കോഴിക്കോട്: നിയമസഭാ തെരഞ്ഞെടുപ്പിൽ സ്വതന്ത്രയായി മത്സരിക്കുമെന്ന ജെആർപി (ജനാധിപത്യ രാഷ്ട്രീയ പാർട്ടി) ജില്ലാ നേതൃത്വത്തിൻ്റെ പ്രസ്താവനകളെ തള്ളി സി.കെ. ജാനു.
നിലവിൽ സ്വതന്ത്രയായി മത്സരിക്കാൻ തീരുമാനിച്ചിട്ടില്ലെന്നും അങ്ങനൊരു തീരുമാനം സംസ്ഥാന നേതൃത്വം എടുത്തിട്ടില്ലെന്നും സി.കെ. ജാനു വ്യക്തമാക്കി. നിലവിൽ യുഡിഎഫിൽ തന്നെ ഉറച്ചു നിൽക്കും. സീറ്റുമായി ബന്ധപ്പെട്ട ചർച്ചകൾ നടന്നുകൊണ്ടിരിക്കുകയാണ് എന്നും സി.കെ. ജാനു അറിയിച്ചു.
നിയമസഭാ തെരഞ്ഞെടുപ്പിൽ ജെആർപി മാനന്തവാടി, ബാലുശേരി സീറ്റുകളാണ് ആവശ്യപ്പെട്ടത്. ജനാധിപത്യ രാഷ്ട്രീയ പാർട്ടി ആവശ്യപ്പെട്ട രണ്ട് സീറ്റുകൾ ലഭിച്ചില്ലെങ്കിൽ സ്വതന്ത്രരായി മത്സരിക്കുമെന്നായിരുന്നു ജെആർപി ജില്ലാ നേതൃത്വം അറിയിച്ചത്. മാന്തവാടിയിൽ നിന്ന് സി.കെ. ജാനു ജനവിധി തേടുമെന്നും നേതൃത്വം അറിയിച്ചിരുന്നു. സി.കെ. ജാനുവിൻ്റെ അറിവോട് കൂടിയാണ് തീരുമാനം എടുത്തതെന്നും ജില്ലാ നേതൃത്വം അറിയിച്ചിരുന്നു. എന്നാൽ ഈ വാദത്തെ നിഷേധിച്ച് കൊണ്ടായിരുന്നു സി.കെ. ജാനുവിൻ്റെ പ്രതികരണം.
….
