റിയാദ്: സഊദിയിൽ ഇനി സെയിൽസ് ഗേൾസിനും വനിതാ റിസപ്ഷണിസ്റ്റുകൾക്കും ധൈര്യപൂർവം ഇരിക്കാം. സെയിൽസ്, റിസപ്ഷൻ തസ്തികകളിൽ ജോലി ചെയ്യുന്ന വനിതകൾക്ക് ജോലിക്കിടയിൽ ഇരിക്കാനുള്ള അവകാശമുണ്ടെന്ന് മാനവ വിഭവശേഷി, സാമൂഹിക വികസന മന്ത്രാലയം വ്യക്തമാക്കി.
ഇരിക്കാൻ തൊഴിലുടമ അനുവദിച്ചില്ലെങ്കിൽ അത് ഗുരുതരമായ നിയമലംഘനമാണെന്ന് വക്താവ് മുഹമ്മദ് അൽറിസ്കി പറഞ്ഞു. ഉപഭോക്താക്കൾ ഇല്ലാത്ത സമയങ്ങളിൽ പോലും കസേരയിൽ ഇരിക്കുന്നത് തടയുന്നുവെന്ന ചില സ്ത്രീ ജീവനക്കാരുടെ പരാതിക്കുള്ള മറുപടിയായാണ് വക്താവ് ഇക്കാര്യം പറഞ്ഞത്. എല്ലായിപ്പോഴും നിൽക്കേണ്ട ആവശ്യമില്ലാത്ത തൊഴിലുകളാണിവ. അതിനാൽ ജോലിക്കിടെ സ്ത്രീകളെ ഇരിക്കാൻ അനുവദിക്കാതിരിക്കുന്നത് നിരോധിച്ചിരിക്കുകയാണെന്നും വക്താവ് പറഞ്ഞു.
