മൃതദേഹനടപടികൾ പാതിവഴിയിൽ
ദമാം: സഊദിയിലെ ദമാമിൽ ഹൃദയാഘാതം മൂലം മരിച്ച പ്രവാസി മലയാളിയുടെ പാസ്പോർട്ട് കണ്ടെത്താൻ സഹായം അഭ്യർഥിച്ച് സാമൂഹിക പ്രവർത്തകൻ. കാൽ നൂറ്റാണ്ടിലേറെ പ്രവാസിയായിരുന്ന പട്ടാമ്പി, ഞങ്ങാട്ടിരി സ്വദേശി പടിങ്ങാരേതിൽ ഹൗസിൽ സുബ്രമണ്യന്റെ (66) പാസ്പോർട്ട് ആണ് ലഭിക്കതെയിരിക്കുന്നത്. ഇദ്ദേഹം അവസാനമായി താമസിച്ച സ്ഥലം ആർക്കും വ്യക്തമല്ല എന്നതാണ് ഇത് കണ്ടെത്താൻ വിലങ്ങുതടിയായിരിക്കുന്നത്.
വാർത്തകളും ജോബ് വേക്കൻസികളും വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
ഇതോടെ മൃതദേഹവുമായി ബന്ധപ്പെട്ട നടപടികൾ പൂർത്തീകരിക്കാൻ കഴിയുന്നില്ല. ഇതേ തുടർന്നാണ് ദമാമിലെ സാമൂഹ്യ പ്രവർത്തകനായ നാസ് വക്കം പാസ്സ്പോർട്ട് കണ്ടെത്താനായി സഹായം തേടിയിരിക്കുന്നത്. കഴിഞ്ഞ വെള്ളിയാഴ്ച നെഞ്ചുവേദന അനുഭവപ്പെട്ടതിനെ തുടർന്ന് ദമാമിലെ സ്വകാര്യ ആശുപത്രിയിൽ ചികിത്സ തേടിയെത്തിയെങ്കിലും നില വഷളായി സുബ്രമണ്യൻ മരിക്കുകയായിരുന്നു. മൃതദേഹം നാട്ടിലെത്തിക്കുന്നതിനുള്ള എക്സിറ്റ് നടപടികൾക്കായി പാസ്പോർട്ടിനെക്കുറിച്ച് അന്വേഷിച്ചപ്പോഴാണ് പാസ്പോർട്ട് കണ്ടെത്താൻ കഴിയാതെ ആയത്.
പാസ്പോർട്ട് അദ്ദേഹത്തിന്റെ കൈവശമുണ്ടെന്നും താമസസ്ഥലത്ത് സൂക്ഷിക്കുന്നുവെന്നുമായിരുന്നു പ്രാഥമിക വിവരം ലഭിച്ചത്. എന്നാൽ സുഹൃത്തുക്കൾക്കോ കമ്പനി അധികൃതർക്കോ സുബ്രമണ്യന്റെ നിലവിലെ താമസസ്ഥലം വ്യക്തമായി അറിയുമായിരുന്നില്ല. ഇതോടെ, പാസ്പോർട്ട് കണ്ടെത്താൻ കഴിയാത്തത് നിയമനടപടികൾ പൂർത്തീകരിക്കുന്നതിന് തടസ്സമായിരിക്കുകയാണ്. പുതിയ ജോലിയിൽ പ്രവേശിച്ചതിനെ തുടർന്ന് ദമാമിൽ തന്നെ മറ്റൊരിടത്തേക്ക് സുബ്രമണ്യൻ ഇതിനിടെ താമസം മാറിയിരുന്നുവെങ്കിലും ആർക്കും പുതിയ താമസയിടത്തെക്കുറിച്ച് ധാരണയില്ല.
നിയമനടപടികൾ പൂർത്തീകരിക്കാൻ ഇടപെട്ട ലോകകേരളാസഭാംഗവും ജീവകാരുണ്യ പ്രവർത്തകനുമായ നാസ് വക്കത്തിന്റെ നേതൃത്വത്തിൽ സാധ്യമായ വിധം ദമാമിലെങ്ങും മലയാളികൾക്കിടയിൽ അന്വേഷിച്ച് താമസ സ്ഥലം കണ്ടെത്താൻ ശ്രമം നടന്നു വരികയാണ്. സുബ്രഹ്മണ്യന്റെ പാസ്പോർട്ട് വീണ്ടെടുക്കുന്നതിനായി താമസസ്ഥലത്തെക്കുറിച്ച് അറിയുന്നവർ ബന്ധപ്പെടണമെന്ന് നാസ് വക്കം അഭ്യർഥിച്ചു. ഫോൺ: +966 56 995 6848.
ഭാര്യ: സുമ സുബ്രഹ്മണ്യൻ, മക്കൾ: പി. സുദേവ്, പി. നീന. സഊദിയിലെ വിവിധ കമ്പനികളിൽ ജോലി ചെയ്തിരുന്ന സുബ്രമണ്യൻ ഏതാനും മാസം മുൻപാണ് ദമാമിലെ പുതിയ സ്ഥാപനത്തിൽ ജോലിക്ക് പ്രവേശിച്ചത്.
വാർത്തകളും ജോബ് വേക്കൻസികളും വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
