ബാങ്കിന്റെയും ഇഖാമത്തിന്റെയും ഇടയിലെ സമയം കുറക്കാൻ ഉത്തരവിട്ട് സഊദി ഇസ്‌ലാമിക കാര്യ മന്ത്രാലയം

• ദുഹ്ർ, അസർ, മഗ്‌രിബ്, ഇഷാ നമസ്കാരങ്ങൾക്കുള്ള ദൈർഘ്യം 5 മിനിറ്റായി കുറയ്ക്കാനാണ് ഉത്തരവ്

റിയാദ്: മക്കയിലെ ഹറം പള്ളികളിയിലും മറ്റു പുണ്യ സ്ഥലങ്ങളിലെ പള്ളികളിലും ബാങ്കിന്റെയും ഇഖാമത്തിന്റെയും ഇടയിലെ സമയം കുറക്കാൻ സഊദി ഇസ്‌ലാമിക കാര്യ മന്ത്രാലയം ഉത്തരവിട്ടു. ഹജ്ജ് സീസണിൽ അല്ലാഹുവിന്റെഅതിഥികളെ പരിചരിക്കുന്നതിനും, തിരക്ക് കുറയ്ക്കുന്നതിനും, അവർക്ക് വേണ്ട കാര്യങ്ങൾ സുഗമമാക്കുന്നതിനുമുള്ള ഇസ്‌ലാമിക കാര്യ, കോൾ ആൻഡ് ഗൈഡൻസ് മന്ത്രാലയത്തിന്റെ നിരന്തര ശ്രമങ്ങളുടെ ഭാഗമായാണ് തീരുമാനം. തീർത്ഥാടകർ പതിവായി സന്ദർശിക്കുന്ന എല്ലാ പള്ളികളിലും പ്രാർത്ഥനാ ഹാളുകളിലും ബാങ്ക് മുതൽ ഇഖാമത് വരെയുള്ള കാത്തിരിപ്പ് സമയം കുറയ്ക്കുന്നതിന് പള്ളികളിലെയും പ്രാർത്ഥനാ ഹാളുകളിലെയും ഇമാമുമാരോടും മുഅദ്ദിനുകളോടും ഊന്നൽ നൽകണമെന്ന് ഇസ്ലാമിക കാര്യ, കോൾ ആൻഡ് ഗൈഡൻസ് മന്ത്രിയും ഹജ്ജ്, ഉംറ, മന്ത്രാലയത്തിന്റെ ജനറൽ സൂപ്പർവൈസറുമായ ഷെയ്ഖ് ഡോ. അബ്ദുൽ ലത്തീഫ് ബിൻ അബ്ദുൽ അസീസ് അൽ ഷെയ്ഖ് മക്ക അൽ-മുക്കർറമ മേഖലയിലെ മന്ത്രാലയത്തിന്റെ ശാഖയോട് നിർദ്ദേശിച്ചു.

നിർദ്ദേശപ്രകാരം, ഫജ്ർ ബാങ്ക് മുതൽ പ്രാർത്ഥന ആരംഭിക്കുന്നത് വരെയുള്ള കാത്തിരിപ്പ് സമയം 15 മിനിറ്റായി നിശ്ചയിച്ചു, അതേസമയം ദുഹ്ർ, അസർ, മഗ്‌രിബ്, ഇഷാ പ്രാർത്ഥനകൾക്കുള്ള സമയം 5 മിനിറ്റായി കുറച്ചു. ജനക്കൂട്ടത്തിന്റെ സാഹചര്യങ്ങൾ കണക്കിലെടുത്ത് വെള്ളിയാഴ്ച ജുമുഅ ഖുതുബയുടേയും പ്രാർത്ഥനയുടെയും ദൈർഘ്യം 15 മിനിറ്റിൽ കൂടരുത് എന്നും നിർദേശം നൽകി.

ഹജ്ജ് സീസണിൽ തീർത്ഥാടകരെ സേവിക്കുന്നതിനായി മന്ത്രാലയം നടപ്പിലാക്കിയ പ്രവർത്തന പദ്ധതിയുടെ ഭാഗമായാണ് നിർദേശം. ദൈവത്തിന്റെ അതിഥികൾക്ക് നൽകുന്ന സേവന സംവിധാനം മെച്ചപ്പെടുത്തുന്നതിനുള്ള രാജ്യത്തിന്റെ വിഷൻ 2030 ന്റെ ലക്ഷ്യങ്ങൾക്ക് അനുസൃതമായും, ഹജ്ജ് സീസണിൽ ഉൾപ്പെട്ടിരിക്കുന്ന വിവിധ മേഖലകൾക്കിടയിൽ സംയോജനം കൈവരിക്കുന്നതിനും തീർഥാടകരെ സേവിക്കുന്ന ബന്ധപ്പെട്ട അധികാരികളുമായി സഹകരിക്കുന്നതിനും ഇമാമുമാരും മുഅദ്ദിനുകളും നിയന്ത്രണങ്ങൾ പാലിക്കേണ്ടതിന്റെയും പ്രാധാന്യവും മന്ത്രാലയം ഊന്നിപ്പറഞ്ഞു.