തൊഴിൽ നേടാനുള്ള അവസരങ്ങളിൽ നിന്ന് പരമ്പരാഗത ബിരുദങ്ങളും വഴി മാറുന്നു
റിയാദ്: 2030-ഓടെ 92 ദശലക്ഷത്തിലധികം തൊഴിലവസരങ്ങൾ ഇല്ലാതാകുമെന്ന മുന്നറിയിപ്പ് മായി സഊദി മാനവ വിഭവശേഷി മന്ത്രി അഹമ്മദ് അൽ റാജ്ഹി. ഓട്ടോമേഷനും കൃത്രിമബുദ്ധിയും നാലാമത്തെയും അഞ്ചാമത്തെയും വ്യാവസായിക വിപ്ലവങ്ങളും പല മേഖലകളെയും മാറ്റിമറിക്കുകയും ജോലി ചെയ്യുന്ന രീതിയെയും ജീവിതത്തെയും സാരമായി സ്വാധീനിക്കുകയും ചെയ്യുമെന്നും അദ്ദേഹം വെളിപ്പെടുത്തി. റിയാദിൽ ഹ്യൂമൻ കപ്പാസിറ്റി ഇനിഷ്യേറ്റീവ് കോൺഫറൻസിന്റെ രണ്ടാം ദിവസം മുഖ്യ പ്രഭാഷണം നടത്തുകയായിരുന്നു അദ്ദേഹം.
സാങ്കേതിക മുന്നേറ്റങ്ങളുടെ ഓരോ തരംഗത്തിലും മാറ്റങ്ങൾ അതിവേഗം സംഭവിച്ചുകൊണ്ടിരിക്കുകയാണ്. 2030-ഓടെ 92 ദശലക്ഷത്തിലധികം തൊഴിലവസരങ്ങൾ ഇല്ലാതാകും. ഓട്ടോമേഷനും കൃത്രിമബുദ്ധിയും മേഖലകളുടെ പ്രവർത്തന രീതിയെയും ജീവനക്കാരുടെ പ്രവർത്തന രീതിയെയും മാറ്റിമറിക്കുന്നതാണ് ഇതിന് കാരണം. ആഗോളതലത്തിൽ നൈപുണ്യ വിടവ് വർധിച്ചുകൊണ്ടിരിക്കുകയാണ്. 40% തൊഴിൽ വൈദഗ്ധ്യവും മാറിക്കൊണ്ടിരിക്കുന്നുണ്ടെന്നും 63% ജീവനക്കാർ യോഗ്യതയുള്ള കഴിവുകളിലെ വെല്ലുവിളികൾ തിരിച്ചറിയുന്നുണ്ടെന്നും മന്ത്രി വ്യക്തമാക്കി.
ചില മേഖലകളിൽ പരിശീലനത്തിനും വൈദഗ്ധ്യത്തിനും വെല്ലുവിളികൾ നിലനിൽക്കുന്നുണ്ട്. സൈബർ സുരക്ഷാ മേഖലയിൽ 3.4 ദശലക്ഷം തൊഴിലുകളുടെയും കൃത്രിമബുദ്ധിയിൽ 50% തൊഴിൽ വിടവിന്റെയും പ്രശ്നങ്ങൾ നേരിടുന്നുണ്ടെന്നും അദ്ദേഹം ചൂണ്ടിക്കാട്ടി. ഈ സാഹചര്യത്തിൽ തന്ത്രപരമായ ഒരു തൊഴിൽ ശക്തിക്കായി ആസൂത്രണം ചെയ്ത് പ്രതികരിക്കേണ്ടത് അനിവാര്യമാണ്. സഊദി അറേബ്യയിൽ ആവശ്യകതാധിഷ്ഠിത സമീപനമാണ് സ്വീകരിക്കുന്നത്. പൊതു, സ്വകാര്യ മേഖലകളിൽ നിന്നുള്ള 240 ദശലക്ഷത്തിലധികം അംഗങ്ങൾ ഉൾപ്പെടുന്ന 13 നൈപുണ്യ കൗൺസിലുകൾ രാജ്യത്തുണ്ട്. തൊഴിൽ ആവശ്യകതകളും അവ എങ്ങനെ പരിഹരിക്കാമെന്നും നിർണ്ണയിക്കുന്നതിനായി സൗദിയിലെ കഴിവുകളും ജോലികളും കരിയർ പാതകളും ഉൾപ്പെടുന്ന ഒരു നൈപുണ്യ ചട്ടക്കൂടും സർക്കാർ രൂപീകരിച്ചു.
പരമ്പരാഗത ബിരുദങ്ങൾ ഇനി അവസരങ്ങളിലേക്കുള്ള ഏക കവാടമല്ല. തൊഴിലുടമകൾ പരിചയസമ്പന്നരായ തൊഴിൽ ശക്തിയെയാണ് അന്വേഷിക്കുന്നത്. ഹ്യൂമൻ കേപ്പബിലിറ്റീസ് പ്രോഗ്രാമുമായി സഹകരിച്ച്, ആരോഗ്യ സംരക്ഷണം, ധനകാര്യം, റീട്ടെയിൽ തുടങ്ങിയ മേഖലകളിൽ 300,000 വ്യക്തികൾക്ക് വൈദഗ്ധ്യം നൽകുന്നതിനായി സ്കിൽസ് ആക്സിലറേറ്റർ സംരംഭം ആരംഭിച്ചു. കമ്പനികളുമായും വിദ്യാഭ്യാസ സ്ഥാപനങ്ങളുമായും സഹകരിച്ച് വിപണി ആവശ്യങ്ങൾ വിശകലനം ചെയ്യുന്നതിനെ അടിസ്ഥാനമാക്കിയുള്ളതാണ് ഈ സംരംഭം. വെർച്വൽ ലേണിംഗ് നേരിട്ടുള്ള പഠനവുമായി സംയോജിപ്പിച്ചാണ് പരിശീലനം നൽകുന്നത്.
സാങ്കേതിക വൈദഗ്ദ്ധ്യം ഇനി പര്യാപ്തമല്ല. തന്ത്രപരമായ ചിന്ത, പൊരുത്തപ്പെടുത്തൽ, നേതൃത്വം എന്നിവയ്ക്ക് വളരെയധികം പ്രാധാന്യമുണ്ട്, കൂടാതെ തൊഴിൽ ശക്തിയെ പുനർനിർമ്മിക്കുക എന്നത് ഒരു ദേശീയ മുൻഗണനയാണ്. അതിനാൽ, “വാദ്” എന്ന പേരിൽ അറബി ഭാഷയിൽ ഒരു ദേശീയ പരിശീലന ക്യാമ്പ് ഞങ്ങൾ ആരംഭിച്ചു. ആദ്യ ഘട്ടം ഒരു ദശലക്ഷത്തിലധികം പരിശീലന അവസരങ്ങൾ നേടിയിട്ടുണ്ട്. കഴിഞ്ഞ നവംബറിൽ, പൊതു, സ്വകാര്യ മേഖലകളിൽ നിന്നുള്ള 60 പങ്കാളികളുമായി 3 ദശലക്ഷം പരിശീലന അവസരങ്ങൾ ലക്ഷ്യമിടുന്ന “വാദ്” ന്റെ രണ്ടാം ഘട്ടം ആരംഭിച്ചു. 70 പരിശീലന സ്ഥാപനങ്ങളിലൂടെ യഥാർത്ഥ തൊഴിൽ പാതകളുള്ള സ്ത്രീകൾക്കായി പരിശീലന പരിപാടികളും ആരംഭിച്ചു.
