കൊവിഡിന്റെ പുതിയ വകഭേദം; അമേരിക്കയുൾപ്പെടെ നിരവധി രാജ്യങ്ങളിൽ പിജെ.2.1 വ്യാപിക്കുന്നു

ന്യൂഡൽഹി: അമേരിക്കയുൾപ്പെടെ വിവിധ രാജ്യങ്ങളിൽ കോവിഡിന്റെ പുതിയ വകഭേദമായ പിജെ.2.1 (PJ.2.1) കണ്ടെത്തി. ആ​ദ്യം കാനഡയിൽ സ്ഥിരീകരിച്ച വകഭേദം അമേരിക്ക, ഫ്രാൻസ്, സ്പെയിൻ, സിംഗപ്പുർ, ഓസ്ട്രേലിയ, ന്യൂസിലൻഡ്, ഇസ്രയേൽ തുടങ്ങിയ രാജ്യങ്ങളിലും കണ്ടെത്തിയതോടെ ആരോഗ്യവിദഗ്ധർ നിരീക്ഷണം ശക്തമാക്കി. എന്നാൽ മുൻ വകഭേദങ്ങളെ അപേക്ഷിച്ച് പിജെ.2.1 കൂടുതൽ ഗുരുതരമായ രോഗബാധയ്ക്ക് കാരണമാകുമെന്നതിന് നിലവിൽ തെളിവുകളില്ല.

2026 മെയ് രണ്ടിന് കാനഡയിലെ ഒന്റാറിയോയിലാണ് പുതിയ വകഭേദം ആദ്യമായി കണ്ടെത്തിയത്. പിന്നീട് കാനഡയിലെ മറ്റ് പ്രവിശ്യകളിലേക്കും വ്യാപിച്ചു. ജൂൺ 30ന് അമേരിക്കയിലെ ന്യൂയോർക്ക് നഗരത്തിൽ ആദ്യ കേസ് സ്ഥിരീകരിച്ചു. തുടർന്ന് കാലിഫോർണിയ, അരിസോണ, ന്യൂജേഴ്സി, വിർജീനിയ, ഫ്ലോറിഡ തുടങ്ങി നിരവധി സംസ്ഥാനങ്ങളിലും വകഭേദത്തിന്റെ സാന്നിധ്യം കണ്ടെത്തി.

അമേരിക്കയിലെ മലിനജല സാമ്പിളുകൾ പരിശോധിച്ചുള്ള പഠനത്തിൽ അതിവേഗം വർധിക്കുന്ന കോവിഡ് വകഭേദങ്ങളിലൊന്നാണ് പിജെ.2.1 എന്ന് ഗവേഷകർ കണ്ടെത്തിയിട്ടുണ്ട്. സ്പെയിനിലെ ചില പ്രദേശങ്ങളിൽ വകഭേദം പ്രാദേശികമായി പകരുന്നതിന്റെ സൂചനകളും ലഭിച്ചിട്ടുണ്ട്.

കാനഡയിലെ ഒന്റാറിയോയിൽ സെപ്തംബർ 20 മുതൽ ഒക്ടോബർ 17 വരെ ജനിതക പരിശോധന നടത്തിയ 523 കോവിഡ് കേസുകളിൽ 25.2 ശതമാനവും പിജെ.2.1 വകഭേദമായിരുന്നു. അതിനു മുമ്പുള്ള നാലാഴ്ചക്കാലത്ത് ഇത് 16.9 ശതമാനമായിരുന്നു. ഒന്റാറിയോ പബ്ലിക് ഹെൽത്ത് നവംബർ രണ്ടിന് പ്രസിദ്ധീകരിച്ച റിപ്പോർട്ടിലാണ് ഈ കണക്കുകൾ. പരിശോധനയ്ക്ക് തിരഞ്ഞെടുത്ത സാമ്പിളുകളിലെ ശതമാനമാണിത്. സംസ്ഥാനത്തെ മുഴുവൻ കോവിഡ് കേസുകളുടെയും കണക്കല്ല.

ഒമിക്രോണിന്റെ ജെഎൻ.1 (JN.1) വിഭാഗത്തിൽനിന്ന് രൂപപ്പെട്ട വകഭേദമാണ് പിജെ.2.1. വൈറസിന്റെ സ്പൈക്ക് പ്രോട്ടീനിൽ നിരവധി ജനിതകമാറ്റങ്ങൾ സംഭവിച്ചിട്ടുണ്ട്. മനുഷ്യകോശങ്ങളിലെ എസിഇ2 (ACE2) റിസപ്റ്ററുകളുമായി കൂടുതൽ കാര്യക്ഷമമായി ബന്ധപ്പെടാനുള്ള ശേഷി പുതിയ വകഭേദത്തിനുണ്ടാകാമെന്നാണ് പ്രാഥമിക ലബോറട്ടറി പഠനങ്ങൾ സൂചിപ്പിക്കുന്നത്. എന്നാൽ മനുഷ്യർക്കിടയിൽ എത്ര വേഗത്തിൽ പകരുമെന്നോ കൂടുതൽ ഗുരുതരമായ രോഗബാധയുണ്ടാക്കുമെന്നോ ഇതിലൂടെ സ്ഥിരീകരിക്കാനാവില്ല.

വാക്സിനിലൂടെ ലഭിക്കുന്ന പ്രതിരോധശേഷിയെ വലിയ തോതിൽ മറികടക്കാൻ പുതിയ വകഭേദത്തിന് കഴിയുമെന്നതിന് നിലവിൽ തെളിവുകളില്ല. പുതുക്കിയ കോവിഡ് വാക്സിൻ സ്വീകരിച്ചവരിലെ ആന്റിബോഡികൾക്ക് പിജെ.2.1 വകഭേദത്തെ നിർവീര്യമാക്കാൻ കഴിയുന്നതായി ലബോറട്ടറി പരിശോധനയിൽ കണ്ടെത്തിയിട്ടുണ്ട്. ഒക്ടോബറിൽ ജേണൽ ഓഫ് ഇൻഫെക്ഷനിൽ പ്രസിദ്ധീകരിച്ച പഠനത്തിലാണ് ഇക്കാര്യം വിശദീകരിക്കുന്നത്.

പനി, ചുമ, തൊണ്ടവേദന, മൂക്കൊലിപ്പ്, തലവേദന, ശരീരവേദന, ക്ഷീണം തുടങ്ങിയവയാണ് കോവിഡ് ബാധയിൽ സാധാരണയായി കണ്ടുവരുന്ന ലക്ഷണങ്ങൾ. പിജെ.2.1 വകഭേദത്തിന് മാത്രമായി പ്രത്യേക രോഗലക്ഷണങ്ങളൊന്നും ഇതുവരെ കണ്ടെത്തിയിട്ടില്ല. ജലദോഷത്തിന്റെയും ഇൻഫ്ലുവൻസയുടെയും ലക്ഷണങ്ങളുമായി സാമ്യമുള്ളതിനാൽ പരിശോധനയിലൂടെ മാത്രമേ കോവിഡ് ബാധ സ്ഥിരീകരിക്കാനാകൂ.

പ്രായമായവരും രോഗപ്രതിരോധശേഷി കുറഞ്ഞവരും മറ്റ് ഗുരുതര ആരോഗ്യപ്രശ്നങ്ങളുള്ളവരും കൂടുതൽ ജാഗ്രത പാലിക്കണമെന്ന് ആരോഗ്യവിദഗ്ധർ നിർദേശിക്കുന്നു. രോഗലക്ഷണങ്ങളുള്ളവർ പരിശോധന നടത്തുകയും മറ്റുള്ളവരിലേക്കുള്ള വ്യാപനം തടയാൻ മുൻകരുതൽ സ്വീകരിക്കുകയും വേണം.
..