ജിദ്ദ: എ എഫ് സി ഏഷ്യൻ കപ്പ് സഊദിയിൽ അറേബ്യ 2027 ജനുവരി 7 മുതൽ ഫെബ്രുവരി 5 വരെ നടക്കുമെന്ന് ഏഷ്യൻ ഫുട്ബോൾ കോൺഫെഡറേഷൻ അറിയിച്ചു.
ഏഷ്യയിലെ പ്രീമിയർ ഫുട്ബോൾ ടൂർണമെൻ്റിൻ്റെ 19-ാമത് എഡിഷൻ 2027 ജനുവരി 7 വ്യാഴാഴ്ച ആരംഭിക്കും. 2027 ഫെബ്രുവരി 5 വെള്ളിയാഴ്ച നടക്കുന്ന ഫൈനൽ മത്സരത്തോടെ അവസാനിക്കും.
ഇത് ഭൂഖണ്ഡത്തിലുടനീളമുള്ള ഫുട്ബോൾ ആരാധകർക്ക് ആവേശകരമായ അനുഭവം വാഗ്ദാനം ചെയ്യും. റിയാദ്, ജിദ്ദ, അൽഖോബാർ എന്നീ മൂന്ന് ആതിഥേയ നഗരങ്ങളിലായി എട്ട് സ്റ്റേഡിയങ്ങളാണ് ടൂർണമെൻ്റിൽ ഉണ്ടാവുക.
റിയാദിലെ കിങ് ഫഹദ് സ്പോർട്സ് സിറ്റി സ്റ്റേഡിയമാകും ശ്രദ്ധാകേന്ദ്രം. നിലവിൽ ഉയർന്ന നിലവാരം പുലർത്തുന്നതിനായി വിപുലമായ നവീകരണങ്ങൾ നടക്കുന്നുണ്ട്.
2023 ഫിഫ ക്ലബ് ലോകകപ്പ് ഫൈനലിന് ആതിഥേയത്വം വഹിച്ച “ദി ഷൈനിങ് ജ്യുവൽ” എന്നും അറിയപ്പെടുന്ന കിങ് അബ്ദുല്ല സ്പോർട്സ് സിറ്റി സ്റ്റേഡിയത്തിലാണ് ജിദ്ദ മത്സരങ്ങൾ സംഘടിപ്പിക്കുന്നത്.
അൽഖോബാറിൽ പുതുതായി നിർമിക്കുന്ന സ്റ്റേഡിയം കിഴക്കൻ മേഖലയുടെ കേന്ദ്രമായിരിക്കും.
ഈ പ്രധാന വേദികൾക്ക് പുറമേ, റിയാദിൽ കിങ് സൗദ് യൂണിവേഴ്സിറ്റി സ്റ്റേഡിയം, അൽ ഷബാബ് സ്റ്റേഡിയം, കിംഗ്ഡം അരീന എന്നിവയും, നവീകരിച്ച ഇമാം മുഹമ്മദ് ഇബ്നു സൗദ് യൂണിവേഴ്സിറ്റി സ്റ്റേഡിയവും ഉൾക്കൊള്ളുന്നു.
2023 ഫിഫ ക്ലബ് ലോകകപ്പിൽ മുമ്പ് നിരവധി മത്സരങ്ങൾക്ക് ആതിഥേയത്വം വഹിച്ച പ്രിൻസ് അബ്ദുല്ല അൽ ഫൈസൽ സ്പോർട്സ് സിറ്റി സ്റ്റേഡിയത്തിലും ജിദ്ദ മത്സരങ്ങൾക്ക് ആതിഥേയത്വം വഹിക്കും.
സൗദി അറേബ്യൻ ഫുട്ബോൾ ഫെഡറേഷൻ പ്രസിഡൻ്റ് യാസർ അൽ മിസെഹൽ എഎഫ്സി ഏഷ്യൻ കപ്പ് സൗദി അറേബ്യ 2027 ടൈംലൈനിൻ്റെ പ്രഖ്യാപനത്തെ ടൂർണമെൻ്റിന് ആതിഥേയത്വം വഹിക്കാനുള്ള രാജ്യത്തിൻ്റെ യാത്രയിലെ പ്രധാന നാഴികക്കല്ലാണെന്ന് വിശേഷിപ്പിച്ചു.
സൗദി വിഷൻ 2030 ൻ്റെ പ്രധാന ഭാഗമായ പ്രധാന രാജ്യാന്തര കായിക മത്സരങ്ങൾ സംഘടിപ്പിക്കുന്നതിൽ രാജ്യം അടുത്തിടെ നേടിയ വിജയത്തെ അടിസ്ഥാനമാക്കിയാണ് എ എഫ് സി ഏഷ്യൻ കപ്പ് 2027 ന് സൗദി അറേബ്യ ആതിഥേയത്വം വഹിക്കുന്നത്.
അതുപോലെ സ്പാനിഷ്, ഇറ്റാലിയൻ സൂപ്പർ കപ്പുകൾ, ഫോർമുല 1, ഡാക്കാർ റാലി തുടങ്ങിയ മറ്റ് കായിക ഇനങ്ങളും നടന്നു വരുന്നുണ്ട്.
