ജയിൽ മെനു പരിഷ്കരിക്കാൻ വിദഗ്ധ സമിതി;മെനുവിൽ നിന്ന് മട്ടൺ ഒഴിവാക്കിയേക്കും

തടവുകാർക്കുള്ള ഭക്ഷണ മെനു പരിഷ്കരിക്കാൻ വിദഗ്ധ സമിതിയെ നിയോഗിച്ച് സർക്കാർ. തടവുകാർക്ക് സമീകൃത ആഹാരം ഉറപ്പാക്കുന്നതിനുള്ള നിർദേശങ്ങൾ ഉൾപ്പെടുത്തി റിപ്പോർട്ട് സമർപ്പിക്കാനാണ് സമിതിയോട് ആവശ്യപ്പെട്ടിരിക്കുന്നത്. ജയിൽ ഡിജിപി, ഡിഐജിമാർ, ജയിൽ ഡോക്ടർമാർ, ഡയറ്റീഷ്യൻമാർ, സൂപ്രണ്ടുമാർ എന്നിവരടങ്ങുന്നതാണ് സമിതി.

തടവുകാരിൽ ജീവിതശൈലി രോഗങ്ങൾ വർധിക്കുന്നതായി കണ്ടെത്തിയതിനെ തുടർന്നാണ് ഭക്ഷണക്രമത്തിൽ മാറ്റം വരുത്താനുള്ള നീക്കം. നിലവിലെ മെനുവിൽ ഉൾപ്പെട്ടിരുന്ന മട്ടൻ അടക്കമുള്ള ഭക്ഷണങ്ങൾ ഒഴിവാക്കി കൂടുതൽ ആരോഗ്യകരമായ ഭക്ഷണങ്ങൾ ഉൾപ്പെടുത്തുന്നതാണ് പരിഗണന.

മീൻ, സോയ, കൂടുതൽ പച്ചക്കറികൾ എന്നിവ മെനുവിൽ ഉൾപ്പെടുത്തുന്നതും ആലോചനയിലുണ്ട്. തടവുകാരിൽ ഭൂരിഭാഗവും കൃത്യമായ വ്യായാമത്തിൽ ഏർപ്പെടുന്നില്ലെന്ന ജയിൽ വകുപ്പിന്റെ കണ്ടെത്തലും ഭക്ഷണക്രമം പരിഷ്കരിക്കാനുള്ള തീരുമാനത്തിന് പിന്നിലുണ്ട്.

സമീകൃത ആഹാരത്തിന്റെ അളവും ഘടകങ്ങളും സംബന്ധിച്ച് വിശദമായ പരിശോധന നടത്തി പുതിയ ഭക്ഷണപ്പട്ടിക തയ്യാറാക്കും. മട്ടൻ മെനുവിൽ നിന്ന് പൂർണമായും ഒഴിവാക്കാനുള്ള സാധ്യതയും പരിശോധിക്കുന്നുണ്ട്. പരമാവധി വേഗത്തിൽ റിപ്പോർട്ട് സമർപ്പിക്കാനാണ് ആഭ്യന്തരവകുപ്പ് നിർദേശം നൽകിയിരിക്കുന്നത്.

…