അബുദാബി: യുഎഇയിൽ ഡിസംബർ 19 വരെ കാലാവസ്ഥാപരമായ അസ്ഥിരത തുടരുന്ന സാഹചര്യത്തിൽ പൊതുജനങ്ങൾ സുരക്ഷാ മാർഗനിർദേശങ്ങൾ കർശനമായി പാലിക്കണമെന്ന് ആഭ്യന്തര മന്ത്രാലയം ആവശ്യപ്പെട്ടു.
ശക്തമായ കാറ്റിനും മഴയ്ക്കും ഇടിമിന്നലിനും ആലിപ്പഴ വർഷത്തിനും സാധ്യതയുണ്ടെന്ന് ഇന്ന് (ഞായർ) പുറത്തിറക്കിയ പ്രസ്താവനയിൽ മന്ത്രാലയം മുന്നറിയിപ്പ് നൽകി. ശക്തമായ മേഘാവൃതമായ അന്തരീക്ഷത്തിൽ പൊടിക്കാറ്റ് കാരണം ചില പ്രദേശങ്ങളിൽ കാഴ്ചാപരിധി കുറയാനും സാധ്യതയുണ്ട്.
വാഹനം ഓടിക്കുമ്പോൾ വേഗം കുറയ്ക്കുകയും കൂടുതൽ ജാഗ്രത പാലിക്കുകയും വേണം. വെള്ളക്കെട്ടിന് സാധ്യതയുള്ള താഴ്വാര പ്രദേശങ്ങളും വാദികളും ഒഴിവാക്കണം. അസ്ഥിര കാലാവസ്ഥ നിലനിൽക്കുന്ന ഈ സമയത്ത് ബീച്ചുകളിൽ പോകുകയോ കടലിൽ ഇറങ്ങുകയോ ചെയ്യരുതെന്നും നിർദേശിച്ചു. ഈ പ്രതിരോധ നടപടികൾ പൊതു സുരക്ഷ ഉറപ്പാക്കുന്നതിന് നിർണായകമാണ്. ഔദ്യോഗിക മാർഗനിർദ്ദേശങ്ങൾ പാലിക്കുന്നത് സമൂഹത്തിന്റെ സുരക്ഷയും ക്ഷേമവും നിലനിർത്താനുള്ള വലിയ ലക്ഷ്യത്തെ പിന്തുണയ്ക്കുന്നു.
ചെങ്കടലിൽ നിന്ന് വ്യാപിച്ചുകിടക്കുന്ന ന്യൂനമർദ്ദമാണ് നിലവിലെ കാലാവസ്ഥാ മാറ്റത്തിന് കാരണം. ഇത് ഈർപ്പമുള്ള തെക്കുകിഴക്കൻ കാറ്റുമായി കൂടിച്ചേർന്ന് അസ്ഥിരമായ കാലാവസ്ഥയ്ക്ക് വഴിയൊരുക്കുന്നു. ശനി മുതൽ തിങ്കൾ വരെ രാജ്യത്ത് ഭാഗികമായി അല്ലെങ്കിൽ കൂടുതലും മേഘാവൃതമായിരിക്കും.
തീരപ്രദേശങ്ങളിലും ദ്വീപുകളിലും വടക്കൻ പ്രദേശങ്ങളിലും ഒറ്റപ്പെട്ട മഴയ്ക്ക് സാധ്യതയുണ്ട്. എന്നാൽ ചൊവ്വാഴ്ച മുതൽ അന്തരീക്ഷ അസ്ഥിരത ശക്തിപ്പെടാൻ സാധ്യതയുണ്ടെന്നും ഇടി, മിന്നൽ, ചില പ്രദേശങ്ങളിൽ ആലിപ്പഴം വീഴ്ച എന്നിവയോടുകൂടിയ കനത്ത മഴയ്ക്ക് സാധ്യതയുണ്ടെന്നും കാലാവസ്ഥാ പ്രവചനത്തിൽ പറയുന്നു. കാറ്റ് വടക്കുപടിഞ്ഞാറൻ ദിശയിലേക്ക് മാറുമ്പോൾ വേഗം മണിക്കൂറിൽ 50 കിലോമീറ്റർ വരെ ആകാൻ സാധ്യതയുണ്ട്. ഇത് പൊടിക്കാറ്റിനും കാഴ്ചാപരിധി കുറയ്ക്കുന്നതിനും ഇടയാക്കും. കടൽ പ്രക്ഷുബ്ധമാകാനും സാധ്യതയുണ്ട്.
