കേരളത്തിന്റെ ‘സ്വന്തം’ വിമാനക്കമ്പനികൾ എന്ന പെരുമയോടെ ഉയരുന്ന എയർ കേരളയ്ക്കും എൽ ഹിന്ദ് എയറിനും നിലവിൽ ഉടക്കിട്ട് വിദേശ വിമാന കമ്പനികൾ. വിമാനങ്ങൾ പാട്ടത്തിനു നൽകുന്ന വിദേശ കമ്പനികളുടെ നിലപാടാണ് രണ്ട് വിമാന കമ്പനികൾക്കും ഇപ്പോൾ തിരിച്ചടിയാകുന്നത്.
വാർത്തകളും ജോബ് വേക്കൻസികളും വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
വിമാനം പാട്ടത്തിന് നൽകണമെങ്കിൽ 12 മാസത്തെ വാടക മുൻകൂറായി കെട്ടിവയ്ക്കണമെന്നോ അല്ലെങ്കിൽ 200 കോടി രൂപ ബാങ്ക് ബാലൻസ് കാണിക്കണമെന്നോ ഉള്ള വിദേശ കമ്പനികളുടെ ആവശ്യമാണ് ഇവരെ പ്രതിസന്ധിയിലാക്കുന്നത്. ഈ രണ്ടു വിമാനക്കമ്പനികൾക്ക് പുറമെ ഉത്തർപ്രദേശ് ആസ്ഥാനമായ ശംഖ് എയർ എന്ന പുതിയ കമ്പനിയും പ്രതിസന്ധി നേരിടുകയാണെന്ന് ഒരു ദേശീയ മാധ്യമം റിപ്പോർട്ട് ചെയ്തു.
നിലവിൽ പറക്കൽ അനുമതി നേടുന്ന നടപടിക്രമങ്ങളുടെ മൂന്നാംഘട്ടത്തിലുള്ള എയർ കേരളയ്ക്കും അൽ ഹിന്ദ് എയറും 4-ാം ഘട്ടത്തിലേക്ക് കടക്കണമെങ്കിൽ സ്വന്തമായി ഒരു വിമാനമെങ്കിലും ഉണ്ടെന്ന് കാണിക്കണം. അല്ലെങ്കിൽ ഡിജിസിഎയിൽ നിന്ന് പറക്കൽ അനുമതി അഥവാ ‘എയർ ഓപ്പറേറ്റർ സർട്ടിഫിക്കറ്റ്’ (എഒസി) ലഭിക്കില്ല. അൽ ഹിന്ദ് എയറിനും എയർ കേരളയ്ക്കും 2024ൽ തന്നെ കേന്ദ്രസർക്കാരിൽ നിന്ന് അനുപതിപത്രം (എൻഒസി) ലഭിച്ചിരുന്നു. 2025 ജൂണോടെ പ്രവർത്തനം തുടങ്ങാമെന്ന പ്രതീക്ഷയിലായിരുന്നു ഇരു കമ്പനികളും. എയർ കേരളയ്ക്ക് കഴിഞ്ഞ മേയിൽ ഇന്റർനാഷണൽ എയർ ട്രാൻസ്പോർട് അസോസിയേഷനിൽ (അയാട്ട) നിന്ന് വിമാന സർവീസിനുള്ള എയർലൈൻ കോഡും ലഭിച്ചിരുന്നു. കെഡി (KD) എന്ന കോഡാണ് ലഭിച്ചത്.
ജൂണിൽ എയർ ഓപ്പറേറ്റർ സർട്ടിഫിക്കറ്റ് ലഭിക്കുമെന്നാണ് കരുതിയതെങ്കിലും ഇപ്പോഴും വൈകുകയാണ്. കേരളത്തിലെ വിമാനത്താവളങ്ങൾ കേന്ദ്രീകരിച്ച് തുടക്കത്തിൽ സർവീസ് നടത്തുകയും അടുത്തവർഷത്തോടെ ഗൾഫ് മേഖലയിലേക്കും മറ്റും വിദേശ സർവീസുകളും ആരംഭിക്കുകയുമായിരുന്നു എയർ കേരള, അൽ ഹിന്ദ് എയർ എന്നിവയുടെ ലക്ഷ്യം.
ഗോ ഫസ്റ്റ് ഉൾപ്പെടെ ഇന്ത്യയിൽ ചില കമ്പനികൾ പാപ്പരത്ത നടപടിയിലേക്ക് ഉൾപ്പെടെ വീണ പശ്ചാത്തലത്തിലാണ് വിമാനം പാട്ടത്തിന് നൽകുന്ന വിദേശ കമ്പനികളുടെ കടുംപിടിത്തം. വിഷയത്തിൽ എയർ കേരള, അൽ ഹിന്ദ് എയർ എന്നിവയുടെ പ്രതികരണം ലഭ്യമായിട്ടില്ല.
എയർ കേരള കഴിഞ്ഞ ഏപ്രിലിൽ കൊച്ചിയിൽ ഹെഡ് ഓഫിസ് തുറന്നിരുന്നു. ഓഫിസ് ഉൾപ്പെടെ തുറക്കുകയും ജീവനക്കാരെ നിയമിക്കുകയും ചെയ്ത കമ്പനികൾക്ക് ശമ്പളയിനത്തിൽ വൻതുക ചെലവും വരുന്നുണ്ട്. പ്രവർത്തനം തുടങ്ങിയാലേ വരുമാനവും ലഭ്യമായി തുടങ്ങൂ എന്നതിനാൽ അനുമതി വൈകുന്നത് കമ്പനികൾക്ക് സാമ്പത്തിക ബാധ്യതയുമാകുന്നു. വിഷയത്തിൽ കേന്ദ്രസർക്കാരിന്റെ അടിയന്തര ഇടപെടൽ വേണമെന്ന നിലപാട് കമ്പനികൾക്കുള്ളത്.
എയർകേരള
ദുബൈ കേന്ദ്രമായി പ്രവർത്തിക്കുന്ന പ്രവാസി സംരംഭകരായ അഫി അഹ്മദ്, ആയുബ് കല്ലട എന്നിവരാണ് എയർ കേരളയുടെ സാരഥികൾ. അഫി അഹ്മദ് ചെയർമാനും ആയൂബ് കല്ലട വൈസ് ചെയർമാനുമാണ്. സ്പൈസ് ജെറ്റിൽ നിന്നുള്ള ഹാരിഷ് മൊയ്ദീൻ കുട്ടിയാണ് സിഇഒ. എയർ കേരളയ്ക്ക് കഴിഞ്ഞ ജൂലൈയിൽ കേന്ദ്ര വ്യോമയാന മന്ത്രാലയത്തിൽ നിന്ന് പ്രവർത്തനാനുമതി ലഭിച്ചിരുന്നു. ഡയറക്ടറേറ്റ് ജനറൽ ഓഫ് സിവിൽ എവിയേഷനിൽ (ഡിജിസിഎ) എയർ ഓപ്പറേറ്റർ സർട്ടിഫിക്കറ്റ് (വിമാന സർവീസ് നടത്താനുള്ള അനുമതി) കൂടി ലഭിക്കുന്നതോടെ എയർ കേരളയ്ക്ക് ഔദ്യോഗികമായി പ്രവർത്തനം ആരംഭിക്കാനാകുമെന്ന് നേരത്തെ തന്നെ റിപ്പോർട്ടുകൾ ഉണ്ടായിരുന്നു.
എയർ കേരളയുടെ ആദ്യ വിമാനം ഏപ്രിലിലും ജൂണിൽ രണ്ടാമത്തേതും ലഭിക്കുമെന്നാണ് പ്രതീക്ഷയെന്നും ജൂണോടെ പ്രവർത്തനം ആരംഭിക്കാനായേക്കുമെന്നും നേരത്തെ ഹാരിഷ് കുട്ടി ഒരു ദേശീയ മാധ്യമത്തോട് പറഞ്ഞിരുന്നു. ഓരോ മൂന്നുമാസത്തിലും ഒന്നുവീതം പുതിയ വിമാനം കമ്പനി കൂട്ടിച്ചേർക്കും. 2026ന്റെ ആദ്യപാദത്തോടെ 6 വിമാനങ്ങൾ കമ്പനിക്കുണ്ടാകും. എന്നാൽ, നിലവിൽ ഒരു വിമാനം പോലും നേടാൻ കഴിയാത്തത് പ്രതിസന്ധിയാണ്.
എയർ ഇന്ത്യയുടെ മുൻ എക്സിക്യുട്ടീവ് ഡയറക്ടർ (ഫിനാൻസ്) കിർത്തി റാവു എയർ കേരളയിൽ ചീഫ് ഫിനാൻഷ്യൽ ഓഫീസർ (സിഎഫ്ഒ) സ്ഥാനം ഏറ്റെടുത്തിട്ടുണ്ട്. സ്പൈസ് ജെറ്റ്, എയർ ഇന്ത്യ എന്നിവയിൽ പ്രവർത്തിച്ചിട്ടുള്ള ഷാമോൻ പട്ടവാതുക്കൽ സയ്യിദ് മുഹമ്മദ് ഗ്രൗണ്ട് ഓപ്പറേഷൻസ് മേധാവിയും മുൻ ഡിജിസിഎ ഉദ്യോഗസ്ഥൻ ജെയിംസ് ജോർജ് ക്വാളിറ്റി മാനേജരുമാണ്. പരർഥപറമ്പിൽ രംഗരാജ മല്യ കമലേഷ് ആണ് മെയിന്റൻസ് വിഭാഗം മേധാവി. സർവീസ് ആരംഭിക്കുന്നതിന് മുന്നോടിയായി ഓരോ പ്രവർത്തന വിഭാഗത്തിലെയും നിയമനങ്ങളും കമ്പനി സജീവമാക്കിയിട്ടുണ്ട്.
കൊച്ചി, ഹൈദരാബാദ്, കോഴിക്കോട്, കണ്ണൂർ തുടങ്ങിയ നഗരങ്ങളെ ബന്ധിപ്പിച്ചുള്ള സർവീസാണ് തുടക്കത്തിൽ എയർ കേരള നടത്തുകയെന്ന് അറിയിച്ചിട്ടുണ്ട്. ഇതിനായി 100ൽ താഴെ സീറ്റുകളുള്ള എടിആർ വിമാനങ്ങൾ ഉപയോഗിക്കും. 2026ഓടെ ഗൾഫ് രാഷ്ട്രങ്ങളെ ഉന്നമിട്ട് രാജ്യാന്തര സർവീസിലേക്ക് കടക്കാനാകുമെന്നും കരുതുന്നു. അതോടെ വലിയ വിമാനങ്ങളും സ്വന്തമാക്കും. വിമാനങ്ങളുടെ എണ്ണം 20 ആയി ഉയർത്താനും ഉന്നമിടുന്നു.
അൽ ഹിന്ദിന്റെ റൂട്ടുകൾ ഇങ്ങനെ
കോഴിക്കോട് ആസ്ഥാനമായ അൽ ഹിന്ദ് ഗ്രൂപ്പിന്റെ കീഴിലെ അൽ ഹിന്ദ് എയറും പറക്കലിന് മുന്നോടിയായുള്ള നിയമനങ്ങൾ സജീവമാക്കിയിട്ടുണ്ട്. തുടക്കത്തിൽ രണ്ട് എടിആർ വിമാനങ്ങളുമായാകും അൽ ഹിന്ദ് എയർ പ്രവർത്തനം ആരംഭിച്ചേക്കുമെന്നും 2025 ജൂണോടെ തന്നെ അൽ ഹിന്ദിന്റെ ആദ്യ വിമാനവും ചിറകുവിടർത്തിയേക്കുമെന്നുമാണ് നേരത്തെ പറഞ്ഞിരുന്നത്. ഒരുവർഷത്തിനകം വിമാനങ്ങളുടെ എണ്ണം ഏഴായി ഉയർത്താനും ലക്ഷ്യമിടുന്നു.
വ്യോമയാന രംഗത്തെ പ്രമുഖനായ അലക്സാണ്ടർ എൻവൂബയെ ചീഫ് ഫിനാൻഷ്യൽ ഓഫീസറായി (സിഎഫ്ഒ) അൽഹിന്ദ് എയർ നിയമിച്ചിട്ടുണ്ട്. ഡിജിസിഎയിൽ നിന്ന് പറക്കൽ സർട്ടിഫിക്കറ്റിനായി കാത്തിരിക്കുകയാണ് അൽ ഹിന്ദ് എയറും.
കൊച്ചി, മധുര, ചെന്നൈ, ബെംഗളൂരു, തിരുവനന്തപുരം, കണ്ണൂർ, കോഴിക്കോട്, കോയമ്പത്തൂർ വിമാനത്താവളങ്ങളെ ബന്ധിപ്പിച്ചായിരിക്കും അൽ ഹിന്ദ് എയറിന്റെ ആദ്യ സർവീസുകൾ. പിന്നീട് ഘട്ടംഘട്ടമായി ഇന്ത്യയിലെ 40 നഗരങ്ങളിലേക്ക് സർവീസ് വ്യാപിപ്പിക്കും. തുടർന്ന് ഗൾഫ് മേഖലയിലേക്കും. നിലവിൽ വിമാന ടിക്കറ്റ്, ടൂർ ഓപ്പറേറ്റിങ്, ചാർട്ടേഡ് വിമാനങ്ങൾ, ഹോട്ടൽ റൂം ബുക്കിങ്, വീസ സേവനങ്ങൾ എന്നിവ നൽകുന്ന ഗ്രൂപ്പാണ് അൽ ഹിന്ദ്. വിമാന ടിക്കറ്റ് ബുക്കിങ് രംഗത്ത് വിശാലമായ പ്രവർത്തനശൃംഖലയും ഹജ്ജ് തീർഥാടകർ ഉൾപ്പെടെ മികച്ച ഉപഭോക്തൃ അടിത്തറയും കമ്പനിക്കുണ്ട്.
എയർ കേരളയും അൽ ഹിന്ദ് എയറും രാജ്യാന്തര തലത്തിലേക്കും പ്രവർത്തനം ആരംഭിക്കുന്നതോടെ കൂടുതൽ നേട്ടം ഗൾഫ് മേഖലയിലെ പ്രവാസി മലയാളികൾക്കായിരിക്കും. കുറഞ്ഞ ചെലവിൽ യാത്ര ചെയ്യാവുന്ന വിമാനസർവീസുകൾ വേണമെന്നത് പ്രവാസി മലയാളികളുടെ ദീർഘകാല ആവശ്യവുമാണ്. തായ്‍ലൻഡ്, സിംഗപ്പുർ, മലേഷ്യ തുടങ്ങിയ രാജ്യങ്ങളിലേക്കും പിന്നീട് അൽ ഹിന്ദ് എയർ പ്രവർത്തനം വ്യാപിപ്പിച്ചേക്കും.
വാർത്തകളും ജോബ് വേക്കൻസികളും വാട്സ് ആപ്പിൽ ലഭിക്കുവാൻ ഇവിടെ അമർത്തി ഗ്രൂപ്പിൽ അംഗമാകുക
