ബെംഗളൂരു: സ്വർണക്കടത്ത് കേസിൽ പിടിയിലായ കന്നഡ നടി രന്യ റാവുവിന് ക്ഷേത്രത്തിൽ വിഐപി ദർശനം ഒരുക്കിയത് വിവാദമാകുന്നു. ഒക്ടോബർ 31-നാണ് കർണാടകയിലെ ഹാസൻ ജില്ലയിലുള്ള ഹാസനാംബ ക്ഷേത്രത്തിൽ രന്യയും കുടുംബവും ദർശനം നടത്തിയത്.
വിരമിച്ച ഡിജിപിയായ രണ്ടാനച്ഛൻ കെ. രാമചന്ദ്ര റാവുവും ഒപ്പമുണ്ടായിരുന്നു. മുൻ ഡിജിപി എന്ന നിലയിൽ രാമചന്ദ്രറാവുവിന് അനുവദിച്ചിട്ടുള്ള ഔദ്യോഗിക പ്രോട്ടോക്കോൾ വാഹനത്തിലാണ് രന്യ ക്ഷേത്രത്തിലെത്തിയതെന്നാണ് റിപ്പോർട്ടുകൾ.
രന്യയ്ക്കും കുടുംബത്തിനും പ്രത്യേക വിഐപി പരിഗണന നൽകിയത് വിവാദമായി. സ്വർണക്കടത്ത് കേസിലെ പ്രതിക്ക് പൊലീസ് സംരക്ഷണത്തിൽ വിഐപി ദർശനം ഒരുക്കിയതിനെ പലരും വിമർശിച്ചു. സംഭവത്തിൽ കർണാടക സർക്കാരിനെ വിമർശിച്ച് ബിജെപിയും രംഗത്തെത്തി. ‘‘ഒരുപക്ഷേ സംസ്ഥാന സർക്കാരിന്റെ കണ്ണിൽ രന്യ റാവു ഒരു വിഐപിയായിരിക്കാം. കോൺഗ്രസ് സർക്കാർ അവരെ അങ്ങനെയായിരിക്കും കാണുന്നത്’’– ബിജെപി എംഎൽസി സി.ടി. രവി സർക്കാരിനെ പരിഹസിച്ചു.
ശരീരത്തിലും വസ്ത്രങ്ങൾക്കുള്ളിലുമായി ഒളിപ്പിച്ച നിലയിൽ 14.2 കിലോഗ്രാം സ്വർണം കടത്താൻ ശ്രമിക്കുന്നതിനിടെയാണ് നടി രന്യ റാവു അറസ്റ്റിലായത്. തുടർന്നു നടത്തിയ അന്വേഷണത്തിൽ സ്വർണക്കടത്ത് സംഘത്തിലെ പ്രധാന കണ്ണിയാണ് രന്യയെന്ന് കണ്ടെത്തിയിരുന്നു. ദുബായിൽനിന്ന് ബെംഗളൂരുവിലേക്ക് സ്വർണം കടത്തുന്നതിനായി ഇവർ വലിയ തോതിൽ കമ്മിഷൻ വാങ്ങിയിരുന്നു. ഒരു കിലോഗ്രാം സ്വർണം എത്തിക്കുന്നതിന് ഏകദേശം 4 മുതൽ 5 ലക്ഷം രൂപ വരെയായിരുന്നു കമ്മിഷൻ.
102 കോടി രൂപയുടെ സ്വർണക്കടത്ത് കേസിൽ എൻഫോഴ്‌സ്‌മെന്റ് ഡയറക്ടറേറ്റ് സമർപ്പിച്ച കുറ്റപത്രത്തിൽ രന്യയുടെ പേരുമുണ്ട്. ഒരു വർഷത്തിനിടെ 127 കിലോഗ്രാമിലധികം സ്വർണം ഇന്ത്യയിലേക്ക് കടത്തിയെന്നാണ് കുറ്റപത്രത്തിലുള്ളത്. കേസുമായി ബന്ധപ്പെട്ട് ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡിആർഐ) രന്യയ്ക്ക് 102 കോടി രൂപ പിഴയും ചുമത്തിയിരുന്നു.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
