ഇന്ധന വില കുത്തനെ ഉയരുന്നു, എണ്ണക്ഷാമം രൂക്ഷം

ബ്രസൽസ്: ആഗോളതലത്തിൽ ക്രൂഡ് ഓയിൽ, ഡീസൽ വില കുത്തനെ ഉയരുന്ന സാഹചര്യത്തിൽ, അടിയന്തര എണ്ണ കരുതൽ ശേഖരം വിപണിയിൽ എത്തിക്കാൻ യൂറോപ്യൻ രാജ്യങ്ങൾക്ക് മേൽ അമേരിക്കയുടെ ശക്തമായ സമ്മർദ്ദം. വാഗ്ദാനം ചെയ്ത എണ്ണ ശേഖരം പൂർണമായി വിപണിയിലെത്തിക്കാൻ യൂറോപ്യൻ രാജ്യങ്ങൾ ഇതുവരെ തയാറായിട്ടില്ലെന്ന് അമേരിക്ക കുറ്റപ്പെടുത്തി.

വിലക്കയറ്റം പിടിച്ചുനിർത്തുന്നതിന്റെ ഭാഗമായി അമേരിക്ക നാല് കോടി ബാരൽ എണ്ണ കൂടി വിപണിയിൽ ഇറക്കുമെന്ന് പ്രഖ്യാപിച്ചിട്ടുണ്ട്. ഇതിന് പിന്നാലെയാണ് യൂറോപ്പിനോടും സമാനമായ നടപടി സ്വീകരിക്കാൻ യുഎസ് ഊർജ സെക്രട്ടറി ക്രിസ് റൈറ്റ് ആവശ്യപ്പെട്ടത്. അമേരിക്കയും ജപ്പാനും തങ്ങളുടെ വാഗ്ദാനങ്ങൾ പാലിക്കുന്നുണ്ടെങ്കിലും, യൂറോപ്യൻ രാജ്യങ്ങൾ തങ്ങൾ വാഗ്ദാനം ചെയ്ത എണ്ണയുടെ ചെറിയൊരു ഭാഗം മാത്രമാണ് ഇതുവരെ വിപണിയിൽ എത്തിച്ചിട്ടുള്ളതെന്ന് അദ്ദേഹം വ്യക്തമാക്കി.

അതേസമയം, നവംബറിലെ മിഡ്‌ടേം തിരഞ്ഞെടുപ്പിന് മുന്നോടിയായി ആഭ്യന്തര ഇന്ധനവില പിടിച്ചുനിർത്തുന്നതിനായി 90 ദിവസത്തെ ഡീസൽ കയറ്റുമതി നിരോധനം അമേരിക്ക പരിഗണിക്കുന്നുണ്ട്. മിഡിൽ ഈസ്റ്റിലെ സംഘർഷങ്ങളും ഹോർമുസ് കടലിടുക്കിലെ ഗതാഗത തടസ്സങ്ങളും ആഗോള വിപണിയിൽ എണ്ണക്ഷാമം രൂക്ഷമാക്കിയിട്ടുണ്ട്. ഡീസൽവില ഗാലന് 7 ഡോളറായി ഉയർന്നിരിക്കുകയാണ്. ബ്രെന്റ് ക്രൂഡ് ഓയിൽ വില ബാരലിന് 97 മുതൽ 102 ഡോളർ വരെയാണ് വ്യാപാരം നടക്കുന്നത്. യുദ്ധത്തിന് മുൻപുള്ള നിരക്കുമായി താരതമ്യം ചെയ്യുമ്പോൾ ബാരലിന് 25 മുതൽ 30 ഡോളറിന്റെ വർധനവാണ് ഉണ്ടായിരിക്കുന്നത്.

അമേരിക്കയുടെ ഡീസൽ കയറ്റുമതി നിരോധനം നടപ്പിലായാൽ അത് യൂറോപ്യൻ ഉപഭോക്താക്കൾക്കും വ്യവസായ മേഖലയ്ക്കും കനത്ത ആഘാതമാകുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. എന്നാൽ പ്രതിസന്ധികളെ നേരിടാൻ യൂറോപ്പ് ജാഗ്രത പാലിക്കണമെന്ന് അയർലൻഡ് ഊർജ മന്ത്രി ഡാരാ ഒബ്രിയൻ വ്യക്തമാക്കി. രാജ്യാന്തര ഊർജ ഏജൻസിയുടെ കണക്കുകൾ പ്രകാരം യൂറോപ്യൻ രാജ്യങ്ങളിൽ ഇപ്പോഴും സുരക്ഷിതമായ അളവിൽ ക്രൂഡ് ഓയിലും പെട്രോളിയം ഉൽപന്നങ്ങളും കരുതൽ ശേഖരമായി ബാക്കിയുണ്ട്.