ഇസ്റാഈലിന്റെ തെക്കൻ നഗരമായ ബീർഷെബയിലെ സൈബർസ്പാർക് മേഖലയിൽ ഇറാൻ തൊടുത്ത് വിട്ട മിസൈൽ നേരിട്ട് പതിച്ച് നിരവധി പേർക്ക് പരിക്കേറ്റു. കഴിഞ്ഞ ദിവസംങ്ങളിലേതിന് സമാനമായി അതിരാവിലെ തന്നെയാണ് ഇറാൻ ആക്രമണം.
ബീർഷെബ മുനിസിപ്പാലിറ്റിയും ചാനൽ 12 വാർത്താ സൈറ്റും ആക്രമണം ഒരു ‘നേരിട്ടുള്ള പ്രഹരം’ ആയിരുന്നുവെന്ന് സ്ഥിരീകരിച്ചു. ഇത് വെറും അവശിഷ്ടങ്ങൾ വീണതല്ലെന്നും, മിസൈൽ പ്രതിരോധ സംവിധാനങ്ങൾക്ക് ഇതിനെ തടയാൻ കഴിഞ്ഞില്ലെന്നും ഇസ്റാഈൽ സൈന്യം വ്യക്തമാക്കിയിട്ടുണ്ട്.
ഇസ്റാഈലിന്റെ സൈബർ സുരക്ഷാ സേവനങ്ങൾക്ക് അത്യാധുനിക സേവനങ്ങൾ നൽകുന്ന സൈബർസ്പാർക്ക് മേഖലയിലെ (ഗാവ്-യാം 4) കെട്ടിടത്തെയാണ് ആക്രമണം ലക്ഷ്യമിട്ടത്. മിസൈൽ പതിച്ച സ്ഥലത്ത് നിന്ന് കറുത്ത പുക ഉയരുന്നതിന്റെയും തീ കത്തുന്നതിന്റെയും ചിത്രങ്ങൾ ഇസ്രായേൽ രക്ഷാപ്രവർത്തന വിഭാഗമായ മാഗൻ ഡേവിഡ് അഡോം സാമൂഹിക മാധ്യമങ്ങളിൽ പങ്കുവെച്ചു.
നിരവധി വാഹനങ്ങൾക്ക് തീപിടിച്ചതായും റിപ്പോർട്ടുണ്ട്. ആക്രമണത്തിന് പിന്നാലെ ഇസ്രായേലിന്റെ പല ഭാഗങ്ങളിലും സൈറണുകൾ മുഴങ്ങി. ടെൽ അവീവിലും ജറുസലേമിലും വലിയ സ്ഫോടന ശബ്ദങ്ങൾ കേട്ടതായി റിപ്പോർട്ടുണ്ട്.
ഇസ്റാഈൽ ആംബുലൻസ് സർവീസ് പുറത്തുവിട്ട വിവരമനുസരിച്ച്, ബീർഷെബയിലെ ആക്രമണത്തിൽ 18 പേർക്ക് പരിക്കേറ്റിട്ടുണ്ട്. സംഭവസ്ഥലത്ത് പ്രവർത്തിക്കാൻ രക്ഷാപ്രവർത്തന സേനകൾക്ക് സഹായം നൽകുന്നതിനായി, സംഭവസ്ഥലത്തേക്ക് വരരുതെന്നും ജനങ്ങൾ കൂട്ടം കൂടരുതെന്നും ബീർഷെബ മുനിസിപ്പാലിറ്റി നിവാസികളോട് അഭ്യർത്ഥിച്ചു. ഇസ്റാഈലി വ്യോമപാതക്ക് ഇപ്പോൾ പ്രതിരോധ ശേഷിയില്ലെന്നും സുരക്ഷിതമായ ഒരു സ്ഥലവും അവശേഷിക്കുന്നില്ലെന്നും ഇറാൻ പ്രഖ്യാപിച്ചു.
അതേസമയം, ഇറാനിയൻ സൈനിക ഇന്റലിജൻസ് കമാൻഡ് ആസ്ഥാനമായിരുന്നു തങ്ങളുടെ പ്രധാന ലക്ഷ്യമെന്ന് ഇറാനിയൻ മാധ്യമമായ ഐആർഎൻഎ നേരത്തെ അവകാശപ്പെട്ടിരുന്നു. സോറോക്ക ആശുപത്രിക്ക് സമീപമാണ് ഈ സ്ഥാപനം സ്ഥിതിചെയ്യുന്നതെന്നും, ആശുപത്രിക്ക് നേരിയ ആഘാതം മാത്രമാണ് ഏറ്റതെന്നും അവർ പറഞ്ഞിരുന്നു.
ഈ നേരിട്ടുള്ള ആക്രമണം ഇസ്റാഈലിന് കനത്ത ആഘാതമായി. സൈനിക പ്രാധാന്യമുള്ള ലക്ഷ്യങ്ങൾ തകർക്കാനുള്ള ഇറാന്റെ ശ്രമങ്ങളും, അതിന് പ്രതിരോധിക്കാനാവാതെ വന്ന ഇസ്റാഈലിന്റെ വെല്ലുവിളികളും ഇനി വരുന്ന ദിവസങ്ങളിൽ നിർണായകമായേക്കും. ഇന്ന് രാവിലെ നടന്ന ആക്രമണവീഡിയോ 👇
