റിയാദ്: രാജ്യത്ത് കൊറോണ കേസുകളുടെ എണ്ണം കുറയുന്നതായി ആരോഗ്യ മന്ത്രാലയത്തിന്റെ വക്താവ് ഡോ. മുഹമ്മദ് അബ്ദുൽ ആലി. രാജ്യത്ത് കൊറോണ വൈറസ് മഹാമാരിയുടെ പുതിയ സംഭവവികാസങ്ങൾ അവലോകനം ചെയ്യുകയായിരുന്നു അദ്ദേഹം. ഗുരുതരമായ കേസുകളുടെ എണ്ണം മഹാമാരിയുടെ ആദ്യ ഘട്ടങ്ങളേക്കാൾ വളരെ കുറവാണെന്നും ഇത് വാക്സിനുകളുടെ ഫലപ്രാപ്തിയെ സൂചിപ്പിക്കുന്നുവെന്നും അദ്ദേഹം പറഞ്ഞു. വാക്സിനേഷനും ബൂസ്റ്റർ ഡോസുകളിലെ കുത്തിവെപ്പും ഉറപ്പാക്കണമെന്നും അദ്ദേഹം ആവശ്യപ്പെട്ടു.
രണ്ടു ഡോസ് വാക്സിൻ സ്വീകരിച്ചവർ കൊവിഡ് രോഗിയുമായി സമ്പർക്കം പുലർത്തിയ ശേഷം രോഗലക്ഷണങ്ങളൊന്നും പ്രത്യക്ഷപ്പെട്ടിട്ടില്ലെങ്കിൽ ക്വാറന്റൈൻ പാലിക്കുകയോ പരിശോധന നടത്തുകയോ വേണ്ടതില്ല. വാക്സിൻ സ്വീകരിക്കാത്തവർ കൊറോണ രോഗികളുമായി സമ്പർക്കം പുലർത്തിയാലാണ് നിർബന്ധമായും ക്വാറന്റൈൻ പാലിക്കേണ്ടത്. ഇവർ സമ്പർക്കം പുലർത്തി നാലാമത്തെയോ അഞ്ചാമത്തെയോ ദിവസത്തിനു ശേഷം പരിശോധന നടത്തണം. ആരോഗ്യ ലക്ഷണങ്ങളോ അസുഖങ്ങളോ ഉള്ളവരെയാണ് “തത്വമൻ” ക്ലിനിക്കുകൾ സേവിക്കുന്നത്. പ്രാഥമിക ലബോറട്ടറി പരിശോധനകൾക്കുള്ളതല്ലെന്നും അദ്ദേഹം പറഞ്ഞു.
ബൂസ്റ്റർ ഡോസ് സംബന്ധിച്ച ഒരു ചോദ്യത്തിന് മറുപടിയായി, രണ്ട് ഡോസ് വാക്സിൻ എടുത്തവർക്ക് കൊറോണ ബാധിച്ചാൽ സുഖം പ്രാപിച്ചാലുടൻ ബൂസ്റ്റർ ഡോസ് ലഭിക്കുമെന്ന് ആരോഗ്യ മന്ത്രാലയ വക്താവ് പറഞ്ഞു.
