ചായ കുടിക്കാൻ പോകുന്നതിനിടെ ആക്രമണം; നഗരമധ്യത്തിൽ കുപ്രസിദ്ധ ഗുണ്ടാനേതാവ് വേട്ടേറ്റു മരിച്ചു

ബെംഗളൂരു: ജെ.പി. നഗറിൽ കുപ്രസിദ്ധ ഗുണ്ടാനേതാവ് രാജ പട്ടാപ്പകൽ വെട്ടേറ്റു മരിച്ചു. കൊലക്കേസിൽ പ്രതിയായ രാജയെ, നഗരമധ്യത്തിൽ വച്ച് വെട്ടിക്കൊലപ്പെടുത്തുകയായിരുന്നു. ക്വട്ടേഷൻ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിനു പിന്നിലെന്ന് പൊലീസ് സംശയിക്കുന്നു.

തെക്കൻ ബെംഗളൂരു കേന്ദ്രീകരിച്ച് നടന്നുവരുന്ന ഗുണ്ടാ പ്രവർത്തനങ്ങളിലെ പ്രധാന കണ്ണിയാണ് കൊല്ലപ്പെട്ട രാജ എന്ന് പൊലീസ് പറഞ്ഞു. ചായ കുടിക്കാനായി റോഡരികിലൂടെ നടന്നുപോവുകയായിരുന്ന രാജയെ നാലംഗ സംഘം വളഞ്ഞിട്ട് ആക്രമിക്കുകയായിരുന്നു.

രാജയെ നടുറോഡിലിട്ട് വെട്ടിക്കൊലപ്പെടുത്തുന്നതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. കൃത്യത്തിന് ശേഷം അക്രമിസംഘം ടാക്സി കാറിൽ കയറി കടന്നുകളയുന്നതും ദൃശ്യങ്ങളിൽ കാണാം. പ്രതികളെ കണ്ടെത്തുന്നതിനായി പോലീസ് പ്രത്യേക അന്വേഷണ സംഘത്തെ നിയോഗിച്ചു.