റിയാദ് : തലസ്ഥാന നഗരത്തിലും പരിസര പ്രദേശങ്ങളിലുമുള്ള 17 പാർക്കുകൾക്ക് പേര് നിർദ്ദേശിക്കാൻ റിയാദ് മുനിസിപ്പാലിറ്റി താമസക്കാരെ ക്ഷണിക്കുന്നു. പ്രാദേശിക തീരുമാനങ്ങൾ എടുക്കുന്നതിൽ ജനങ്ങളുടെ പങ്കാളിത്തം വർദ്ധിപ്പിക്കാനും, മുനിസിപ്പൽ വികസന പ്രവർത്തനങ്ങളിൽ പൗരന്മാരുടെ സജീവ ഇടപെടൽ പ്രോത്സാഹിപ്പിക്കാനുമാണ് ഈ സംരംഭത്തിലൂടെ ലക്ഷ്യമിടുന്നത്.
2026 ഒക്ടോബർ 24 ശനിയാഴ്ച വരെ പേര് നിർദ്ദേശങ്ങൾ സമർപ്പിക്കാവുന്നതാണ്. നിർദ്ദേശിക്കുന്ന പേരുകൾ രണ്ട് വാക്കുകൾ ചേർന്നതായിരിക്കണം (വ്യക്തികളുടെ പേരുകൾ ഒഴികെ). കൂടാതെ, ആ പ്രദേശത്തിന്റെ ചരിത്രപരമായ സവിശേഷതകളും തനതായ പ്രാദേശിക സ്വത്വവും പ്രതിഫലിപ്പിക്കുന്നതും, സാമൂഹിക മൂല്യങ്ങൾക്ക് അനുയോജ്യമായതും ആയിരിക്കണം. നിലവിലുള്ള പാർക്കുകളുടെ പേരുകൾ തന്നെ വീണ്ടും നൽകാൻ പാടില്ല.
താമസക്കാർക്ക് അവരുടെ പ്രദേശങ്ങളുമായുള്ള ബന്ധം കൂടുതൽ ദൃഢമാക്കുക, പൊതുസ്ഥലങ്ങളുടെ സംരക്ഷണത്തിലും പരിപാലനത്തിലും ജനങ്ങളുടെ പങ്കാളിത്തം പ്രോത്സാഹിപ്പിക്കുക, നഗരജീവിതം കൂടുതൽ മെച്ചപ്പെടുത്താനും മനുഷ്യകേന്ദ്രീകൃതമാക്കാനും ലക്ഷ്യമിട്ടുള്ള മുനിസിപ്പൽ പദ്ധതികളെ പിന്തുണയ്ക്കുക എന്നിവയാണ് ഈ സംരംഭത്തിന്റെ ലക്ഷ്യമെന്ന് മുനിസിപ്പാലിറ്റി അറിയിച്ചു. തിരഞ്ഞെടുക്കപ്പെട്ട പേരുകൾ 2026 ഒക്ടോബർ 27 ചൊവ്വാഴ്ച ഔദ്യോഗികമായി പ്രഖ്യാപിക്കും.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
