മൂന്ന് വർഷത്തിനുശേഷം നഷ്ടപരിഹാരം; കൊല്ലം സുധിയുടെ കുടുംബത്തിന് 1.77  കോടി രൂപ നൽകാൻ ഉത്തരവ്

കൊല്ലം: വാഹനാപകടത്തിൽ അന്തരിച്ച നടൻ കൊല്ലം സുധിയുടെ ആശ്രിതർക്ക് 1.77 കോടി രൂപ ഇൻഷുറൻസ് നഷ്ടപരിഹാരം അനുവദിച്ച് കോടതി. കോട്ടയം മോട്ടോർ ആക്‌‌സിഡന്റ് ക്ളെയിംസ് ട്രൈബ്യൂണൽ (എംഎസിടി) ആണ് ഉത്തരവിട്ടത്. 1,41,09,840 രൂപയാണ് ട്രൈബ്യൂണൽ വിധിച്ചത്.

കേസ് ഫയൽ ചെയ്ത ദിവസം മുതൽ തുക കെട്ടിവയ്ക്കുന്ന നാൾ വരെയുള്ള 8.5 ശതമാനം പലിശയും ചേരുമ്പോഴാണ് ആകെത്തുക ഒരു കോടി 77 ലക്ഷം രൂപയാണ് ഉയർന്നത്.

കേസിൽ മൂന്നാം എതിർകക്ഷിയായ ന്യൂ ഇന്ത്യ അഷുറൻസ് കമ്പനി 30 ദിവസത്തിനകം തുക കോടതിയിൽ കെട്ടിവയ്ക്കണമെന്നാണ് നിർദേശം. കൊല്ലം സുധി മരിച്ച് മൂന്ന് വർഷത്തിനുശേഷമാണ് കുടുംബത്തിന് നഷ്ടപരിഹാരം ലഭിക്കുന്നത്. സുധിയുടെ ഭാര്യക്കും അമ്മയ്ക്കും രണ്ട് മക്കൾക്കുമാണ് നഷ്ടപരിഹാരത്തുക ലഭിക്കുക.

2023 ജൂൺ അഞ്ചിനാണ് തൃശൂർ കൈപ്പമംഗലത്തുണ്ടായ വാഹനാപകടത്തിൽ സുധി മരിച്ചത്. കോഴിക്കോട് വടകരയിൽ നിന്ന് പരിപാടി കഴിഞ്ഞ് തിരുവനന്തപുരത്തേയ്ക്ക് മടങ്ങവേയായിരുന്നു അപകടം. സുധിയുൾപ്പെടെയുള്ളവർ സഞ്ചരിച്ച കാർ എതിർദിശയിൽ നിന്നുവന്ന പിക്കപ്പ് വാനുമായി കൂട്ടിയിടിക്കുകയായിരുന്നു. അപകടത്തിൽ കാറിൽ സുധിക്കൊപ്പമുണ്ടായിരുന്ന ടെലിവിഷൻ താരങ്ങളായ ബിനു അടിമാലി, ഉല്ലാസ് അരൂ‌ർ, മഹേഷ് കുഞ്ഞുമോൻ എന്നിവർക്ക് പരിക്കേറ്റു.

മിമിക്രി താരമായിരുന്ന സുധി 2015ൽ പുറത്തിറങ്ങിയ ‘കാന്താരി’ എന്ന ചിത്രത്തിലൂടെയാണ് സിനിമാരംഗത്തെത്തിയത്. കട്ടപ്പനയിലെ ഹൃത്വിക് റോഷൻ, കുട്ടനാടൻ മാർപാപ്പ, തീ റപ്പായി, വകതിരിവ്, ആൻ ഇന്റർനാഷണൽ ലോക്കൽ സ്റ്റോറി, കേശു ഈ വീടിന്റെ നാഥൻ, എസ്‌കേപ്പ്, സ്വർഗത്തിലെ കട്ടുറുമ്പ് എന്നി സിനിമകളിലും ശ്രദ്ധേയമായ വേഷങ്ങൾ ചെയ്തു.