‘വഴങ്ങാതിരുന്നപ്പോൾ ഭക്ഷണം നൽകാതെ മർദിച്ചു’; പെൺവാണിഭസംഘത്തിൽ നിന്ന് രക്ഷപ്പെട്ടവരിൽ 3 മലയാളികൾ

റാസൽഖൈമ: ജോലി വാഗ്ദാനം ചെയ്ത് യുഎഇയിലെത്തിച്ച 3 മലയാളികളടക്കം 4 യുവതികളെ പെൺവാണിഭ സംഘത്തിന്റെ പിടിയിൽനിന്ന് രക്ഷിച്ചു. ആലപ്പുഴ, തൃശൂർ സ്വദേശികളായ 3 മലയാളികളെയും തഞ്ചാവൂർ സ്വദേശിനിയെയുമാണ് രക്ഷപ്പെടുത്തി നാട്ടിലേക്ക് അയച്ചത്.

നഴ്സും ഫിസിയോതെറപ്പിസ്റ്റും ഉൾപ്പെടെയുള്ളവരെ 2,500 ദിർഹം ശമ്പളമുള്ള ജോലി വാഗ്ദാനം ചെയ്താണ് സന്ദർശക വീസയിൽ യുഎഇയിലെത്തിച്ചത്. ബഹ്റൈനിൽ 15 വർഷത്തെ തൊഴിൽപരിചയമുള്ള യുവതിയും വഞ്ചിക്കപ്പെട്ടവരിൽ ഉൾപ്പെടും.