അബൂദബി: കേരളത്തിൽനിന്ന് അബൂദബിയിലേക്ക് ശനിയാഴ്ച മുതൽ വിമാന സർവീസ് ആരംഭിച്ചെങ്കിലും വിമാന നിരക്കുകൾ താങ്ങാവുന്നതിലുമപ്പുറം. വരും ദിവസങ്ങളിൽ ഇത്സാ വീണ്ടും വർധിക്കുമെന്നാണ് കണക്ക് കൂട്ടൽ. നിലവിൽ സാധാരണക്കാരായ പ്രവാസികൾക്ക് താങ്ങാവുന്നതിനപ്പുറമാണ് വിമാന നിരക്കുകൾ. പല സെക്ടറുകളിലും വിമാന നിരക്ക് പല മടങ് വർധനവാണ് ഉണ്ടായിരിക്കുന്നത്.
കൊച്ചി-അബുദാബി സെക്റ്ററിൽ ഈ മാസം 12 മുതൽ 30 വരെ 67,518 രൂപ മുതൽ 70675 രൂപവരെയാണ് ഇത്തിഹാദ് എയർവേസ് വിമാനം നിരക്ക്. ഇതേ സെക്റ്ററിൽ എയർ ഇന്ത്യ എക്സ്പ്രസ് വിമാനം ഈ 15,23,26 തീയതികളിൽ വൺവേ ടിക്കറ്റ് നിരക്ക് 59,065 രൂപയും 18ന് 48,040 രൂപയും 20നു 43,840 രൂപയുമാണ്. തിരുവനന്തപുരം-അബുദാബി സെക്ടറിൽ 10നു ചൊവ്വാഴ്ച 79,197 രൂപക്കും 13ന് 80,373 രൂപക്കും ടിക്കറ്റുണ്ട്. 20, 22, 29 തീയതികളിൽ 83,523 രൂപയും 24നു 82,347 രൂപയുമാണ് നിരക്ക്.
കോഴിക്കോട്-അബുദാബി സെക്ടറിൽ 45,820 രൂപയാണ് നിരക്ക്. 17 മുതൽ 42,145 ആയും 23 മുതൽ 38,995 രൂപയായും ടിക്കറ്റ് ചാർജ് കുറയും. കണ്ണൂർ – അബൂദബി നിരക്കും ഏകദേശം സമാനമാണ്. ദുബൈ, ഷാർജ ഉൾപ്പെടെ എമിറേറ്റുകളിലേക്കും കേരളത്തിലെ കൊച്ചി, തിരുവനന്തപുരം, കോഴിക്കോട്, കണ്ണൂർ വിമാനത്താവളങ്ങളിൽനിന്നുള്ള നിരക്ക് കൂടുതലാണ്. ഇക്കോണമി നിരക്ക് ഏതു നിമിഷവും വർധിക്കുന്ന സ്ഥിതിയാണ്.
