റിയാദ്: യുഎസ് ന്യൂസ് 2025 അനുസരിച്ച് ലോകത്തിലെ ഏറ്റവും ശക്തമായ രാജ്യങ്ങളുടെ പട്ടികയില്‍ സൗദി അറേബ്യ ഒമ്പതാം സ്ഥാനം നിലനിര്‍ത്തി. റാങ്കിങ്ങില്‍ അറബ് ലോകത്ത് ഒന്നാം സ്ഥാനത്താണ് സൗദി അറേബ്യ. യുണൈറ്റഡ് അറബ് എമിറേറ്റ്സ് (യുഎഇ) ആഗോളതലത്തില്‍ 11-ാം സ്ഥാനത്തും അറബ് ലോകത്ത് രണ്ടാം സ്ഥാനത്തുമാണ്.
യുഎസ് ന്യൂസ് വെബ്സൈറ്റ് അനുസരിച്ച്, ലോകത്തെ ഏറ്റവും ശക്തമായ രാജ്യങ്ങള്‍ സ്ഥിരമായി വാര്‍ത്തകളില്‍ നിറഞ്ഞുനില്‍ക്കുകയും, നയരൂപീകരണ വിദഗ്ധരുടെ മനസ്സില്‍ ഇടം നേടുകയും, ആഗോള സാമ്പത്തിക ഘടനയെ രൂപപ്പെടുത്തുകയും ചെയ്യുന്നവയാണ്. അവരുടെ വിദേശ നയങ്ങളും സൈനിക ബജറ്റുകളും സൂക്ഷ്മമായി നിരീക്ഷിക്കപ്പെടുന്നു.
റാങ്കിംഗ് അനുസരിച്ച്, സൗദി അറേബ്യയുടെ പ്രതിശീര്‍ഷ ജിഡിപി 65,880 ഡോളറാണ് (ഏകദേശം 247,000 റിയാല്‍). അതേസമയം, പര്‍ച്ചേസിംഗ് പവര്‍ പാരിറ്റി അടിസ്ഥാനമാക്കിയുള്ള ആഗോള ജിഡിപിയില്‍ സൗദി അറേബ്യയുടെ പങ്ക് ഏകദേശം 1.09% ആണ്.
എണ്ണ ഉത്പാദനം സൗദി അറേബ്യയുടെ സമ്പത്തിന്റെയും ശക്തിയുടെയും ഏറ്റവും പ്രധാനപ്പെട്ട ഉറവിടമായി തുടരുന്നു. 2023 സാമ്പത്തിക വര്‍ഷത്തില്‍, സൗദി അരാംകോ 440.88 ബില്യണ്‍ ഡോളര്‍ വരുമാനം രേഖപ്പെടുത്തി, അതേസമയം ലാഭം 25% കുറഞ്ഞ് 121.3 ബില്യണ്‍ ഡോളറായി.
ലോകത്തിലെ തെളിയിക്കപ്പെട്ട ക്രൂഡ് ഓയില്‍ കരുതല്‍ ശേഖരത്തിന്റെ 17% സൗദി അറേബ്യയുടെ കൈവശമുണ്ട്, ഇത് ഏകദേശം 270 ബില്യണ്‍ ബാരലാണ്. യുണൈറ്റഡ് സ്റ്റേറ്റ്‌സിന്റെ ഏറ്റവും അടുത്ത അറബ് സഖ്യകക്ഷി എന്ന നിലയില്‍, മേഖലയിലെ ഒപെക് രാജ്യങ്ങളില്‍ സൗദി അറേബ്യക്ക് കാര്യമായ സ്വാധീനമുണ്ട്. ടൂറിസ്റ്റുകളെയും നിക്ഷേപകരെയും ആകര്‍ഷിക്കുന്നതിനായി നിയോം പോലുള്ള മെഗാ പ്രോജക്റ്റുകളിലും ടൂറിസത്തിലും രാജ്യം വലിയ തോതില്‍ നിക്ഷേപം നടത്തുന്നുണ്ട്. 2034-ലെ ഫിഫ ലോകകപ്പിന് ആതിഥേയത്വം വഹിക്കാനും സൗദി അറേബ്യ ഒരുങ്ങുന്നു.
