ഫ്ലൈ ദുബൈ വിമാനത്തിലെ കത്തിക്കുത്തും എമജൻസി ലാന്റിംഗും; അന്വേഷണത്തിന്റെ പ്രാഥമിക കണ്ടെത്തലുകൾ സഊദി ആഭ്യന്തര മന്ത്രാലയം വെളിപ്പെടുത്തി

• രണ്ട് പൈലറ്റ്മാരെയും സുരക്ഷ ഉദ്യോഗസ്ഥരുടെ അകമ്പടിയോടെ യു എ ഇ ക്ക് കൈമാറി

റിയാദ്: ദുബൈയിൽ നിന്ന് ഇസ്റാഈലിലെ ടെൽ അവീവിലേക്ക് പുറപ്പെട്ട ഫ്ലൈ ദുബൈ വിമാനത്തിലെ പൈലറ്റുമാർ തമ്മിലെ കത്തിക്കുത്തും സഊദി തബൂകിലെ എമജൻസി ലാന്റിംഗും സംബന്ധിച്ച് അന്വേഷണത്തിന്റെ പ്രാഥമിക കണ്ടെത്തലുകൾ സഊദി ആഭ്യന്തര മന്ത്രാലയം വെളിപ്പെടുത്തി. FZ1073-ൽ പ്രഖ്യാപിക്കപ്പെട്ട അടിയന്തര സാഹചര്യം കൈകാര്യം ചെയ്യുന്നതിനായി സഊദി അറേബ്യയിലെ ബന്ധപ്പെട്ട അധികൃതർ ആവശ്യമായ നടപടികൾ സ്വീകരിച്ചതായും, 2026 സെപ്റ്റംബർ 30 ബുധനാഴ്ച തബൂക്കിലെ പ്രിൻസ് സുൽത്താൻ ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിൽ അടിയന്തരമായി ഇറങ്ങാൻ വിമാനത്തിന് അനുമതി നൽകിയതായും ആഭ്യന്തര മന്ത്രാലയത്തിലെ ഔദ്യോഗിക വൃത്തങ്ങൾ അറിയിച്ചു.

174 യാത്രക്കാരും 8 ജീവനക്കാരുമായി എത്തിയ വിമാനം രാവിലെ 9:45-ന് സുരക്ഷിതമായി ലാൻഡ് ചെയ്യുകയും, എല്ലാവർക്കും ആവശ്യമായ പരിചരണം ഉറപ്പാക്കുകയും ചെയ്തുവെന്നും പ്രസ്താവാനയിൽ പറഞ്ഞു. വൈകുന്നേരം 5:40-ഓടെ, യാത്രക്കാർ എല്ലാവരും ഫ്ലൈ ദുബായിയുടെ മറ്റൊരു വിമാനത്തിൽ തങ്ങളുടെ ഇസ്റാഈൽ യാത്ര തുടർന്നു. അതേസമയം, പൈലറ്റും സഹപൈലറ്റും ഒഴികെയുള്ള ജീവനക്കാർ കമ്പനിയുടെ മറ്റൊരു വിമാനത്തിൽ ദുബായിലേക്ക് മടങ്ങി. ആരോഗ്യസ്ഥിതി വിലയിരുത്തിയതിനെത്തുടർന്ന് ചികിത്സയ്ക്കായി പൈലറ്റിനെയും സഹപൈലറ്റിനെയും ആശുപത്രിയിലേക്ക് മാറ്റുകയായിരുന്നു.

സഹോദരരാജ്യമായ യുണൈറ്റഡ് അറബ് എമിറേറ്റ്‌സിൽ നിന്നുള്ള സുരക്ഷാ സംഘത്തിന്റെ സഹകരണത്തോടെ സഊദി അധികൃതർ നടത്തിയ പ്രാഥമിക അന്വേഷണത്തിൽ, സഹപൈലറ്റ് പൈലറ്റിനെ ആക്രമിച്ചതായും ഇതിനെത്തുടർന്ന് ഇരുവർക്കും പരിക്കേറ്റതായും കണ്ടെത്തിയതായി ബന്ധപ്പെട്ട വൃത്തങ്ങൾ സൂചിപ്പിച്ചു.

ആരോഗ്യനില മെച്ചപ്പെട്ടതിനെത്തുടർന്ന്, ഒക്ടോബർ 1 വ്യാഴാഴ്ച രാവിലെ എമിറാത്തി സുരക്ഷാ സംഘത്തോടൊപ്പം അബുദാബിയിലേക്ക് മടങ്ങാൻ മെഡിക്കൽ സംഘം പൈലറ്റിനും സഹപൈലറ്റിനും അനുമതി നൽകിയതായും അധികൃതർ സ്ഥിരീകരിച്ചു.

അന്താരാഷ്ട്ര-മാനുഷിക ബാധ്യതകൾക്ക് അനുസൃതമായും, ബന്ധപ്പെട്ട അധികൃതർ അംഗീകരിച്ചിട്ടുള്ള ചട്ടങ്ങളും നിർദ്ദേശങ്ങളും പാലിച്ചുകൊണ്ടും അടിയന്തര സാഹചര്യങ്ങൾ കൈകാര്യം ചെയ്യുന്നതായി ഔദ്യോഗിക വൃത്തങ്ങൾ വ്യക്തമാക്കി. വ്യോമയാന സുരക്ഷ ഉറപ്പാക്കുന്നതിനും, അസാധാരണ സാഹചര്യങ്ങളിൽ വേഗത്തിലും ഫലപ്രദമായും പ്രതികരിക്കാനുള്ള രാജ്യത്തിന്റെ വ്യോമയാന-സുരക്ഷാ സംവിധാനങ്ങളുടെ സജ്ജത നിലനിർത്തുന്നതിനുമാണ് ഇത്തരം നടപടികൾ സ്വീകരിക്കുന്നതെന്ന് ആഭ്യന്തര മന്ത്രാലയം പ്രസ്താവാനയിൽ കൂട്ടിച്ചേർത്തു.