കാസര്കോട്: മദ്യപിച്ച് വാഹനമോടിച്ച കേസില് യുട്യൂബര് ഹെലന് ഓഫ് സ്പാര്ട്ട എന്നറിയപ്പെടുന്ന എസ് ആര് ധന്യയുടെ ഡ്രൈവിങ് ലൈസന്സ് താല്ക്കാലികമായി റദ്ദാക്കി. മദ്യപിച്ച് അപകടം ഉണ്ടാക്കും വിധം വാഹനമോടിച്ചതിനാണ് നടപടി. മൂന്ന് മാസത്തേക്കാണ് ലൈസന്സ് സസ്പെന്ഡ് ചെയ്തത്. മോട്ടോര് വാഹന വകുപ്പിന്റെ മൂന്നുദിവസത്തെ പരിശീലന ക്ലാസിലും ധന്യ പങ്കെടുക്കണം.
കഴിഞ്ഞ മാസം ദേശീയപാതയില് കാസര്കോട് അണങ്കൂരില്വെച്ചാണ് മദ്യപിച്ച് വാഹനമോടിച്ചതിനു ധന്യയ്ക്കെതിരെ പോലീസ് കേസെടുത്തത്. അപകടകരമായ രീതിയില് ധന്യയുടെ കാര് ദേശീയപാതയില് നിര്ത്തിയിട്ടത് കണ്ടാണ് പോലീസ് പരിശോധനയ്ക്കെത്തിയത്. എന്നാല്, പോലീസ് എത്തിയതോടെ കാര് അമിതവേഗത്തില് ഓടിച്ചുപോയി എന്നാണ് ആരോപണം.
പിന്നീട് മംഗല്പാടി ബന്തിയോട് ഭഗവതി നഗറില്വച്ച് പോലീസ് കാര് പരിശോധിച്ചതോടെ ധന്യ മദ്യപിച്ചിരുന്നതായി കണ്ടെത്തി. തുടര്ന്ന് വാഹനം കസ്റ്റഡിയിലെടുക്കുകയായിരുന്നു. സംഭവത്തിനു പിന്നാലെ താന് ബിയര് കഴിച്ചിരുന്നതായി ധന്യ സമ്മതിച്ചിരുന്നു.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
