ദുബായ്: യുഎഇയില് നിന്നുമുള്ളവര്ക്ക് കൂടുതല് വിസാ ഇളവുകളുമായി ഇന്ത്യ. കൊച്ചിയും കോഴിക്കോടും അടക്കം മൂന്ന് വിമാനത്താവളങ്ങളില് കൂടി വിസാ ഓണ് അറൈവല് സംവിധാനം പ്രഖ്യാപിച്ചു. ആദ്യമായി ഇന്ത്യയിലെത്തുന്ന യുഎഇ പൗരന്മാര്ക്കും പാകിസ്താനില് വേരുള്ളവര്ക്കും ഈ ആനുകൂല്യം ലഭിക്കില്ലെന്ന് വിദേശകാര്യമന്ത്രാലയം അറിയിച്ചു.
ഡല്ഹി, മുംബൈ, കൊല്ക്കത്ത, ചെന്നൈ, ഹൈദരബാദ്, ബെംഗളൂരു എന്നിങ്ങനെ ഇന്ത്യയിലെ ആറ് വിമാനത്താവളങ്ങളിലാണ് നിലവില് യുഎഇ പൗരന്മാര്ക്ക് വിസാ ഓണ് അറൈവല് അനുവദിച്ചിരുന്നത്. ഇനിമുതല് കൊച്ചി, കോഴിക്കോട്, അഹമ്മദാബാദ് വിമാനത്താവളങ്ങളില് കൂടി യുഎഇ പൗരന്മാര്ക്ക് വിസയില്ലാതെ എത്താം.
വിമാനത്താവളത്തില് നിന്നും വിസ എടുത്തശേഷം രാജ്യത്തെവിടെയും യാത്ര ചെയ്യാം. അതേസമയം, ആദ്യമായി ഇന്ത്യയിലെത്തുന്ന യുഎഇ പൗരന്മാര്ക്ക് വിസ ഓണ് അറൈവല് ലഭിക്കില്ല. മാതാപിതാക്കളോ അവരുടെ പൂര്വികരോ പാകിസ്താന് പൗരന്മാരായിട്ടുള്ള യുഎഇ സ്വദേശികള്ക്കും വിസാ ഓണ് അറൈവല് ലഭ്യമല്ല. സാധാരണ നിലയില് അപേക്ഷ സമര്പ്പിച്ച്, വിസയെടുത്താണ് ഇവര് ഇന്ത്യയില് വരേണ്ടത്.
2000 രൂപയാണ് ഓണ് അറൈവല് വിസയ്ക്കുള്ള ഫീസ്. പാസ്പോര്ട്ടിന് ആറുമാസം കാലാവധി ഉണ്ടായിരിക്കണം. ബിസിനസ്, ടൂറിസം, സമ്മേളനങ്ങള്, ചികിത്സ തുടങ്ങിയവക്കായി വരുന്നവര്ക്കാണ് വിസാ ഓണ് അറൈവല് പ്രധാനമായും ലഭിക്കുക. ഒരു വര്ഷത്തില് എത്ര തവണവേണമെങ്കിലും വിസാ ഓണ് അറൈവല് ലഭിക്കുമെന്നും വിദേശകാര്യമന്ത്രാലയം വ്യക്തമാക്കി.
