സമസ്ത മുശാവറ യോഗം ഇന്ന്; ഉമർ ഫൈസി മുക്കത്തിന്റെ പ്രസ്താവനകൾ ചർച്ചയാകും

കോഴിക്കോട്: സമസ്ത കേരള ജംഇയ്യത്തുൽ ഉലമ കേന്ദ്ര മുശാവറ യോഗം ഇന്ന് കോഴിക്കോട് ചേരും. ഉമർ ഫൈസി മുക്കത്തിന്റെ പ്രസ്താവനകളും തുടർന്നുണ്ടായ ആഭ്യന്തര തർക്കങ്ങളും പുതിയ ജനറൽ സെക്രട്ടറിയുടെ തെരഞ്ഞെടുപ്പും യോഗത്തിൽ പ്രധാന ചർച്ചാവിഷയങ്ങളാകും.

യുഡിഎഫ് സർക്കാർ അധികാരത്തിൽ വന്നാൽ ആർഎസ്എസുകാരെ വഖഫ് ബോർഡ് അംഗങ്ങളാക്കുമെന്ന ഉമർ ഫൈസി മുക്കത്തിന്റെ പരാമർശമാണ് സമസ്തയ്ക്കുള്ളിൽ വലിയ പ്രതിഷേധത്തിന് വഴിവെച്ചത്. വഖഫ് വിഷയം മുൻനിർത്തി നടത്തിയ പ്രസ്താവന സമസ്തയുടെ നയങ്ങൾക്ക് വിരുദ്ധമാണെന്നും അതിനാൽ ഉമർ ഫൈസിയെ മുശാവറയിൽ നിന്ന് പുറത്താക്കണമെന്നും സംഘടനയിലെ ഒരു വിഭാഗം ആവശ്യപ്പെടുന്നുണ്ട്.

എന്നാൽ, സമസ്ത നേതൃത്വത്തിന്റെ വിലക്ക് ലംഘിച്ച് മലപ്പുറത്ത് പരിപാടി സംഘടിപ്പിക്കാൻ നീക്കം നടത്തിയവർക്കെതിരെ കടുത്ത സംഘടന നടപടി വേണമെന്ന് മറുവിഭാഗവും ആവശ്യപ്പെടുന്നു. ഇരുവിഭാഗങ്ങളുടെയും പരാതികളും നിലപാടുകളും ഇന്ന് ചേരുന്ന കേന്ദ്ര മുശാവറ യോഗത്തിൽ വിശദമായി ചർച്ച ചെയ്യും.

അതോടൊപ്പം, പ്രൊഫ. കെ. ആലിക്കുട്ടി മുസ്‌ലിയാരുടെ വിയോഗത്തെ തുടർന്ന് ഒഴിവുവന്ന ജനറൽ സെക്രട്ടറി പദവിയിലേക്കുള്ള തെരഞ്ഞെടുപ്പും ഇന്നത്തെ യോഗത്തിൽ നടക്കും. സംഘടനയ്ക്കുള്ളിലെ തർക്കങ്ങൾ പരിഹരിച്ച് പുതിയ ഭാരവാഹിയെ കണ്ടെത്തുന്നത് സമസ്ത നേതൃത്വത്തിന് നിർണായകമാകും.

….