ബഹ്‌റൈനിലെ ആമസോൺ ഡാറ്റാ സെന്റർ ആക്രമിച്ച് ഇറാൻ

ഗൾഫ് ഡസ്ക്: അമേരിക്കൻ ടെക് ഭീമനായ ആമസോണിന്റെ ബഹ്‌റൈനിലെ ഡാറ്റാ സെന്ററിന് നേരെ ഇറാൻ ആക്രമണം. സെന്ററിനെ ലക്ഷ്യമിട്ടതായി ഇറാന്റെ റെവല്യൂഷണറി ഗാർഡുകൾ വെള്ളിയാഴ്ച പറഞ്ഞതായി സ്റ്റേറ്റ് മീഡിയ റിപ്പോർട്ട് ചെയ്തു.

“കുട്ടികളെ കൊല്ലുന്ന അമേരിക്കൻ സൈന്യത്തിനായുള്ള വിവരങ്ങൾ പൂർത്തിയാക്കുന്നതിൽ പ്രധാന പങ്ക് വഹിക്കുന്ന അമേരിക്കൻ കമ്പനിയായ ആമസോണിന്റെ ഇന്റലിജൻസ് ഡാറ്റാ സെന്റർ കെട്ടിടം സൈന്യം ലക്ഷ്യമാക്കി നശിപ്പിച്ചു” എന്ന് സ്റ്റേറ്റ് ടിവി സംപ്രേഷണം ചെയ്ത പ്രസ്താവനയിൽ അവർ പറഞ്ഞു.

അതേസമയം, ഇറാന്റെ അവകാശവാദങ്ങളെക്കുറിച്ച് ആമസോണോ ബഹ്‌റൈൻ അധികൃതരോ ഇതുവരെ പ്രതികരിച്ചിട്ടില്ല. ഇറാനിൽ ആക്രമണം നടത്താൻ യുഎസ് സൈന്യം ഉപയോഗിക്കുന്ന മിഡിൽ ഈസ്റ്റിലെ ഏത് സൗകര്യങ്ങളോ താവളങ്ങളോ കേന്ദ്രങ്ങളോ തങ്ങൾ ആക്രമിക്കും എന്നാണ് ഇറാൻ അറിയിച്ചിട്ടുള്ളത്.

ബഹ്‌റൈൻ വീണ്ടും സൈറണുകൾ മുഴക്കുന്നുണ്ട്, പൊതുജനങ്ങളോട് സുരക്ഷിത കേന്ദ്രങ്ങളിൽ അഭയം തേടാൻ പ്രതിരോധ വിഭാഗം അഭ്യർത്ഥിക്കുന്നു. മുൻകരുതൽ സൈറണുകൾ വീണ്ടും സജീവമാക്കിയതായി ബഹ്‌റൈൻ ആഭ്യന്തര മന്ത്രാലയം അറിയിച്ചു, പൗരന്മാരോടും താമസക്കാരോടും ശാന്തത പാലിക്കാനും അടുത്തുള്ള സുരക്ഷിത സ്ഥലത്തേക്ക് പോകാനും ഔദ്യോഗിക ചാനലുകൾ വഴിയുള്ള അപ്‌ഡേറ്റുകൾ പിന്തുടരാനും അഭ്യർത്ഥിക്കുന്നു.