ഗൾഫ് രാജ്യങ്ങളിൽ നിരവധി സ്‌കൂളുകൾ സ്ഥാപിച്ച മലയാളി വിദ്യാഭ്യാസ വിചക്ഷണൻ അന്തരിച്ചു

ഗൾഫ് ഡസ്ക്: ഭവൻസ് മിഡിൽ ഈസ്റ്റ് സ്ഥാപകനും ചെയർമാനുമായ എൻ കെ രാമചന്ദ്രൻ മേനോൻ (78) അന്തരിച്ചു. യുഎഇ, കുവൈറ്റ്, ബഹ്‌റൈൻ എന്നിവിടങ്ങളിൽ നിരവധി സ്കൂളുകളുടെ ശൃംഖല കെട്ടിപ്പടുത്ത പ്രമുഖനാണ് അദ്ദേഹം. കുടുംബാംഗങ്ങളാണ് വിയോഗ വിവരം പുറത്തുവിട്ടത്. സംസ്കാര ചടങ്ങുകൾ വ്യാഴാഴ്ച ആലുവയിലെ കുടുംബവീട്ടിൽ നടന്നു.

മൂന്ന് രാജ്യങ്ങളിലായി ഒൻപത് സ്കൂളുകളും രണ്ട് പ്രീ സ്കൂളുകളും പ്രവർത്തിക്കുന്നുണ്ട്. ആയിരക്കണക്കിന് വിദ്യാർത്ഥികളാണ് ഇവിടെ പഠിക്കുന്നത്. അബുദാബിയിലെ പേൾ ഹെറിറ്റേജ് സ്കൂളാണ് അദ്ദേഹത്തിന്റെ നേതൃത്വത്തിൽ ഏറ്റവും ഒടുവിൽ ആരംഭിച്ച സ്ഥാപനം.

ഇന്ത്യയിൽ ആഴത്തിലുള്ള വേരുകളുള്ള ഭാരതീയ വിദ്യാഭവന്റെ ഭാഗമാണ് ഭവൻസ് മിഡിൽ ഈസ്റ്റ്. മഹാത്മാഗാന്ധിയുടെ അനുഗ്രഹത്തോടെ, ഭരണഘടനാ നിർമ്മാണ സഭാംഗമായിരുന്ന കെ എം മുൻഷിയാണ് 1938-ൽ ഇത് സ്ഥാപിച്ചത്. ഇന്ത്യയിൽ ഈ ഗ്രൂപ്പിന് കീഴിൽ നൂറുകണക്കിന് സ്കൂളുകൾ പ്രവർത്തിക്കുന്നുണ്ട്.

പ്രൊഫഷൻകൊണ്ട് ബാങ്കറായ അദ്ദേഹം 1969-ലാണ് കുവൈറ്റിലേക്ക് കുടിയേറുന്നത്. തുടർന്ന് 2000-ൽ കുവൈറ്റിൽ ഭാരതീയ വിദ്യാഭവൻ ആരംഭിക്കാനുള്ള ആശയം അദ്ദേഹം മുന്നോട്ടുവെക്കുകയും, 2006-ൽ തന്റെ ആദ്യ സ്കൂളായ ഇന്ത്യൻ എഡ്യൂക്കേഷനൽ സ്കൂൾ (IES – ഭവൻ‌സ് കുവൈറ്റ്) അവിടെ തുറക്കുകയും ചെയ്തു.

കുവൈറ്റിൽ സ്ഥിരതാമസമാക്കിയ ആദ്യ ഇന്ത്യക്കാരന് യുഎഇ ഗോൾഡൻ വിസ ലഭിച്ചത് അദ്ദേഹത്തിനാണ് (2022-ന്റെ തുടക്കത്തിൽ). കുവൈറ്റിന് പുറമെ യുഎഇയിലേക്കും ബഹ്‌റൈനിലേക്കും ഗ്രൂപ്പ് പ്രവർത്തനം വ്യാപിപ്പിച്ചു. 2010 സെപ്റ്റംബറിൽ അബുദാബിയിൽ പ്രൈവറ്റ് ഇന്റർനാഷണൽ ഇംഗ്ലീഷ് സ്കൂൾ (PIES) ആരംഭിച്ചു. ഇത് ഭവൻ‌സ് അബുദാബി എന്നാണ് പൊതുവെ അറിയപ്പെടുന്നത്.

തുടർന്ന് അൽ ഐനിൽ അൽ സാദ് ഇന്ത്യൻ സ്കൂൾ (2014), ബഹ്‌റൈൻ ഇന്ത്യൻ സ്കൂൾ (2015), കുവൈറ്റിലെ സ്മാർട്ട് ഇന്ത്യൻ സ്കൂൾ (2016) എന്നിവയും ആരംഭിച്ചു. അൽ ഐൻ ഭാരതീയ പേൾ വിസ്ഡം സ്കൂൾ (2019), ദുബായ് പേൾ വിസ്ഡം സ്കൂൾ (2020), ഷാർജ ഭാരതീയ പേൾ വിസ്ഡം സ്കൂൾ (2023) എന്നിവയും ഗ്രൂപ്പിന് കീഴിൽ പ്രവർത്തിക്കുന്നുണ്ട്. കൂടാതെ കുവൈറ്റിലെ ഐഇഎസ് പ്രീ-സ്കൂളായ ജാക്ക് ആൻഡ് ജിൽ, അബുദാബിയിലെ പിക്കാഡിലി നഴ്സറി എന്നിവയും ഇതിൽ ഉൾപ്പെടുന്നു.

സുധാ രാമചന്ദ്രനാണ് ഭാര്യ. ദിവ്യ രാജേഷ് രാമചന്ദ്രൻ, സൂരജ് രാമചന്ദ്രൻ എന്നിവരാണ് മക്കൾ. യുഎഇയിൽ ചാർട്ടേഡ് അക്കൗണ്ടന്റായി ആയി ജോലി ചെയ്യുന്ന ഇരുവരും യഥാക്രമം ഭാരതീയ വിദ്യാഭവൻ മിഡിൽ ഈസ്റ്റിന്റെ ഡയറക്ടറും വൈസ് ചെയർമാനുമാണ്.

അദ്ദേഹത്തിന്റെ വിയോഗത്തിൽ ആദരസൂചകമായി ഗ്രൂപ്പിന് കീഴിലുള്ള എല്ലാ സ്കൂളുകളും വ്യാഴാഴ്ച നേരത്തെ അടച്ചു. വിദ്യാർത്ഥികൾ അനുശോചന യോഗങ്ങളിലും പ്രാർത്ഥനകളിലും പങ്കെടുത്തു. യുഎഇ, കുവൈറ്റ്, ബഹ്‌റൈൻ എന്നിവിടങ്ങളിൽ നിന്നുള്ള പ്രിൻസിപ്പൽമാരും മാനേജർമാരും അധ്യാപകരും സംസ്കാര ചടങ്ങുകളിൽ പങ്കെടുക്കാനായി കേരളത്തിലെത്തിയിരുന്നു