റിയാദ് വിമാനത്താവള ആക്രമണം: സുരക്ഷാ മുന്നറിയിപ്പ് നൽകി യുഎസ്, പ്രദേശം ഒഴിവാക്കാൻ അമേരിക്കക്കാർക്ക് നിർദ്ദേശം

• ഹൂതി ആക്രമണത്തിൽ അമേരിക്കൻ പൗരൻ ഉൾപ്പെടെ 12 പേർ കൊല്ലപ്പെട്ടിരുന്നു

റിയാദ്: ഒക്ടോബർ 10 ശനിയാഴ്ച റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിനു നേരെ ആക്രമണങ്ങൾ ഉണ്ടായതിനെത്തുടർന്ന്, അവിടെയും പരിസരപ്രദേശങ്ങളിലും പോകുന്നത് ഒഴിവാക്കാൻ സഊദി അറേബ്യയിലെ യുഎസ് മിഷൻ അമേരിക്കൻ പൗരന്മാരോട് നിർദ്ദേശിച്ചു.

ആക്രമണങ്ങളെക്കുറിച്ച് തങ്ങൾക്ക് അറിവുണ്ടെന്ന് വ്യക്തമാക്കിയ മിഷൻ, സുരക്ഷാ മുന്നറിയിപ്പിലൂടെ വിമാനങ്ങൾ റദ്ദാക്കപ്പെടാനോ വ്യോമപാത അടച്ചിടാനോ യാത്രാ തടസ്സങ്ങൾ ഉണ്ടാകാനോ സാധ്യതയുണ്ടെന്നും അറിയിച്ചു. യാത്രയ്ക്ക് ഇറങ്ങുന്നതിന് മുൻപ്, വിമാനത്തിന്റെ നിലവിലെ അവസ്ഥയെക്കുറിച്ച് എയർലൈനുമായും വിമാനത്താവളവുമായും നേരിട്ട് ബന്ധപ്പെട്ട് ഉറപ്പുവരുത്താൻ യാത്രക്കാർക്ക് നിർദ്ദേശം നൽകി.

യുഎസ് സർക്കാർ ജീവനക്കാർക്ക് യാത്രാ നിയന്ത്രണങ്ങൾ

സഊദി അറേബ്യയിൽ ജോലി ചെയ്യുന്ന യുഎസ് സർക്കാർ ജീവനക്കാർ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം ഉപയോഗിക്കുന്നതിന് പ്രത്യേക അനുമതി നേടണമെന്ന് മുന്നറിയിപ്പിൽ പറയുന്നു. സുരക്ഷാ കാരണങ്ങളാൽ യെമൻ അതിർത്തിയുടെ 20 മൈൽ പരിധിക്കുള്ളിൽ യാത്ര ചെയ്യുന്നതിനും ഇവർക്ക് വിലക്കുണ്ട്.

ജിസാൻ, അസീർ, നജ്‌റാൻ എന്നീ പ്രവിശ്യകളിലേക്കും ഖത്തീഫ്, യാൻബു, തായിഫ് എന്നീ നഗരങ്ങളിലേക്കും യാത്ര ചെയ്യുന്നതിന് പ്രത്യേക അനുമതി ആവശ്യമാണ്. യുഎസ് പൗരന്മാർക്ക് സാധാരണവും അടിയന്തരവുമായ കോൺസുലാർ സേവനങ്ങൾ ലഭ്യമാണെന്ന് മിഷൻ അറിയിച്ചു.

സഊദി അറേബ്യയിലേക്കും യെമനിലേക്കുമുള്ള യാത്ര സംബന്ധിച്ച് യുഎസ് സ്റ്റേറ്റ് ഡിപ്പാർട്ട്‌മെന്റ് പുറപ്പെടുവിച്ചിട്ടുള്ള മുന്നറിയിപ്പുകൾ (travel advisories) പരിശോധിക്കാനും അമേരിക്കക്കാരോട് നിർദ്ദേശിച്ചു.

സുരക്ഷാ സംബന്ധമായ വിവരങ്ങൾ ലഭിക്കുന്നതിനും, അടിയന്തര സാഹചര്യങ്ങളിൽ എംബസിക്കോ കോൺസുലേറ്റിനോ തങ്ങളെ എളുപ്പത്തിൽ ബന്ധപ്പെടാൻ സൗകര്യമൊരുക്കുന്നതിനുമായി യുഎസ് പൗരന്മാർക്ക് സ്റ്റേറ്റ് ഡിപ്പാർട്ട്‌മെന്റിന്റെ ‘സ്മാർട്ട് ട്രാവലർ എൻറോൾമെന്റ് പ്രോഗ്രാമിൽ’ (STEP) രജിസ്റ്റർ ചെയ്യാവുന്നതാണ്.