കാസർഗോഡ് സ്വദേശിയായ എ.എസ്. മുഹമ്മദ് അഷ്റഫിന് നൽകിയ വിവരാവകാശ മറുപടിയിലാണ് കണക്കുകൾ
യാത്രകളുടെ ചെലവുകൾ സംബന്ധിച്ച മറുപടി ലഭിച്ചിട്ടില്ല
യുഎഇ സന്ദർശിച്ചത് പത്ത് തവണ
തൊടുപുഴ: കഴിഞ്ഞ പത്ത് വർഷത്തിനിടെ മുഖ്യമന്ത്രി പിണറായി വിജയൻ നടത്തിയത് 30 വിദേശ യാത്രകൾ. ചികിത്സയ്ക്കും സ്വകാര്യ സന്ദർശനങ്ങൾക്കുമായി ഈ കാലയളവിൽ 194 ദിവസമാണ് വിദേശത്ത് ചെലവഴിച്ചത്. പതിനേഴു രാജ്യങ്ങളിലേക്കാണ് സന്ദർശനത്തിനായി പോയത്. പൊതുഭരണ വകുപ്പ് 28-ന് കാസർഗോഡ് സ്വദേശിയായ എ.എസ്. മുഹമ്മദ് അഷ്റഫിന് നൽകിയ വിവരാവകാശ മറുപടിയിലാണ് കണക്കുകൾ. എന്നാൽ, യാത്രകളുടെ ചെലവുകൾ സംബന്ധിച്ച മറുപടി ലഭിച്ചിട്ടില്ല.
യുഎഇ, ബഹ്റൈൻ, യുഎസ്എ, നെതർലാൻഡ്സ്, സ്വിറ്റ്സർലൻഡ്, ഫ്രാൻസ്, യുകെ, ജപ്പാൻ, ദക്ഷിണ കൊറിയ, നോർവേ, ക്യൂബ, ഇന്തോനേഷ്യ, സിംഗപ്പൂർ, സഊദി അറേബ്യ, ഒമാൻ, ഖത്തർ, കുവൈറ്റ് എന്നിവയാണ് മുഖ്യമെതിരെ കാലയളവിൽ പിണറായി വിജയൻ സന്ദർശിച്ച രാജ്യങ്ങൾ.
മുഖ്യമന്ത്രി ആറ് ജിസിസി രാജ്യങ്ങൾ സന്ദർശിച്ചിട്ടുണ്ട്. ഇതിൽ ഏറ്റവും കൂടുതൽ സന്ദർശിച്ചത് യുഎഇയാണ്. പത്ത് വർഷത്തിനിടെ പത്ത് തവണയാണ് ഇവിടെ സന്ദർശനം നടത്തിയത്. ഔദ്യോഗികം, സ്വകാര്യം, മെഡിക്കൽ എന്നിങ്ങനെ വിദേശ യാത്രകളെ മൂന്ന് വിഭാഗങ്ങളായി തിരിക്കാം: 30 യാത്രകളിൽ നാലെണ്ണം സ്വകാര്യ സന്ദർശനങ്ങളായിരുന്നു.
ഈ യാത്രകൾ സിംഗപ്പൂർ, ഇന്തോനേഷ്യ, യുഎഇ, യുഎസ്എ എന്നിവിടങ്ങളിലേക്കായിരുന്നു. മൂന്ന് തവണ അദ്ദേഹം വൈദ്യചികിത്സയ്ക്കായി അമേരിക്ക സന്ദർശിച്ചു. ആകെ ഏഴ് തവണയാണ് യുഎസ്എയിലേക്ക് യാത്ര പോയത്. രണ്ട് തവണ യുകെയിലേക്കും അദ്ദേഹം യാത്ര ചെയ്തു. ഭാര്യ കമല അദ്ദേഹത്തോടൊപ്പം സ്വകാര്യവും ഔദ്യോഗികവുമായ യാത്രകളിൽ പങ്കെടുത്തിട്ടുണ്ട്. മന്ത്രിമാർ, ചീഫ് സെക്രട്ടറി, ഗവർണർ സെക്രട്ടറിമാർ, പേഴ്സണൽ സ്റ്റാഫ് അംഗങ്ങൾ എന്നിവർ ഔദ്യോഗിക യാത്രകളിൽ അദ്ദേഹത്തെ അനുഗമിച്ചിട്ടുണ്ട്.
ആദ്യ യാത്ര 2016 ഡിസംബർ 21 മുതൽ 25 വരെയായിരുന്നു, അവസാനത്തേത് 2025 നവംബർ 30 മുതൽ ഡിസംബർ 2 വരെയായിരുന്നു. ഇവ രണ്ടും യുഎഇയിലേക്കുള്ള ഔദ്യോഗിക യാത്രകളായിരുന്നു. ബന്ധപ്പെട്ട രേഖകളിൽ ചില അവ്യക്തതകളുണ്ട്. 2018-ൽ യുണൈറ്റഡ് സ്റ്റേറ്റ്സിലേക്കുള്ള രണ്ട് സന്ദർശനങ്ങളിലും പങ്കെടുത്ത വ്യക്തികളെക്കുറിച്ചുള്ള വിവരങ്ങൾ രേഖകളിൽ ലഭ്യമല്ല. ഇത് യാത്രകളുടെ സുതാര്യതയെക്കുറിച്ച് ചോദ്യങ്ങൾ ഉയർത്തുന്നു.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
