എഞ്ചിൻ ഓൺ, വാഹനത്തിനുള്ളിൽ കാർബൺ മോണോക്സൈഡ് വിഷബാധ; നാല് പ്രവാസികൾക്ക് ദാരുണാന്ത്യം

• വാഹനത്തിന്റെ എക്‌സ്‌ഹോസ്റ്റിൽ നിന്ന് പുറന്തള്ളുന്ന വിഷവാതകങ്ങൾ ശ്വസിച്ചതിനെ തുടർന്നാണ് ഇവർ ശ്വാസംമുട്ടി മരിച്ചത്

ദുബായ്: ഒമാനിലെ സൗത്ത് അൽ ബത്തിന ഗവർണറേറ്റിലെ അൽ മുസന്നയിൽ വാഹനത്തിനുള്ളിൽ എക്‌സ്‌ഹോസ്റ്റ് പുക ശ്വസിച്ചതിനെ തുടർന്ന് നാല് ഏഷ്യൻ പ്രവാസികൾ കാർബൺ മോണോക്സൈഡ് വിഷബാധയേറ്റ് മരിച്ചതായി റോയൽ ഒമാൻ പോലീസ് വെള്ളിയാഴ്ച അറിയിച്ചു. അൽ മുസന്നയിൽ നാല് പേരെ വാഹനത്തിനുള്ളിൽ മരിച്ച നിലയിൽ കണ്ടെത്തിയതായി റിപ്പോർട്ടിൽ അടിയന്തര സംഘങ്ങൾ ഇവരെ കണ്ടെത്തി വേണ്ട നടപടികൾ സ്വീകരിച്ചതായി പോലീസ് പറഞ്ഞു.

പ്രാഥമിക അന്വേഷണങ്ങൾ പ്രകാരം, അടച്ചിട്ടതോ വായുസഞ്ചാരമില്ലാത്തതോ ആയ അന്തരീക്ഷത്തിൽ എഞ്ചിൻ പ്രവർത്തിക്കുമ്പോൾ വാഹനത്തിന്റെ എക്‌സ്‌ഹോസ്റ്റിൽ നിന്ന് പുറത്തുവരുന്ന വിഷവാതകങ്ങൾ ശ്വസിച്ചതിനെ തുടർന്നാണ് ഇരകൾ ശ്വാസംമുട്ടി മരിച്ചതെന്നാണ് വിവരം. അതേസമയം, പ്രവാസികൾ ഏത് രാജ്യക്കാരാണെന്നു അധികൃതർ വെളിപ്പെടുത്തിയിട്ടില്ല.

എഞ്ചിനുകൾ പ്രവർത്തിക്കുമ്പോൾ വാഹനങ്ങൾക്കുള്ളിൽ ഉറങ്ങുകയോ അടച്ചിട്ട സ്ഥലങ്ങളിൽ വാഹനങ്ങൾ പ്രവർത്തിപ്പിക്കുകയോ ചെയ്യരുതെന്ന് റോയൽ ഒമാൻ പോലീസ് പൊതുജന സുരക്ഷാ മുന്നറിയിപ്പ് നൽകി. പ്രത്യേകിച്ച് ശരിയായ വായുസഞ്ചാരം ഇല്ലാത്ത പ്രദേശങ്ങളിൽ എക്‌സ്‌ഹോസ്റ്റ് ഉദ്‌വമനം പെട്ടെന്ന് മാരകമായ കാർബൺ മോണോക്സൈഡ് വിഷബാധയ്ക്ക് കാരണമാകുമെന്ന് പോലീസ് ഊന്നിപ്പറഞ്ഞു.