ടാറിങ് ജീപ്പും സ്കൂട്ടറും കൂട്ടിയിടിച്ച് ഹെൽത്ത് ഇൻസ്പെക്ടർക്ക് ദാരുണാന്ത്യം

തൊടുപുഴ: ടാറിങ് ജീപ്പും സ്കൂട്ടറും കൂട്ടിയിടിച്ചുണ്ടായ അപകടത്തിൽ കുടുംബാരോഗ്യ കേന്ദ്രത്തിലെ ജൂനിയർ ഹെൽത്ത് ഇൻസ്പെക്ടർ മരിച്ചു. വണ്ണപ്പുറം കുടുംബാരോഗ്യ കേന്ദ്രത്തിന് കീഴിലെ മുണ്ടന്മുടി ജനകീയ ആരോഗ്യ കേന്ദ്രത്തിലെ ജെ.എച്ച്.ഐ.യും മടക്കത്താനം സ്വദേശിയുമായ വെട്ടുകല്ലുംപുറത്ത് ജൂബീന ഇമ്രാൻ (36) ആണ് മരിച്ചത്.

മാങ്ങാട്ടുകവല-ഷാപ്പുംപടി നാലുവരിപ്പാതയിൽ ബുധനാഴ്ച വൈകീട്ട് 4.30-നായിരുന്നു അപകടം. ഔദ്യോഗിക ജോലികൾക്കുശേഷം ബസിൽ മാങ്ങാട്ടുകവലയിൽ വന്നിറങ്ങിയ ജൂബീന, അവിടെ പാർക്ക്ചെയ്തിരുന്ന സ്കൂട്ടറിൽ വീട്ടിലേക്ക് മടങ്ങുന്നതിനിടെ ജീപ്പുമായി കൂട്ടിയിടിക്കുകയായിരുന്നു.

അപകടത്തിന് പിന്നാലെ ഇവരെ വെങ്ങല്ലൂരിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അപകടമുണ്ടാക്കിയ ജീപ്പ് തൊടുപുഴ പോലീസ് കസ്റ്റഡിയിലെടുത്തു. ഭർത്താവ്: ഇമ്രാൻ കരീം.

മക്കൾ: ഇമാദ്, ഇസ ഫാത്തിമ. സംസ്കാരം വ്യാഴാഴ്ച ഉച്ചയ്ക്ക് ഒരുമണിക്ക് ളുഹർ നമസ്കാരത്തിനുശേഷം കാരിക്കോട് നൈനാർ പള്ളി ഖബർസ്ഥാനിൽ.
അശാസ്ത്രീയമായ റോഡ് നിർമാണത്തിൽ പ്രതിഷേധിച്ച് സി.പി.എം. വെങ്ങല്ലൂർ ഷാപ്പുംപ്പടി റോഡ് ഉപരോധിച്ചു.