquiry service) വഴി സിക്ക് ലീവിന്റെ ആധികാരികത പരിശോധിക്കാനും സാധിക്കും. വ്യാജ വെബ്‌സൈറ്റുകളിലേക്ക് നയിച്ചേക്കാവുന്ന ക്യുആർ (QR) കോഡുകളെയോ രേഖകളുടെ പകർപ്പുകളെയോ മാത്രം ആശ്രയിക്കുന്നതിന് പകരം, ഔദ്യോഗിക പ്ലാറ്റ്‌ഫോമിൽ വിവരങ്ങൾ കൃത്യമാണെന്ന് ഉപയോക്താക്കൾ ഉറപ്പുവരുത്തണം.

സാധുവായ വൈദ്യശാസ്ത്രപരമായ ന്യായീകരണമില്ലാതെ സിക്ക് ലീവ് നൽകുക, അതിനായി മെഡിക്കൽ രേഖകളിൽ കൃത്രിമം കാണിക്കുക, അംഗീകൃതമല്ലാത്ത വ്യക്തികളിലൂടെയോ സ്ഥാപനങ്ങളിലൂടെയോ അവധി നൽകുക, അർഹതയില്ലാത്ത ആനുകൂല്യങ്ങൾ നേടാൻ രോഗികളെ സഹായിക്കുക, സിക്ക് ലീവ് രേഖകളിലോ അവയിലെ വിവരങ്ങളിലോ കൃത്രിമം നടത്തുക തുടങ്ങിയവയെല്ലാം നിരോധിച്ചിരിക്കുന്നു. ഇത്തരം പ്രവർത്തികളിൽ ഏർപ്പെടുന്നവർ നിയമനടപടികൾക്ക് വിധേയരാകുമെന്ന് മന്ത്രാലയം മുന്നറിയിപ്പ് നൽകി.

സിക്ക് ലീവ് അഭ്യർത്ഥിക്കുമ്പോഴേക്ക് അനുവദിക്കില്ല: മുന്നറിയിപ്പുമായി സഊദി ആരോഗ്യമന്ത്രാലയം; കടുത്ത ശിക്ഷ, 1 വർഷം തടവും 10 ലക്ഷം റിയാൽ പിഴയും – Malayalampress

എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ

Join Our WhatsApp Group
Share This Article