ടെഹ്റാൻ: ഹോർമുസ് കടലിടുക്കിൽ ഇന്ത്യൻ നാവികർ സഞ്ചരിച്ച എണ്ണക്കപ്പലിനു നേരെ ആക്രമണം. 27 ഇന്ത്യൻ ജീവനക്കാരുമായി പോയ ‘എംടി ലൂയിസ് 1’ എന്ന ക്രൂഡ് ഓയിൽ ടാങ്കറിനു നേരെയാണ് ആക്രമണമുണ്ടായതെന്ന് റോയിട്ടേഴ്സ് റിപ്പോർട്ട് ചെയ്യുന്നു.
ചെറിയ ബോട്ടിലെത്തിയ സംഘം കപ്പലിന്റെ അടിഭാഗത്ത് രണ്ട് ലിമ്പറ്റ് മൈനുകൾ ഒട്ടിച്ചുവയ്ക്കുകയായിരുന്നു. സ്ഫോടനത്തെ തുടർന്ന് കപ്പലിന്റെ എൻജിൻ റൂമിൽ തീപിടിക്കുകയും പ്രവർത്തനം താൽക്കാലികമായി നിലയ്ക്കുകയും ചെയ്തു. ജീവനക്കാർ ഉടൻ തീയണച്ചതിനാൽ വൻ ദുരന്തം ഒഴിവായി.
ശക്തമായ കാന്തങ്ങൾ ശത്രുക്കപ്പലുകളുടെയോ അന്തർവാഹിനികളുടെയോ പുറംഭാഗത്ത് ഒട്ടിച്ചുവച്ച് പൊട്ടിത്തെറിപ്പിക്കുന്ന ഒരു തരം നാവിക സ്ഫോടകവസ്തുവാണ് ലിമ്പറ്റ് മൈൻ. കടൽത്തീരത്തെ പാറകളിൽ ഒട്ടിപ്പിടിച്ചു കിടക്കുന്ന ലിമ്പറ്റ് എന്ന ചെറിയ കടൽ ഒച്ചിന്റെ പേരിൽനിന്നാണ് ഈ പേര് ലഭിച്ചത്.
പരിസ്ഥിതി മലിനീകരണമോ എണ്ണച്ചോർച്ചയോ ഉണ്ടായിട്ടില്ലെന്നും കപ്പൽ യാത്ര തുടർന്നതായും അധികൃതർ അറിയിച്ചു. ഒമാൻ തീരത്തെ ഖസബിൽനിന്ന് 46 കിലോമീറ്റർ വടക്കുകിഴക്കായാണു സംഭവം നടന്നതെന്ന് ബ്രിട്ടിഷ് നാവിക ഏജൻസിയായ യുകെഎംടിഒ അറിയിച്ചു. വ്യാഴാഴ്ച രണ്ട് ഇന്ത്യൻ ജീവനക്കാരുമായി പോയ ‘എംടി അർസാനാ’ എന്ന ഭീമൻ എണ്ണക്കപ്പലിനു നേരെ മിസൈൽ ആക്രമണം നടന്നിരുന്നു. ഫെബ്രുവരിയിൽ യുഎസും ഇറാനും തമ്മിൽ സംഘർഷം ആരംഭിച്ചതിനുശേഷം ഹോർമുസ് കടലിടുക്കിലൂടെയുള്ള രാജ്യാന്തര കപ്പലുകൾക്കു നേരെ നിരന്തരം ആക്രമണങ്ങൾ നടക്കുന്നുണ്ട്.
ഇതാദ്യമായാണ് ലിമ്പറ്റ് മൈനുകൾ ഉപയോഗിച്ചുള്ള ആക്രമണം വിജയകരമായി നടക്കുന്നത്. കടലിടുക്കിലെ തങ്ങളുടെ നിയന്ത്രണങ്ങൾ ലംഘിച്ചെന്ന് ആരോപിച്ചാണ് ഇറാൻ ഈ മേഖലയിൽ കപ്പലുകളെ ലക്ഷ്യമിടുന്നത്. ആക്രമണത്തിന് ഇരയായ കപ്പലുകളിലെ എല്ലാ ഇന്ത്യൻ നാവികരും സുരക്ഷിതരാണെന്നും ആർക്കും പരുക്കേറ്റിട്ടില്ലെന്നും കേന്ദ്ര തുറമുഖ-കപ്പൽ ഗതാഗത മന്ത്രി സർബാനന്ദ സോനോവാൾ അറിയിച്ചു.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
