ദമാം: സഊദി കിഴക്കൻ പ്രവിശ്യയിലെ റാസ്തനൂറ എണ്ണ ശുദ്ധീകരണ ശാലക്ക് നേരെ ഇന്നും ആക്രമണ ശ്രമമുണ്ടായതായി പ്രതിരോധ മന്ത്രാലയം അറിയിച്ചു. ബുധനാഴ്ച ഉണ്ടായ ഈ ആക്രമണ നീക്കത്തിൽ നാശനഷ്ടങ്ങളൊന്നും സംഭവിച്ചിട്ടില്ലെന്ന് പ്രതിരോധ മന്ത്രാലയ വക്താവ് ബ്രിഗേഡിയർ ജനറൽ തുർക്കി അൽ മാലിക്കി വ്യക്തമാക്കി.
ഡ്രോണ് ഉപയോഗിച്ചാണ് ആക്രമണം നടത്തിയതെന്നും നാശനഷ്ടങ്ങളൊന്നും ഉണ്ടായിട്ടില്ലെന്നും പ്രതിരോധ മന്ത്രാലയ വക്താവ് പറഞ്ഞു. ദൈവാനുഗ്രഹത്താല് ആക്രമണ ശ്രമത്തില് റിഫൈനറിയുടെ സൗകര്യങ്ങള്ക്കും അടിസ്ഥാന സൗകര്യങ്ങള്ക്കും കേടുപാടുകള് സംഭവിച്ചിട്ടില്ലെന്നും ഊര്ജ, പെട്രോളിയം വിതരണങ്ങളെ ബാധിച്ചിട്ടില്ലെന്നും ഊര്ജ മന്ത്രാലയ വൃത്തങ്ങള് വ്യക്തമാക്കി.
മറ്റൊരു സംഭവത്തിൽ, അൽ ഖർജ് ലക്ഷ്യമാക്കി വന്ന രണ്ട് ക്രൂയിസ് മിസൈലുകളും രാജ്യത്തിന്റെ വ്യോമാതിർത്തിയിലേക്ക് കടക്കാൻ ശ്രമിച്ച ഒമ്പത് ഡ്രോണുകളും പ്രതിരോധ സേന തകർത്തു. കിഴക്കൻ മേഖലയിൽ വെച്ച് മറ്റൊരു ഡ്രോണും തകർത്തതായി മന്ത്രാലയം അറിയിച്ചു.
