ജിദ്ദ: സഊദി അറേബ്യ ട്രാഫിക് നിയമത്തിൽ ശക്തമായ ശിക്ഷകളുമായി പുതിയ ഭേദഗതികൾ വരുത്തി. അപകടപ്പെടുത്തുന്ന രീതിയിലുള്ള ഗതാഗത നിയമലംഘനങ്ങൾ നടത്തുന്നവർക്ക് സഊദി അറേബ്യയിൽ ഇനി മുതൽ കടുത്ത ശിക്ഷയാകും ലഭിക്കുക. നിയമലംഘകർക്ക് ഒരു വർഷം വരെ തടവും വിദേശികൾക്ക് നാടുകടത്തലും ഉൾപ്പെടെയുള്ള നടപടികൾ സ്വീകരിക്കാൻ വ്യവസ്ഥ ചെയ്യുന്ന ഗതാഗത നിയമത്തിലെ ചട്ടം 74 ഭേദഗതി ചെയ്യാൻ സഊദി മന്ത്രിസഭ അംഗീകാരം നൽകിയതായി ഉകാസ് അറബിക് ദിനപത്രത്തിന്റെ റിപ്പോർട്ട്.
നാടുകടത്തലിന് അനുശാസിക്കുന്ന നിലക്ക് ഗതാഗത നിയമത്തില്‍ വരുത്തിയ പുതിയ ഭേദഗതികള്‍ക്കാണ് സഊദിയിലെ ബന്ധപ്പെട്ട വകുപ്പുകള്‍ അംഗീകാരം നല്‍കിയത്. ഭേദഗതികൾ പ്രകാരം, പൊതുജന സുരക്ഷയെ അപകടപ്പെടുത്തുന്ന ഗുരുതരമായ ഡ്രൈവിംഗ് കുറ്റകൃത്യങ്ങൾക്ക് ശിക്ഷിക്കപ്പെടുന്ന വിദേശികൾക്ക് നാടുകടത്തൽ ശിക്ഷ നിർബന്ധമാക്കും.
ഈ ഭേദഗതികൾ പ്രകാരം, പൊതുജന സുരക്ഷയെ ഭീഷണിയിലാക്കുന്ന ട്രാഫിക് ലംഘനങ്ങൾക്ക് കോടതി ശിക്ഷ നൽകുന്ന ഏതൊരു വിദേശിയെയും രാജ്യത്ത് നിന്ന് നാടുകടത്തും. കൂടാതെ, ഇവർക്ക് സഊദി അറേബ്യയിലേക്ക് വീണ്ടും പ്രവേശിക്കുന്നതിന് ശാശ്വത വിലക്ക് ഏർപ്പെടുത്തുകയും ചെയ്യും.
ആഭ്യന്തര മന്ത്രാലയം, വിദേശകാര്യ മന്ത്രാലയം, നീതിന്യായ മന്ത്രാലയം, പബ്ലിക് പ്രോസിക്യൂഷൻ എന്നിവയുടെ ഏകോപനത്തോടെ രൂപപ്പെടുത്തിയ ഈ നിയമങ്ങൾ, കുറ്റകൃത്യങ്ങൾ ആവർത്തിക്കുന്നവർക്കെതിരെ കർശനമായ ശിക്ഷകൾ വ്യവസ്ഥ ചെയ്യുന്നു.
ഗുരുതരായ ഗതാഗത നിയമ ലംഘനം ഒരു വര്‍ഷത്തിനുള്ളില്‍ ആവര്‍ത്തിക്കുന്നവര്‍ക്ക് പരമാവധി പിഴ ലഭിക്കും. ഒരു വര്‍ഷത്തിനുള്ളില്‍ മൂന്നാമതും ഇതേ നിയമ ലംഘനം നടത്തുന്നവര്‍ക്കെതിരായ കേസ് പ്രത്യേക കോടതിക്ക് കൈമാറും. ഇത്തരം കേസുകളില്‍ ഒരു വര്‍ഷം വരെ തടവ് ശിക്ഷയോ ഇരട്ടി പിഴകയോ ലഭിക്കും. പൊതുസുരക്ഷയെ അപകടപ്പെടുത്തുന്നതായി കണക്കാക്കുന്ന നിയമ ലംഘനങ്ങളെ ഭേദഗതി ചെയ്ത നിയമം വ്യക്തമായി നിര്‍വചിക്കുകയും കോടതിയിലേക്ക് റഫര്‍ ചെയ്യാനുള്ള നടപടിക്രമങ്ങള്‍ വ്യക്തമാക്കുകയും ചെയ്യുന്നുണ്ടെന്ന് അധികൃതര്‍ പറഞ്ഞു.
മദ്യപിച്ചോ, മയക്കുമരുന്ന് ഉപയോഗിച്ചോ വാഹനമോടിക്കല്‍, റെഡ് സിഗ്നല്‍ കട്ട് ചെയ്യല്‍, എതിര്‍ദിശയില്‍ വാഹനമോടിക്കല്‍, മെയിന്‍ റോഡുകളില്‍ വാഹനങ്ങള്‍ക്കിടയിലൂടെ വേഗത്തില്‍ വെട്ടിച്ച് കയറല്‍, മണിക്കൂറില്‍ ഇരുപത്തിയഞ്ച് കിലോമീറ്ററില്‍ കൂടുതല്‍ വേഗപരിധി കവിയല്‍, വളവുകള്‍, കുന്നുകള്‍ തുടങ്ങിയ ഓവര്‍ടേക്ക് ചെയ്യുന്നത് നിരോധിച്ചിരിക്കുന്ന പ്രദേശങ്ങളില്‍ ഓവര്‍ടേക്ക് ചെയ്യല്‍ എന്നിവ പൊതുസുരക്ഷയെ ബാധിക്കുന്ന ഏറ്റവും പ്രധാനപ്പെട്ട ഗതാഗത ലംഘനങ്ങളാണ്.
