ലക്നൗ: ഉത്തർപ്രദേശിൽ കാമുകനൊപ്പം ഭാര്യയെ കണ്ട വൈരാഗ്യത്തിൽ ഭാര്യയുടെ മൂക്ക് കടിച്ചെടുത്ത് ഭർത്താവ്. ഗുരുതരമായി പരുക്കേറ്റ ഇരുപത്തഞ്ചുകാരിയെ ആശുപത്രിയിൽ പ്രവേശിപ്പിച്ചു. പ്രതിയായ ഭർത്താവിനെ കസ്റ്റഡിയിലെടുത്തതായി പൊലീസ് അറിയിച്ചു.
യുവതി തന്റെ ഗ്രാമത്തിൽ താമസിക്കുന്ന കാമുകനെ കാണാൻ പോയപ്പോഴാണ് സംഭവം. ഭാര്യയെ പിന്തുടർന്ന ഭർത്താവ് രാം ഖിലാവാൻ, കാമുകന്റെ വീട്ടിൽ വച്ച് അവരുമായി തർക്കത്തിൽ ഏർപ്പെട്ടു. അതിനിടയിൽ ഖിൽവാൻ കാമുകന്റെ മുന്നിൽ വച്ച് ഭാര്യയുടെ മൂക്ക് കടിച്ചെടുത്തതായി പൊലീസ് പറഞ്ഞു.
യുവതിയുടെ നിലവിളി കേട്ട് ഓടിക്കൂടിയ നാട്ടുകാരും കുടുംബാംഗങ്ങളുമാണ് സംഭവസ്ഥലത്തെത്തി പൊലീസിനെ വിവരം അറിയിച്ചത്. ഹരിയവാൻ പൊലീസ് സ്ഥലത്തെത്തി പരുക്കേറ്റ സ്ത്രീയെ ഹർദോയ് മെഡിക്കൽ കോളജ് ആശുപത്രിയിലേക്കു കൊണ്ടുപോയി. പിന്നീട് ആരോഗ്യനില ഗുരുതരമായതിനെ തുടർന്ന് ഡോക്ടർമാർ യുവതിയെ വിദഗ്‌ധ ചികിത്സയ്ക്കായി ലക്നൗവിലേക്കു മാറ്റി. ഭർത്താവിനെ കസ്റ്റഡിയിലെടുത്ത് ചോദ്യം ചെയ്തുവരികയാണെന്ന് അഡീഷനൽ എസ്പി നരേന്ദ്ര കുമാർ പറഞ്ഞു.
