- സംഘത്തിൽ അഡീഷണൽ സോളിസിറ്റർ ജനറലും
കൊളംബോ: ഇസ്‌ലാമിനെ സമൂഹമാധ്യമങ്ങളിൽ അവഹേളിച്ചതിനെ തുടർന്ന് സഊദിയിൽ വധശിക്ഷക്ക് വിധിക്കപ്പെട്ട പ്രവാസി യുവാവ് അനോജൻ കേസിൽ നാലംഗ നിയമസംഘം സഊദി അറേബ്യയിലേക്ക് തിരിക്കുന്നു. ശ്രീലങ്കൻ പൗരനായ അനോജൻ ശിവരാസയ്ക്ക് വിധിച്ച വധശിക്ഷ റദ്ദാക്കുന്നതിനോ കുറയ്ക്കുന്നതിനോ ഉള്ള നിയമനടപടികൾക്കായാണ് അഡീഷണൽ സോളിസിറ്റർ ജനറൽ അസാർഡ് നവാവി (PC) ഉൾപ്പെടെയുള്ള നാലംഗ ശ്രീലങ്കൻ നിയമസംഘം ചൊവ്വാഴ്ച സഊദി അറേബ്യയിലേക്ക് തിരിക്കുന്നത്. വധശിക്ഷ നേരത്തെ റിപ്പോർട്ട് ചെയ്തിരുന്നു.
പ്രസിഡന്റ്‌സ് കൗൺസൽമാരായ ഫൈസർ മുസ്തഫ, ഉപുൽ കുമാരപെരുമ, അഭിഭാഷകൻ ഹഫീൽ ഫാരിസ് എന്നിവരും ഈ സംഘത്തിലുണ്ട്. കേസ് കൈകാര്യം ചെയ്യുന്ന രണ്ട് സഊദി നിയമസ്ഥാപനങ്ങളിലെ പ്രതിനിധികളെ ബുധനാഴ്ച കണ്ട്, സഊദി സുപ്രീം കോടതിയിൽ സമർപ്പിക്കേണ്ട അപ്പീലിനെക്കുറിച്ച് ചർച്ച ചെയ്യാനും സംഘം പദ്ധതിയിടുന്നുണ്ട്.
അപ്പീലിനായുള്ള രേഖകൾ അന്തിമമാക്കുന്നതിനും കേസ് കൈകാര്യം ചെയ്യുന്നതിനുള്ള സാധ്യതകൾ ആരായാൻ സഊദി ഉദ്യോഗസ്ഥരുമായി കൂടിക്കാഴ്ച നടത്തുന്നതിനുമാണ് സംഘം പോകുന്നതെന്ന് അഡീഷണൽ സോളിസിറ്റർ ജനറൽ നവാവി പറഞ്ഞു.
ബുധൻ, വ്യാഴം ദിവസങ്ങളിൽ കൂടിക്കാഴ്ചകളും ഏകോപന പ്രവർത്തനങ്ങളും നിശ്ചയിച്ചിട്ടുണ്ട്. വിദേശകാര്യ മന്ത്രാലയം, ബന്ധപ്പെട്ട വകുപ്പുകൾ, സഊദിയിലെ ശ്രീലങ്കൻ എംബസി ഉദ്യോഗസ്ഥർ എന്നിവരുമായി സഹകരിച്ചാണ് തുടർനടപടികൾ ആസൂത്രണം ചെയ്യുന്നത്.
കേസിൽ സഹായം തേടുന്നതിനായി വിദേശകാര്യ മന്ത്രാലയം രണ്ട് സഊദി നിയമസ്ഥാപനങ്ങളുടെ സേവനം ഉറപ്പാക്കിയിട്ടുണ്ട്. നിശ്ചിത സമയത്തിനുള്ളിൽ അറ്റോർണി ജനറലിന്റെ വകുപ്പ് വഴി വധശിക്ഷയിൽ ഇളവ് തേടിയുള്ള അപ്പീൽ സമർപ്പിക്കുമെന്ന് പ്രതീക്ഷിക്കുന്നു.
കൽമുനൈയിലെ നത്പിട്ടിമുനൈ സ്വദേശിയായ ശ്രീലങ്കൻ കുടിയേറ്റ തൊഴിലാളിയായ ശിവരാസയ്ക്ക്, സോഷ്യൽ മീഡിയയിലെ ഒരു പരാമർശത്തിന്റെ പേരിൽ അൽ-അഹ്സ ക്രിമിനൽ കോടതി ആദ്യം അഞ്ച് വർഷം തടവും 30 ലക്ഷം സൗദി റിയാൽ പിഴയുമാണ് വിധിച്ചിരുന്നത്. ശിക്ഷ കുറയ്ക്കുന്നതിനായി ശിവരാസയുടെ അഭിഭാഷക സംഘം അപ്പീൽ നൽകിയപ്പോൾ, കൂടുതൽ കഠിനമായ ശിക്ഷ ആവശ്യപ്പെട്ട് സഊദി പ്രോസിക്യൂട്ടർമാരും പ്രത്യേകം അപ്പീൽ നൽകി. തുടർന്ന് അപ്പീൽ കോടതി ശിക്ഷ വധശിക്ഷയായി ഉയർത്തുകയായിരുന്നു.
ശിവരാസയ്ക്ക് ആശ്വാസം ലഭിക്കുന്നതിനായി ശ്രീലങ്കൻ സർക്കാർ നിയമപരവും നയതന്ത്രപരവുമായ മാർഗ്ഗങ്ങൾ തേടുന്നുണ്ട്. പ്രസിഡന്റ് അനുര കുമാര ദിസനായകെ സഊദി രാജാവിന് ദയാഹർജി അയക്കുമെന്ന് പ്രതീക്ഷിക്കുന്നു. പ്രസിഡന്റിന്റെ ഹർജിയുമായി ഒരു പാർലമെന്ററി സംഘവും സഊദി അറേബ്യയിലേക്ക് പോകാൻ തീരുമാനിച്ചിട്ടുണ്ട്.
റിയാദിലെ ശ്രീലങ്കൻ എംബസി കേസ് നിരീക്ഷിക്കുകയും നയതന്ത്ര മാർഗ്ഗങ്ങളിലൂടെ സഊദി അധികൃതരുമായി ഏകോപനം നടത്തുകയും ചെയ്യുന്നുണ്ട്. അതേസമയം, അനോജൻ ശിവരാസയുടെ മോചനം ഉറപ്പാക്കാൻ ആവശ്യമായ സർക്കാർ ഇടപെടൽ അഭ്യർത്ഥിച്ചുകൊണ്ട് രാമന്യ മഹാ നിക്കായയിലെയും അമരപുര മഹാ നിക്കായയിലെയും പ്രധാന പുരോഹിതന്മാർ അടുത്തിടെ പ്രസിഡന്റിന് നിവേദനം സമർപ്പിച്ചിരുന്നു. വധശിക്ഷയുമായി ബന്ധപ്പെട്ട നേരത്തെ പ്രസിദ്ധീകരിച്ച വാർത്ത വായിക്കാൻ👇.
ഇസ്‌ലാമിനെയും പ്രവാചകനെയും അവഹേളിച്ച് സോഷ്യൽ മീഡിയയിൽ ദുരുപയോഗം; സഊദിയിൽ പ്രവാസിക്ക് വധശിക്ഷ
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
