എയർ ഇന്ത്യ എക്‌സ്പ്രസ് ക്യാബിൻ ക്രൂവിന് പുതിയ യൂണിഫോം

കൊച്ചി: എയർ ഇന്ത്യ എക്‌സ്പ്രസ് ക്യാബിൻ ക്രൂ, ഫ്രണ്ട് ലൈൻ സ്റ്റാഫ് ഉൾപ്പടെയുള്ള ജീവനക്കാർക്ക് പുതിയ യൂണിഫോം ഏർപ്പെടുത്തി. എയർ ഇന്ത്യ എക്‌സ്പ്രസിന്‍റെ ടെയിൽസ് ഓഫ് ഇന്ത്യ കാമ്പയിന് അനുസൃതമായി ഇന്ത്യയിലെ തനത് വസ്ത്ര നിർമ്മാണ പാരമ്പര്യത്തെയും കരകൗശല വിദ്യകളെയും അടിസ്ഥാനമാക്കിയാണ് പുതിയ ഡിസൈൻ തയ്യാറാക്കിയിരിക്കുന്നത്. എയർ ഇന്ത്യ എക്‌സ്പ്രസിന്‍റെ തന്നെ ഡിസൈനറായ പൂജ കൃഷ്‌ണനാണ് യൂണിഫോം ഡിസൈൻ ചെയ്തത്.

വനിതാ കാബിൻ ക്രൂ, വിമാനത്താവളത്തിലെ സർവീസ് സ്റ്റാഫ്, ഏവിയേഷൻ സെക്യൂരിറ്റി, ഫ്ളൈറ്റ് ഓപ്പറേഷൻസ് വിഭാഗം എന്നിവയിലെ ജീവനക്കാർക്കായുള്ള യൂണിഫോമുകളുടെ രൂപകൽപ്പനയ്ക്കാണ് പൂജ കൃഷ്‌ണൻ നേതൃത്വം നൽകിയത്. ജീവനക്കാരുടെ ആവശ്യങ്ങളും ജോലി സാഹചര്യങ്ങളും അടുത്തറിഞ്ഞുള്ള അനുഭവസമ്പത്തും ഇതിൽ നിർണായകമായി. പുരുഷ കാബിൻ ക്രൂവിനായുള്ള യൂണിഫോം ട്രെന്‍റ് ലിമിറ്റഡുമായി സഹകരിച്ചാണ് ഒരുക്കിയത്. സെപ്റ്റംബർ ഒന്ന് മുതൽ പുതിയ യൂണിഫോം പ്രാബല്യത്തിൽ വന്നു.