സെപ്റ്റിക് ടാങ്ക് വൃത്തിയാക്കാനിറങ്ങി; വിഷവാതകം ശ്വസിച്ച് മൂന്നു തൊഴിലാളികൾ മരിച്ചു

ന്യൂഡൽഹി: സെപ്റ്റിക് ടാങ്ക് വൃത്തിയാക്കുന്നതിനിടെ വിഷവാതകം ശ്വസിച്ച് മൂന്നു മരണം. ഡൽഹിയിലെ മുണ്ട്ക വ്യവസായ മേഖലയിൽ വെള്ളിയാഴ്ച ഉച്ചയോടെയാണ് അപകടമുണ്ടായത്. അരുൺ (38), സന്ദീപ് (32), ചന്ദ് (42) എന്നിവരാണ് മരിച്ചത്. ഉച്ചയ്ക്ക് 12.03നാണ് അപകടം സംബന്ധിച്ച വിവരം ലഭിച്ചതെന്ന് ഡൽഹി അഗ്നിരക്ഷാസേന പറഞ്ഞു. 

മുണ്ട്കയിലെ ഫാക്ടറിയിലെ സെപ്റ്റിക് ടാങ്ക് വൃത്തിയാക്കാൻ എത്തിയതായിരുന്നു തൊഴിലാളികൾ. ആദ്യം സെപ്റ്റിക് ടാങ്കിൽ ഇറങ്ങിയ ഒരാൾ ബോധരഹിതനായി വീണതോടെ ഇയാളെ രക്ഷിക്കാനായാണ് മറ്റു രണ്ട് തൊഴിലാളികൾ ഇറങ്ങിയത്. എന്നാൽ ഇവരും വിഷവാതകം ശ്വസിച്ച് ബോധരഹിതരാകുകയായിരുന്നു.

രക്ഷാപ്രവർത്തനത്തിനായി അഗ്നിരക്ഷാസേനയുടെ രണ്ടു വാഹനങ്ങൾ പുറപ്പെട്ടെങ്കിലും ഗതാഗതക്കുരുക്ക് കാരണം ഇവയ്ക്ക് സ്ഥലത്ത് എത്താനായില്ല. പിന്നീട് എതിർഭാഗത്തുനിന്ന് മറ്റൊരു വാഹനം എത്തിക്കുകയായിരുന്നെന്ന് അഗ്നിരക്ഷാസേനയിലെ മുതിർന്ന ഉദ്യോഗസ്ഥൻ പറഞ്ഞു. തുടർന്ന് ഉദ്യോഗസ്ഥർ ടാങ്കിൽനിന്ന് മൂവരെയും പുറത്തെത്തിച്ചെങ്കിലും എല്ലാവരും മരിച്ചനിലയിലായിരുന്നു.