അബുദാബി: ലോകത്തിലെ ഏറ്റവും സുരക്ഷിത വിമാനക്കമ്പനിയായി യുഎഇയുടെ ദേശീയ വിമാനക്കമ്പനിയായ എത്തിഹാദ് എയർവേയ്സ്. വ്യോമയാന സുരക്ഷാ റേറ്റിംഗ് വെബ്സൈറ്റായ എയർലൈൻറേറ്റിംഗ്സ്.കോം പുറത്തുവിട്ട 2026ലെ പട്ടികയിലാണ് എത്തിഹാദ് ഒന്നാം സ്ഥാനം കരസ്ഥമാക്കിയത്. ഗൾഫ് മേഖലയിൽ നിന്നുള്ള ഒരു വിമാനക്കമ്പനി ഈ നേട്ടം കൈവരിക്കുന്നത് ചരിത്രത്തിലാദ്യമായാണ്.
അത്യാധുനികമായ സുരക്ഷാ സംവിധാനങ്ങളാണ് എത്തിഹാദ് എയർവേയ്സിനെ ഈ നേട്ടത്തിന് അർഹരാക്കിയത്. പ്രധാന ഘടകങ്ങൾ ഇവയാണ്:
വിമാനയാത്രയ്ക്കിടയിലുണ്ടാകുന്ന ആകാശച്ചുഴികളെയും കാറ്റുകളെയും ഫലപ്രദമായി നേരിടാനുള്ള അത്യാധുനിക സാങ്കേതികവിദ്യകൾ എത്തിഹാദ് നടപ്പിലാക്കിയിട്ടുണ്ട്. IATA-യുടെ ‘ടർബുലൻസ് അവയർ’ പ്രോഗ്രാമിൽ പങ്കാളികളായ എത്തിഹാദ് തത്സമയ വിവരങ്ങൾ ഉപയോഗിച്ചാണ് സുരക്ഷിതമായ പാത തെരഞ്ഞെടുക്കുന്നത്.
പ്രവർത്തനമാരംഭിച്ചത് മുതൽ ഇന്നുവരെ വിമാനാപകടങ്ങളില്ലാത്ത മികച്ച റെക്കോർഡ് എത്തിഹാദിനുണ്ട്. വിമാനങ്ങളുടെ കുറഞ്ഞ പ്രായവും അത്യാധുനിക കോക്പിറ്റ് സാങ്കേതികവിദ്യയും ഇതിന് സഹായകരമാകുന്നു.
സുരക്ഷാ പ്രോട്ടോക്കോളുകളിലും വിമാനത്തിലെ ജീവനക്കാരുടെ പരിശീലനത്തിലും എത്തിഹാദ് പുലർത്തുന്ന വിട്ടുവീഴ്ചയില്ലാത്ത നിലപാടുകൾ ആഗോളതലത്തിൽ അംഗീകരിക്കപ്പെട്ടതാണ്.
