കുടിവെള്ളം മറ്റു ആവശ്യങ്ങൾക്ക് ഉപയോഗിച്ചാൽ 200,000 റിയാൽ പിഴ, നിലവാരമില്ലാത്ത സാനിറ്ററി ഉപകരണങ്ങൾ ഉപയോഗിച്ചാൽ 10,000 റിയാൽ പിഴ, ടാങ്കുകൾ പൊട്ടി വെള്ളം പാഴായാലും പിഴ; സഊദിയിൽ ജല കാര്യക്ഷമത സംരക്ഷണ മാനദണ്ഡങ്ങൾ പരിഷ്കരിച്ചു 

• കുടിവെള്ളം മറ്റു ആവശ്യങ്ങൾക്ക് ഉപയോഗിച്ചാൽ 200,000 റിയാൽ പിഴ, നിലവാരമില്ലാത്ത സാനിറ്ററി ഉപകരണങ്ങൾ ഉപയോഗിച്ചാൽ 10,000 റിയാൽ പിഴ, ടാങ്കുകൾ പൊട്ടി വെള്ളം പാഴായാലും പിഴ

റിയാദ്: സഊദിയിൽ ജല കാര്യക്ഷമതയും സംരക്ഷണ മാനദണ്ഡങ്ങളും നിരീക്ഷിക്കുന്നതിനും പാലിക്കുന്നതിനുമായി പരിസ്ഥിതി, ജല, കൃഷി മന്ത്രാലയം നിയന്ത്രണങ്ങൾ പരിഷ്കരിച്ചു. ജലക്ഷമതയും സംരക്ഷണ മാനദണ്ഡങ്ങളും നിരീക്ഷിക്കുന്നതിനും പാലിക്കുന്നതിനുമുള്ള എക്സിക്യൂട്ടീവ് ചട്ടങ്ങൾ നഗരമേഖലയിൽ വ്യക്തമായ ലംഘനങ്ങളായി കണക്കാക്കപ്പെടുന്ന ഒരു കൂട്ടം നടപടികളെ വെളിപ്പെടുത്തി. ഉമ്മുൽ ഖുറാ പത്രത്തിൽ ഇത് പ്രസിദ്ധീകരിച്ചിട്ടുണ്ട്. നിയമ ലംഘനങ്ങൾ നിരീക്ഷിക്കാനും അന്വേഷിക്കാനും അവ സംബന്ധിച്ച് ആവശ്യമായ നിയമ നടപടികൾ സ്വീകരിക്കാനും നഗര, കാർഷിക, വ്യാവസായിക മേഖലകളിൽ നാഷണൽ സെന്റർ ഫോർ വാട്ടർ എഫിഷ്യൻസി ആൻഡ് കൺസർവേഷന് അധികാരം നൽകുന്ന പുതിയ പരിഷ്കാരങ്ങൾ അടുത്ത വർഷം മാർച്ച് 21 മുതൽ പ്രാബല്യത്തിൽ വരും.

പൊതു സൗകര്യങ്ങൾ, വനവൽക്കരണം, പൊതു പാർക്കുകൾ തുടങ്ങിയവയുടെ ഉപയോഗത്തിന് പുറമേ, പാർപ്പിട, വാണിജ്യ, നിർമ്മാണ ആവശ്യങ്ങൾക്കുള്ള ജല ഉപഭോക്താക്കൾക്കും ഇത് ബാധകമായിരിക്കും. മിക്‌സറുകൾ, ടാപ്പുകൾ, ഷവറുകൾ, ഫ്ലഷ് ബോക്‌സുകൾ എന്നിവ പോലുള്ള ഓരോ ഉപകരണത്തിനും നോൺ-ഗൈഡഡ് സാനിറ്ററി ഉപകരണങ്ങൾ ഉപയോഗിക്കുന്നത്, സാനിറ്ററി ഉപകരണങ്ങളുടെ ഗൈഡഡ് ഭാഗം കൃത്രിമമാക്കുകയോ നീക്കം ചെയ്യുകയോ ചെയ്യുന്നതും ലംഘനങ്ങളിൽ ഉൾപ്പെടുന്നുവെന്ന് ചട്ടങ്ങൾ വിശദീകരിച്ചു.

നിലവാരമില്ലാത്ത സാനിറ്ററി ഉപകരണങ്ങൾ ഉപയോഗിക്കുന്നത് നഗരമേഖലയിലെ നിയമ ലംഘനമാണ്. ആദ്യ തവണ 1,000 റിയാലും, രണ്ടാമത്തെ നിയമലംഘനത്തിന് 2,000 റിയാലും, മൂന്നാമത്തെ നിയമലംഘനത്തിന് 10,000 റിയാലും പിഴ ഇതിനു ചുമത്തും. ഗൈഡഡ് സാനിറ്ററി ഉപകരണങ്ങളുടെ ഗൈഡ് ഭാഗം കൃത്രിമമായി ഉപയോഗിക്കുകയോ നീക്കം ചെയ്യുകയോ ചെയ്താൽ ആദ്യ നിയമലംഘനത്തിന് 500 റിയാലും, രണ്ടാമത്തെ നിയമലംഘനത്തിന് 1,000 റിയാലും, മൂന്നാമത്തെ നിയമലംഘനത്തിന് 2,000 റിയാലും പിഴ ചുമത്തും.

ടാങ്ക് ബോഡിയിലോ ഇൻസുലേഷനിലോ വിള്ളലുകൾ, ഫ്ലോട്ടിന്റെ അഭാവം, തകരാറുകൾ എന്നിവ കാരണം ടാങ്കിൽ നിന്ന് കുടിവെള്ളം പാഴാക്കുന്നതും നിയമലംഘനങ്ങളിൽ ഉൾപ്പെടുന്നു. ഈ നിയമലംഘനത്തിനുള്ള പിഴ ആദ്യ തവണ 5,000 റിയാലും, രണ്ടാമത്തെ നിയമലംഘനത്തിന് 10,000 റിയാലും, മൂന്നാം തവണ അത് ചെയ്യുമ്പോൾ 50,000 റിയാലും പിഴ ചുമത്തും.

സംസ്കരിച്ച മലിനജലം, സംസ്കരിച്ച ജല ശൃംഖല, ലൈസൻസുള്ള കിണർ തുടങ്ങിയ ബദൽ സ്രോതസ്സുകൾ ഉണ്ടായിരിക്കവേ കുടിവെള്ളം ഉപയോഗിക്കുന്നതിന് ഉദ്ദേശിച്ചിട്ടുള്ള ആവശ്യങ്ങൾക്കല്ലാതെ ഉപയോഗിച്ചാൽ 25,000 റിയാൽ പിഴ ഈടാക്കും. ലംഘനം ആവർത്തിച്ചാൽ  200,000 റിയാൽ വരെ പിഴയും ലഭിക്കാവുന്ന കുറ്റമാണെന്ന് ചട്ടം വ്യക്തമാക്കുന്നു.

ഗ്രേ വാട്ടർ സ്റ്റേഷൻ പ്രവർത്തിപ്പിക്കുന്നതിനുള്ള വ്യവസ്ഥകൾ പാലിക്കുന്ന കെട്ടിടങ്ങൾക്കും സമുച്ചയങ്ങൾക്കും വേണ്ടി ഗ്രെയ് വാട്ടർ സ്റ്റേഷൻ പ്രവർത്തിപ്പിക്കുന്നതിൽ പരാജയപ്പെടുന്നതും നിയമലംഘനങ്ങളിൽ ഉൾപ്പെടുന്നു, ആദ്യ തവണ 50,000 റിയാലും രണ്ടാമത്തെയും മൂന്നാമത്തെയും തവണ 100,000 റിയാലും പിഴ ഈടാക്കും. കാര്യക്ഷമമല്ലാത്ത ജലസേചന സംവിധാനം ഉപയോഗിക്കുച്ചാൽ ആദ്യ തവണ 5,000 റിയാലും രണ്ടാമത്തെയും മൂന്നാമത്തെയും തവണ 100,000 റിയാലും പിഴ ചുമത്തും.

ജലസേചന ശൃംഖലയിൽ നിന്നോ ആന്തരിക ജല ശൃംഖലയിൽ നിന്നോ ചോർച്ചയുണ്ടായാൽ അത് ഒരു ലംഘനമായി കണക്കാക്കപ്പെടുന്നു, കൂടാതെ ആദ്യ തവണ രണ്ടായിരം റിയാലും രണ്ടാം തവണ നാലായിരം റിയാലും മൂന്നാം തവണ പതിനായിരം റിയാലും പിഴ ചുമത്തും. പൊതു കേന്ദ്രങ്ങളിൽ ജലസംരക്ഷണത്തെക്കുറിച്ചുള്ള അവബോധ സാമഗ്രികൾ സ്ഥാപിക്കാത്തതിന് രണ്ടായിരം റിയാലും രണ്ടാം തവണ നാലായിരം റിയാലും മൂന്നാം തവണ പതിനായിരം റിയാലും പിഴ ഈടാക്കും. അതേസമയം, ഗുരുതരമല്ലാത്ത ചില ലംഘനങ്ങൾ തിരുത്താൻ ചട്ടങ്ങൾ ലംഘിക്കുന്നവർക്ക് 14 ദിവസത്തെ സമയവും അനുവദിച്ചിട്ടുണ്ട്.

കാർഷിക മേഖലയിൽ ജല ലൈസൻസുകൾ എടുക്കാതിരിക്കൽ, കാര്യക്ഷമമായ ജലസേചന സംവിധാനങ്ങൾ, ഉപകരണങ്ങൾ, സാങ്കേതികവിദ്യകൾ എന്നിവ ഉപയോഗിക്കാതിരിക്കൽ എന്നിവ ലംഘനങ്ങളിൽ ഉൾപ്പെടുന്നു, കൂടാതെ വ്യാവസായിക മേഖലയിൽ നഗര ഉപയോഗങ്ങൾ ഉണ്ടായാൽ നഗര മേഖലയിലെ പിഴകൾ വ്യാവസായിക മേഖലയ്ക്ക് ബാധകമാണ്.

നഗരമേഖലയിൽ വെള്ളം വേർതിരിച്ചെടുക്കൽ, ഉൽപ്പാദിപ്പിക്കൽ, കൊണ്ടുപോകൽ, വിതരണം, ഉപയോഗം എന്നിവയുടെ ചുമതലയുള്ള വ്യക്തി, സഊദി ബിൽഡിംഗ് കോഡിനായുള്ള ദേശീയ കമ്മിറ്റി അംഗീകരിച്ച കെട്ടിടങ്ങൾക്കായുള്ള ജല കാര്യക്ഷമത, സംരക്ഷണ ഗൈഡിലെ ചെക്ക്‌ലിസ്റ്റിൽ പറഞ്ഞിരിക്കുന്ന കാര്യങ്ങൾ, സംരക്ഷണ ഉപകരണങ്ങളിലെ പരമാവധി ഒഴുക്ക് നിരക്ക്, ഉപകരണങ്ങളുടെ നാമമാത്രമായ ഒഴുക്ക് നിരക്കിനുള്ള അനുവദനീയമായ പരിധികൾ, ജല ഉപഭോഗം സംരക്ഷിക്കുന്നതിനുള്ള ഉൽപ്പന്നങ്ങൾക്കും ഉപകരണങ്ങൾക്കുമുള്ള സാങ്കേതിക നിയന്ത്രണങ്ങളും സവിശേഷതകളും, ജല സംവിധാനത്തിൽ പറഞ്ഞിരിക്കുന്ന ജല ഉപയോഗ മുൻഗണനകൾ, ഇക്കാര്യത്തിൽ യോഗ്യതയുള്ള അധികാരികൾ പുറപ്പെടുവിച്ച കാര്യങ്ങൾ എന്നിവയ്ക്ക് അനുസൃതമായി ജല ഉപഭോഗ മാർഗ്ഗനിർദ്ദേശ സംവിധാനങ്ങളുടെ ആവശ്യകതകളും മാനദണ്ഡങ്ങളും പാലിക്കാൻ ബാധ്യസ്ഥനാണ്.

പുതുക്കിയ ചട്ടങ്ങൾ പ്രകാരം, മാനദണ്ഡങ്ങൾ നിരീക്ഷിക്കുന്നതിനും പാലിക്കുന്നതിനുമുള്ള എക്സിക്യൂട്ടീവ് ചട്ടങ്ങളിലെ വ്യവസ്ഥകളുടെ ലംഘനങ്ങൾ നിരീക്ഷിക്കുന്നതിനും അന്വേഷിക്കുന്നതിനും അവ സംബന്ധിച്ച് ആവശ്യമായ നിയമ നടപടികൾ സ്വീകരിക്കുന്നതിനും കേന്ദ്രം ഉത്തരവാദിയായിരിക്കും. നിരീക്ഷണ, നിർവ്വഹണ ജോലികൾ നിർവഹിക്കുന്നതിന് പ്രത്യേക കമ്പനികളുടെയോ ഓഫീസുകളുടെയോ സഹായം തേടാവുന്നതാണ്. ലംഘനത്തിന് ഉത്തരവാദിയായ വ്യക്തിയെയോ അങ്ങനെ ചെയ്യാൻ അധികാരപ്പെടുത്തിയ വ്യക്തിയെയോ അതുമായി ബന്ധപ്പെട്ട എല്ലാവരെയും അന്വേഷിക്കുകയും അവരുടെ പ്രസ്താവനകളും പ്രതിരോധങ്ങളും ഇലക്ട്രോണിക് മാർഗങ്ങളിലൂടെ കേൾക്കുകയും ചെയ്യും. ശിക്ഷകൾ ചുമത്തുന്നതിനായി എൻഫോഴ്‌സ്‌മെന്റ് റിപ്പോർട്ടുകൾ ലംഘനങ്ങളുടെ അവലോകനത്തിനും വിധിനിർണ്ണയത്തിനുമുള്ള കമ്മിറ്റിക്ക് റഫർ ചെയ്യും. തീരുമാനം അറിയിച്ച തീയതി മുതൽ 30 ദിവസത്തിനുള്ളിൽ അപ്പീൽ നൽകാനും, കമ്മിറ്റിയുടെ തീരുമാനങ്ങളെ 60 ദിവസത്തിനുള്ളിൽ അഡ്മിനിസ്ട്രേറ്റീവ് കോടതിയിൽ എതിർക്കാനും നിയമലംഘകന് അവകാശമുണ്ട്.