ലാഹോർ: പാക്കിസ്ഥാനിലെ വടക്കുപടിഞ്ഞാറൻ നഗരമായ പെഷവാറിലെ ഷിയ പള്ളിക്കുള്ളിൽ ശക്തമായ ബോംബ് സ്ഫോടനം. വെള്ളിയാഴ്ച നടന്ന സ്ഫോടനത്തിൽ 30-ലധികം പേർ കൊല്ലപ്പെട്ടതായാണ് റിപ്പോർട്ട്. ഡസൻ പേർക്ക് പരിക്കേൽക്കുകയും ചെയ്തു. ഇവരിൽ പലരും ഗുരുതരാവസ്ഥയിലാണ്.
പെഷവാറിലെ പഴയ നഗരത്തിലെ കുച്ച റിസാൽദാർ മസ്ജിദിൽ വെള്ളിയാഴ്ച പ്രാർത്ഥനയ്ക്കായി വിശ്വാസികൾ ഒത്തുകൂടിയ സമയത്താണ് സ്ഫോടനം നടന്നതെന്ന് പ്രാദേശിക പോലീസ് ഉദ്യോഗസ്ഥൻ വഹീദ് ഖാൻ പറഞ്ഞു. തിരക്കേറിയ ഇടുങ്ങിയ തെരുവുകളിലൂടെ ആംബുലൻസുകൾ കുതിച്ചെത്തി പരിക്കേറ്റവരെ ലേഡി റീഡിംഗ് ഹോസ്പിറ്റലിലേക്ക് കൊണ്ടുപോയി
സായുധരായ രണ്ട് അക്രമികൾ പള്ളിക്ക് പുറത്ത് പോലീസിന് നേരെ വെടിയുതിർത്തതോടെയാണ് അക്രമം ആരംഭിച്ചതെന്ന് പെഷവാർ പോലീസ് മേധാവി മുഹമ്മദ് ഇജാസ് ഖാൻ പറഞ്ഞു. വെടിവെപ്പിൽ ഒരു അക്രമിയും ഒരു പോലീസുകാരനും കൊല്ലപ്പെടുകയും മറ്റൊരു പോലീസ് ഉദ്യോഗസ്ഥന് പരിക്കേൽക്കുകയും ചെയ്തു. ബാക്കിയുള്ള അക്രമി പിന്നീട് പള്ളിക്കകത്ത് ബോംബ് സ്ഫോടനം നടത്തി. സ്ഫോടനം നടക്കുമ്പോൾ 150 ആരാധകർ പള്ളിക്കുള്ളിൽ ഉണ്ടായിരുന്നതായി ദൃക്സാക്ഷികൾ പറഞ്ഞു.
സ്ഫോടനത്തിന്റെ ഉത്തരവാദിത്തം ആരും ഏറ്റെടുത്തില്ല, എന്നാൽ അയൽരാജ്യമായ അഫ്ഗാനിസ്ഥാന്റെ അതിർത്തിക്കടുത്തുള്ള പ്രദേശത്ത് ഐഎസും അക്രമാസക്തമായ ഒരു പാക്കിസ്ഥാൻ താലിബാൻ സംഘടനയും സമാനമായ ആക്രമണങ്ങൾ നടത്തിയിട്ടുണ്ട്. “ഞാൻ എന്റെ കണ്ണുകൾ തുറന്നു, എല്ലായിടത്തും പൊടിയും ശരീരവും ഉണ്ടായിരുന്നുവെന്ന് പള്ളിയിൽ പ്രവേശിക്കാൻ തയ്യാറെടുക്കുന്നതിനിടെ ശക്തമായ സ്ഫോടനം തെരുവിലേക്ക് തെറിച്ചുവീണ സാക്ഷിയായ ഷയാൻ ഹൈദർ പറഞ്ഞു. സ്ഫോടനത്തെ പ്രധാനമന്ത്രി ഇമ്രാൻ ഖാൻ അപലപിച്ചു.
