ജിദ്ദ: ജിദ്ദ ട്രാൻസ്പോർട്ട് കമ്പനി സീ ടാക്സി നിരക്കുകളിൽ പ്രത്യേക ഈദ് കിഴിവ് പ്രഖ്യാപിച്ചു. ടിക്കറ്റ് നിരക്ക് 25 റിയാലായാണ് കുറച്ചത്.
ജിദ്ദ യാച്ച് ക്ലബ്ബിനെയും ഹിസ്റ്റോറിക് ജിദ്ദ ഡിസ്ട്രിക്റ്റിനെയും ബന്ധിപ്പിക്കുന്ന കടൽ ടാക്സി റൂട്ടിൽ മാർച്ച് 23 മുതൽ ഏപ്രിൽ 3 വരെ ഇളവുകളിൽ യാത്രചെയ്യാം.
മുമ്പ് റമസാനിൽ 25 റിയാൽ മുതൽ 50 റിയാൽ വരെയായിരുന്നു നിരക്ക്. 10 വയസ്സിന് താഴെയുള്ള കുട്ടികൾക്ക് സൗജന്യമായി യാത്ര ചെയ്യാം.
യാച്ച് ക്ലബ്, ഹിസ്റ്റോറിക് ഡിസ്ട്രിക്റ്റ്, ഒബുർ എന്നിവയെ ബന്ധിപ്പിച്ചുകൊണ്ട് ജിദ്ദയുടെ കടൽ ടാക്സി സർവീസ് മാർച്ച് 6 ന് അതിൻ്റെ പരീക്ഷണ ഘട്ടം ആരംഭിച്ചു. ഇത് നിലവിൽ യാച്ച് ക്ലബ്ബിനും ഹിസ്റ്റോറിക് ഡിസ്ട്രിക്റ്റിനും ഇടയിലാണ് പ്രവർത്തിക്കുന്നത്.
നഗരത്തിലെ ഗതാഗത അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും സമുദ്ര ടൂറിസം പ്രോത്സാഹിപ്പിക്കുന്നതിനുമുള്ള വിപുലമായ സംരംഭത്തിൻ്റെ ഭാഗമാണ് പദ്ധതി.
പ്രതിദിനം 29,000 യാത്രക്കാരെ ഉൾക്കൊള്ളുന്ന 20 ആധുനിക കടൽ ടാക്സി സ്റ്റേഷനുകൾ വികസിപ്പിക്കാനുള്ള പദ്ധതികൾ ജിദ്ദ മേയർ സലേഹ് അൽ തുർക്കി നേരത്തെ പ്രഖ്യാപിച്ചിരുന്നു.
റോഡിലെ തിരക്ക് ലഘൂകരിക്കാൻ സഹായിക്കുന്ന ഒബുറിൻ്റെ വാട്ടർഫ്രണ്ടും ജിദ്ദയുടെ മധ്യ-വടക്കൻ ജില്ലകളും തമ്മിലുള്ള കണക്റ്റിവിറ്റി വർദ്ധിപ്പിക്കുകയാണ് സ്റ്റേഷനുകളുടെ ലക്ഷ്യം.
