തിരുവനന്തപുരം: സംസ്ഥാനത്ത് സാമൂഹ്യ സുരക്ഷാ പെൻഷനുകളുടെ വിതരണം നാളെ (ഓഗസ്റ്റ് 19) മുതൽ ആരംഭിക്കുമെന്ന് മുഖ്യമന്ത്രി വി.ഡി. സതീശൻ. പെൻഷൻ വിതരണം മുടങ്ങാതെ ഉറപ്പാക്കുക എന്ന നയത്തിന്റെ ഭാഗമായാണ് നടപടി. സാധാരണമായി മാസത്തിൽ 25-ാം തീയതിയോടെ ആരംഭിക്കുന്ന പെൻഷൻ വിതരണം ഓണം പ്രമാണിച്ചാണ് നേരത്തെയാക്കിയതെന്ന് അദ്ദേഹം അറിയിച്ചു. ഇതിനായി ആകെ 1,105 കോടി രൂപ അനുവദിച്ചു.
സർക്കാർ ജീവനക്കാർക്കും പെൻഷൻകാർക്കുമായി 630.05 കോടി രൂപയുടെ ഓണം ആനുകൂല്യങ്ങളും പ്രഖ്യാപിച്ചിട്ടുണ്ട്. ജീവനക്കാർക്ക് 4,500 രൂപ ബോണസും 20,000 രൂപ ഓണം അഡ്വാൻസും ലഭിക്കും. ബോണസിന് അർഹതയില്ലാത്തവർക്ക് 3,000 രൂപ ഉത്സവബത്തയായി നൽകും. പാർട്ട്ടൈം താത്കാലിക ജീവനക്കാർക്ക് 6,000 രൂപയും അഡ്വാൻസ് ലഭിക്കും.
ആശ വർക്കർമാർക്കും അങ്കണവാടി ജീവനക്കാർക്കും 1,450 രൂപയും സർവീസ് പെൻഷൻകാർക്ക് 1,250 രൂപയും ഉത്സവബത്തയായി അനുവദിച്ചിട്ടുണ്ട്. ഇതിനുപുറമേ പിന്നാക്ക വിഭാഗക്കാരുടെ സ്കോളർഷിപ്പ് കുടിശ്ശിക തീർക്കുന്നതിനായി 310 കോടി രൂപയും അനുവദിച്ചു.
100 പ്രവൃത്തിദിനങ്ങൾ പൂർത്തിയാക്കിയ 3.68 ലക്ഷം തൊഴിലുറപ്പ് തൊഴിലാളി കുടുംബങ്ങൾക്ക് 1,200 രൂപവീതം ഓണം ബത്ത നൽകുന്നതിനായി 44.24 കോടി രൂപ അനുവദിച്ചിട്ടുണ്ടെന്നും മുഖ്യമന്ത്രി അറിയിച്ചു. അയ്യങ്കാളി നഗര തൊഴിലുറപ്പ് പദ്ധതിയിൽ 100 ദിനങ്ങൾ പൂർത്തിയാക്കിയ 70,800 തൊഴിലാളികൾക്കും 1,200 രൂപവീതം ലഭിക്കും. സ്കൂൾ പാചക തൊഴിലാളികളുടെ വർധിപ്പിച്ച വേതനമുൾപ്പെടെ അക്കൗണ്ടുകളിലേക്ക് നേരിട്ടെത്തിക്കാൻ 44 കോടി രൂപയും അനുവദിച്ചിട്ടുണ്ട്.
ഇതുവരെയുള്ള കണക്കുകൾ പ്രകാരം 6,07,650 കിറ്റുകളാണ് വിതരണത്തിനായി സജ്ജമാക്കിയിരിക്കുന്നതെന്നും മുഖ്യമന്ത്രി അറിയിച്ചു. ഇതിൽ 3,06,092 കിറ്റുകൾ ഇതിനോടകം റേഷൻ കടകളിലെത്തിച്ചുകഴിഞ്ഞു. ഓണക്കിറ്റുകൾ നൽകുന്നില്ലെന്ന തരത്തിൽ വ്യാപകമായ പ്രചാരണം നടക്കുന്നുണ്ടെന്നും എന്നാൽ, ആവശ്യമായ 5,93,000 കിറ്റുകളേക്കാൾ കൂടുതൽ സ്റ്റോക്ക് നിലവിലുണ്ടെന്നും അദ്ദേഹം അറിയിച്ചു.
നിലവിൽ 75,885 കാർഡ് ഉടമകൾ കിറ്റുകൾ കൈപ്പറ്റിക്കഴിഞ്ഞു. ഓണാഘോഷങ്ങൾ ആരംഭിച്ച സാഹചര്യത്തിൽ കൃത്യസമയത്തുതന്നെ അർഹരായവരിലേക്ക് കിറ്റുകൾ എത്തിക്കാനുള്ള നടപടികൾ പൂർത്തിയായി വരികയാണെന്നും അദ്ദേഹം വാർത്താസമ്മേളനത്തിൽ പറഞ്ഞു.
എറ്റവും പുതിയ വാർത്തകൾ വാട്സ്ആപ്പിൽ ലഭിക്കാൻ
Join Our WhatsApp Group
