റിയാദ്: നിരോധിതമോ വ്യാജമോ ആയ കീടനാശിനികൾ നിർമ്മിക്കുകയോ ഇറക്കുമതി ചെയ്യുകയോ ചെയ്താൽ പരമാവധി അഞ്ച് വർഷം തടവും 10 ദശലക്ഷം റിയാൽ പിഴയും നിർദേശിച്ച് പുതിയ കരട്. ഗൾഫ് സഹകരണ കൗൺസിൽ (ജിസിസി) രാജ്യങ്ങളുടെ കീടനാശിനി നിയമപ്രകാരമുള്ള ശിക്ഷാ വകുപ്പിലാണ് പുതിയ നിർദേശങ്ങൾ. സഊദി പരിസ്ഥിതി, ജല, കൃഷി മന്ത്രാലയമാണ് ഇക്കാര്യങ്ങൾ വെളിപ്പെടുത്തിയത്.
കരട് പ്രകാരം, ലംഘനം മനുഷ്യർക്കും, മൃഗങ്ങൾക്കും, സസ്യങ്ങൾക്കും, പരിസ്ഥിതിക്കും, പൊതുജനാരോഗ്യത്തിനും കാര്യമായ ദോഷം വരുത്തുന്നില്ലെങ്കിൽ, ലംഘനം നടത്തുന്നയാൾക്ക് മുന്നറിയിപ്പ് നൽകുകയും ലംഘനം തിരുത്താൻ ഒരു ഗ്രേസ് പിരീഡ് നൽകുകയും ചെയ്യും.
നിരോധിതമോ വ്യാജമോ ആയ കീടനാശിനികൾ നിർമ്മിക്കുകയോ ഇറക്കുമതി ചെയ്യുകയോ ചെയ്യുന്ന ഏതൊരാൾക്കും അഞ്ച് വർഷം വരെ തടവും 10,000,000 റിയാൽ വരെ പിഴയും അല്ലെങ്കിൽ ഈ രണ്ട് പിഴകളിൽ ഒന്ന് ബാധകമാകുമെന്ന് കരട് വ്യക്തമാക്കുന്നു. പബ്ലിക് പ്രോസിക്യൂഷൻ ലംഘനങ്ങൾ അന്വേഷിക്കുകയും ആർട്ടിക്കിളിൽ പറഞ്ഞിരിക്കുന്ന പിഴകൾ ചുമത്താൻ യോഗ്യതയുള്ള കോടതിയിൽ കേസ് കൊണ്ടുവരുകയും ചെയ്യും. ആവർത്തിച്ചാൽ നിയമലംഘകന് ചുമത്തിയ പിഴ ഇരട്ടിയാക്കാം.
പൊതുജനാരോഗ്യ കീടനാശിനികളുമായി ബന്ധപ്പെട്ട ചട്ടങ്ങളുടെയും അവയുടെ അനുബന്ധ വ്യവസ്ഥകളുടെയും ലംഘനങ്ങൾ അവലോകനം ചെയ്യുന്നതിനും പിഴകൾ ചുമത്തുന്നതിനും സഊദി ഫുഡ് ആൻഡ് ഡ്രഗ് അതോറിറ്റി (SFDA) പ്രസിഡന്റോ അദ്ദേഹത്തിന്റെ അംഗീകൃത വ്യക്തിയോ പിഴകൾ ഈടാക്കാൻ അനുവാദം നാകും.
പിഴകൾ ചുമത്തുമ്പോൾ, മന്ത്രാലയവും അതോറിറ്റിയും നിയമലംഘകനോട് ലംഘനം നീക്കം ചെയ്യാനും കുറ്റകൃത്യം ആവർത്തിച്ചാൽ പിഴ ഇരട്ടിയാക്കാനും ആവശ്യപ്പെടാം. മുമ്പത്തെ ലംഘനം നടന്ന തീയതി മുതൽ മൂന്ന് വർഷത്തിനുള്ളിൽ സംഭവിച്ചാൽ അത് ആവർത്തിച്ചുള്ള കുറ്റമായി കണക്കാക്കും.
ലംഘനത്തിൽ ഉൾപ്പെട്ട വസ്തുക്കൾ രാസവസ്തുക്കൾ നീക്കം ചെയ്യുന്നതിൽ വൈദഗ്ദ്ധ്യമുള്ള ഒരു കമ്പനിയായിരിക്കും ഇവ നശിപ്പിക്കുക. അല്ലെങ്കിൽ നിയമലംഘകന്റെ ചെലവിൽ ഉത്ഭവ രാജ്യത്തേക്ക് വീണ്ടും തിരിച്ച് കയറ്റുമതി ചെയ്യും. പിഴയ്ക്ക് പുറമേ, ലംഘനം നടന്ന കേന്ദ്രം ആറ് മാസത്തിൽ കൂടാത്ത കാലയളവിലേക്ക് താൽക്കാലികമായി അടച്ചുപൂട്ടുകയോ ശാശ്വതമായി അടച്ചുപൂട്ടുകയോ ചെയ്യാം. പിഴ തീരുമാനത്തിനെതിരായ അപ്പീലുകൾ അഡ്മിനിസ്ട്രേറ്റീവ് കോടതിയിൽ അതിന്റെ ചട്ടങ്ങൾക്കനുസൃതമായി ഫയൽ ചെയ്യാം.
