കോൺഗ്രസുമായി തെറ്റി; ഡി.എം.കെയെ ചാക്കിലാക്കാൻ ബി.ജെ.പി

ന്യൂഡൽഹി: തമിഴ്നാട്ടിലെ ഡിഎംകെ-കോൺഗ്രസ് സഖ്യത്തിലുണ്ടായ വിള്ളൽ ഡൽഹിയിൽ പുതിയൊരു രാഷ്ട്രീയ ബന്ധത്തിന് വഴിതുറക്കുമോ എന്നാണ് ഇപ്പോൾ രാഷ്ട്രീയ ലോകം ഉറ്റുനോക്കുന്നത്. ഈ സാഹചര്യത്തെ പാർലമെന്റിൽ തങ്ങളുടെ അംഗബലം വർധിപ്പിക്കുന്നതിനായി ഭരണകക്ഷിയായ ബിജെപി ഒരു അവസരമായി കാണുന്നു എന്നാണ് റിപ്പോർട്ടുകൾ സൂചിപ്പിക്കുന്നത്.

പാർലമെന്റിലെ നിർണ്ണായക വോട്ടെടുപ്പുകളിലും വരാനിരിക്കുന്ന രാഷ്ട്രപതി തിരഞ്ഞെടുപ്പിലും ഭൂരിപക്ഷം ഉറപ്പാക്കാൻ ഡി.എം.കെയുടെ പിന്തുണ തേടാനാണ് ബി.ജെ.പി. ഇപ്പോൾ ലക്ഷ്യമിടുന്നത്. മുൻകാലങ്ങളിൽ ബി.ജെ.പി. നയിച്ച മുന്നണിയുടെ ഭാഗമായിരുന്ന ഡി.എം.കെയെ തങ്ങളുടെ പക്ഷത്തേക്ക് അടുപ്പിക്കാൻ ബി.ജെ.പി. ശ്രമം തുടങ്ങിക്കഴിഞ്ഞു.

എന്നാൽ മണ്ഡല പുനർനിർണയം, സനാതന ധർമ്മം തുടങ്ങിയ വിഷയങ്ങളിലെ വിരുദ്ധ നിലപാടുകൾ ഇരുപാർട്ടികളും തമ്മിലുള്ള സഹകരണത്തിന് വലിയ വെല്ലുവിളിയാകാൻ സാധ്യതയുണ്ട്. നിലവിൽ പ്രതിസന്ധിയിലായ എ.ഐ.എ.ഡി.എം.കെയെക്കാൾ ഡി.എം.കെയുമായി അടുക്കുന്നതാണ് ദേശീയ തലത്തിൽ ഗുണകരമെന്നാണ് ബി.ജെ.പിയുടെ കണക്കുകൂട്ടൽ. പ്രതിപക്ഷ ഐക്യത്തിൽ വിള്ളലുണ്ടാക്കുക എന്ന ലക്ഷ്യവും ഈ രാഷ്ട്രീയ നീക്കത്തിന് പിന്നിലുണ്ട്. ദേശീയ പ്രാധാന്യമുള്ള വിഷയങ്ങളിൽ ഡിഎംകെ തങ്ങളുമായി ചേർന്ന് പ്രവർത്തിക്കാനുള്ള സാധ്യതകൾ ബിജെപി പരിശോധിച്ചു തുടങ്ങിയിട്ടുണ്ട്.

തമിഴ്നാട്ടിൽ വിജയ് നയിക്കുന്ന ടിവികെയെ പിന്തുണയ്ക്കാനായി കോൺഗ്രസ് തങ്ങളെ ഉപേക്ഷിച്ചതിനെത്തുടർന്ന്, കോൺഗ്രസിനെ ‘പിന്നിൽ നിന്ന് കുത്തിയവർ’ എന്നാണ് ഡിഎംകെ വിശേഷിപ്പിച്ചത്. സഭയിൽ കോൺഗ്രസ് എം.പിമാർക്കൊപ്പം ഇരിക്കാൻ താൽപ്പര്യമില്ലെന്ന് വ്യക്തമാക്കി ഡി.എം.കെ. പുതിയ ഇരിപ്പിട സൗകര്യം ആവശ്യപ്പെട്ട് ലോക്‌സഭാ സ്പീക്കർക്ക് കത്തെഴുതിയത് ഈ അകൽച്ചയുടെ ആഴം വ്യക്തമാക്കുന്നു

നിയമസഭാ തിരഞ്ഞെടുപ്പിൽ ടിവികെയോട് പരാജയപ്പെട്ടത് ഡി.എം.കെയെ രാഷ്ട്രീയമായി ദുർബലപ്പെടുത്തിയിട്ടുണ്ട്. സംസ്ഥാനത്തും കേന്ദ്രത്തിലും ഒരേസമയം പ്രതിപക്ഷത്ത് തുടരുന്നത് ഒരു പ്രാദേശിക പാർട്ടിക്ക് പ്രയാസകരമായ കാര്യമായതിനാൽ കേന്ദ്ര സർക്കാരുമായി സഹകരിക്കാൻ ഡി.എം.കെ. തയ്യാറായേക്കുമെന്ന് ബി.ജെ.പി. കരുതുന്നു.

മുൻപ് അടൽ ബിഹാരി വാജ്പേയിയുടെ നേതൃത്വത്തിലുള്ള എൻ.ഡി.എ. സഖ്യത്തിന്റെ ഭാഗമായിരുന്നു ഡി.എം.കെ. എന്നത് പഴയ ബന്ധം വീണ്ടും പുതുക്കാനുള്ള പ്രതീക്ഷ ബി.ജെ.പിക്ക് നൽകുന്നു. സഖ്യസാധ്യതകൾ ഉണ്ടെങ്കിലും ചില പ്രധാന വിഷയങ്ങളിൽ ഇരുപാർട്ടികളും തമ്മിൽ വലിയ അഭിപ്രായവ്യത്യാസങ്ങളുണ്ട്. കേന്ദ്ര സർക്കാരിന്റെ മണ്ഡല പുനർനിർണ്ണയ (Delimitation) പദ്ധതിയെ ഡി.എം.കെ. ശക്തമായി എതിർക്കുന്നു. ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യത്തിന് മേലുള്ള കടന്നുകയറ്റമായാണ് ഡി.എം.കെ. ഇതിനെ കാണുന്നത്.

മറ്റൊരു പ്രധാന തടസ്സം സനാതന ധർമ്മത്തെക്കുറിച്ചുള്ള ഡി.എം.കെയുടെ നിലപാടാണ്. ഉദയനിധി സ്റ്റാലിൻ സനാതന ധർമ്മത്തിനെതിരെ നടത്തിയ പരാമർശങ്ങൾ ബി.ജെ.പിയും ഡി.എം.കെയും തമ്മിൽ വലിയ വാഗ്വാദങ്ങൾക്ക് കാരണമായിരുന്നു. ഈ വിഷയങ്ങളിൽ വിട്ടുവീഴ്ച ചെയ്യുന്നത് ഇരുപാർട്ടികൾക്കും പ്രയാസകരമായിരിക്കും.

പാർലമെന്റിൽ നിർണ്ണായകമായ ബില്ലുകൾ പാസാക്കുന്നതിന് ബി.ജെ.പിക്ക് മൂന്നിൽ രണ്ട് ഭൂരിപക്ഷം ആവശ്യമാണ്. നിലവിൽ എൻഡിഎ സഖ്യത്തിന് ഈ ഭൂരിപക്ഷമില്ല. ഡി.എം.കെയുടെ 22 എംപിമാരുടെ പിന്തുണ ലഭിച്ചാൽ അത് ബിജെപിക്ക് വലിയ കരുത്താകും. മണ്ഡല പുനർനിർണ്ണയ ബില്ലിന്മേലുള്ള വോട്ടെടുപ്പ് സമയത്ത് ബി.ജെ.പിക്ക് മൂന്നിൽ രണ്ട് ഭൂരിപക്ഷം തികയ്ക്കാൻ സാധിച്ചിരുന്നില്ല. മൂന്നിൽ രണ്ട് ഭൂരിപക്ഷത്തിന് ആവശ്യമായ 362 എന്ന സംഖ്യയിൽനിന്ന് 70 സീറ്റുകൾ നിലവിൽ എൻ.ഡി.എയ്ക്ക് കുറവാണ്.

ലോകസഭയിലെ ഡി.എം.കെയുടെ 22 എംപിമാർക്ക് ഭാവിയിൽ ഈ മാന്ത്രിക സംഖ്യയിലേക്ക് ബി.ജെ.പിയെ കൂടുതൽ അടുപ്പിക്കാൻ സാധിക്കും. മണ്ഡല പുനർനിർണ്ണയ വോട്ടെടുപ്പ് സമയത്ത് 528 എം.പിമാരാണ് സന്നിഹിതരായിരുന്നത്. മൂന്നിൽ രണ്ട് ഭൂരിപക്ഷത്തിന് 352 വോട്ടുകൾ വേണ്ടിയിരുന്നിടത്ത് എൻഡിഎയ്ക്ക് ലഭിച്ചത് 298 വോട്ടുകൾ മാത്രമായിരുന്നു; അതായത് 54 വോട്ടുകളുടെ കുറവ്.

അന്ന് ഡി.എം.കെയുടെ 22 എംപിമാരും പ്രതിപക്ഷത്തിനൊപ്പമാണ് ബില്ലിനെതിരെ വോട്ട് ചെയ്തത്. എൻ.ഡി.എയിൽ ചേരാതെ തന്നെ വിഷയങ്ങളിൽ അധിഷ്ഠിതമായ പിന്തുണ ഡി.എം.കെയിൽനിന്ന് ബി.ജെ.പി. പ്രതീക്ഷിക്കുന്നുണ്ട്. നവീൻ പട്നായിക്കിന്റെ ബിജു ജനതാദൾ (BJD), ജഗൻ റെഡ്ഡിയുടെ വൈ.എസ്ആർ.സിപി. (YSRCP), കെ. ചന്ദ്രശേഖർ റാവുവിന്റെ ബി.ആർ.എസ്. (BRS) എന്നീ പാർട്ടികളെപ്പോലെ, എൻ.ഡി.എ. സഖ്യത്തിൽ ചേരാതെ തന്നെ വിഷയങ്ങളിൽ അധിഷ്ഠിതമായ പിന്തുണ (Issue-based support) കേന്ദ്രത്തിന് നൽകുന്ന രീതിയിലുള്ള ഒരു ബന്ധമാണ് ഡി.എം.കെയുമായി ബി.ജെ.പി. ആഗ്രഹിക്കുന്നത്.

കൂടാതെ, അടുത്ത വർഷം നടക്കാനിരിക്കുന്ന രാഷ്ട്രപതി തിരഞ്ഞെടുപ്പിലും ഡി.എം.കെയുടെ പിന്തുണ ബിജെപിക്ക് നിർണ്ണായകമാകും. പാർലമെന്റിലെ ചില പ്രത്യേക വിഷയങ്ങളിൽ ഡി.എം.കെയുടെ പിന്തുണ ലഭിക്കുമെന്ന പ്രതീക്ഷയിലാണ് ബി.ജെ.പി. തിരഞ്ഞെടുപ്പ് ഫലങ്ങൾക്ക് പിന്നാലെ സഖ്യകക്ഷിയായ എ.ഐ.എ.ഡി.എം.കെയിൽ ഉണ്ടായ ആഭ്യന്തര കലഹങ്ങളും ബി.ജെ.പിയെ മറ്റ് സാധ്യതകൾ തേടാൻ പ്രേരിപ്പിച്ചിട്ടുണ്ട്. എ.ഐ.എ.ഡി.എം.കെ. പിളർപ്പിന്റെ വക്കിലാണെന്ന് പാർട്ടി വൃത്തങ്ങൾ കരുതുന്നു. ഈ സാഹചര്യത്തിൽ പാർട്ടിയുടെ രണ്ട് വിഭാഗങ്ങൾക്കും തങ്ങളുടെ രാഷ്ട്രീയ നിലനിൽപ്പിനായി ബി.ജെ.പിയുടെ പിന്തുണ ആവശ്യമായി വരും.

സ്റ്റാലിന്റെ പാർട്ടി താൽപര്യം കാണിക്കുകയാണെങ്കിൽ ഡി.എം.കെയുമായി അടുക്കുന്നത് ബി.ജെ.പിക്ക് പ്രയാസകരമാകില്ലെന്ന് വൃത്തങ്ങൾ സൂചിപ്പിക്കുന്നു. പശ്ചിമ ബംഗാളിലും അസമിലും വലിയ വിജയങ്ങൾ നേടിയതോടെ ബി.ജെ.പി. കരുത്താർജ്ജിച്ചെങ്കിലും, പാർലമെന്റിലെ മൂന്നിൽ രണ്ട് ഭൂരിപക്ഷത്തിന്റെ കുറവ് പാർട്ടി തന്ത്രജ്ഞരെ ഇപ്പോഴും അലട്ടുന്നുണ്ട്.

രാഷ്ട്രപതി തിരഞ്ഞെടുപ്പിൽ ഡി.എം.കെയുടെ പിന്തുണ തേടാനുള്ള സാധ്യത ബി.ജെ.പി. പരിശോധിക്കും. ഭരണപക്ഷത്തിന്റെ അംഗബലം വർദ്ധിപ്പിക്കുന്നതിനൊപ്പം, ബി.ജെ.പിയുമായി ഡി.എം.കെ. സഹകരിക്കുന്നത് പ്രതിപക്ഷ നിരയിലെ ഐക്യമില്ലായ്മ കൂടി വെളിപ്പെടുത്തും എന്നത് ബി.ജെ.പിക്ക് ലഭിക്കുന്ന അധിക നേട്ടമായിരിക്കും.