മദീന: സഊദി അജ്വ ഈന്തപ്പഴങ്ങളുടെ ഉൽപ്പാദനം വർദ്ധിപ്പിക്കുന്നതിനായി മദീന ഹെറിറ്റേജ് കമ്പനി (എംഎച്ച്സി)എന്നപേരിൽ പുതിയ കമ്പനി പബ്ലിക് ഇൻവെസ്റ്റ്മെന്റ് ഫണ്ട് (പിഐഎഫ്) പ്രഖ്യാപിച്ചു.
ലോകത്തിലെ ഏറ്റവും മികച്ച ഈന്തപ്പഴമായി ഇത് കണക്കാക്കപ്പെടുന്നു.
മദീന മേഖലയിലെ അജ്വ ഈന്തപ്പഴത്തിന്റെ ഗുണനിലവാരവും ഉൽപ്പാദന ശേഷിയും മെച്ചപ്പെടുത്തുന്നതിൽ പുതിയ കമ്പനി പ്രധാന പങ്ക് വഹിക്കും. ഉയർന്ന പോഷകമൂല്യവും കാര്യമായ ആരോഗ്യ ഗുണങ്ങളും, നാരുകൾ, പ്രോട്ടീൻ ആന്റിഓക്സിഡന്റുകൾ, മറ്റ് പോഷക ഘടകങ്ങൾ എന്നിവ സമ്പന്നമായതാണ് അജ്വ.
കൂടാതെ, അജ്വ ഈന്തപ്പഴത്തിന് മുസ്ലിം ലോകത്ത് മതപരവും സാംസ്കാരികവുമായ മൂല്യമുണ്ട്, പ്രത്യേകിച്ച് മദീന മേഖലയിലെ സന്ദർശകർക്ക്. അജ്വയുടെ ഉൽപാദനം വർധിപ്പിക്കുന്നതിനൊപ്പം, വർധിച്ചുവരുന്ന ആഗോള ആവശ്യം നിറവേറ്റുന്നതിലും മദീന ഹെറിറ്റേജ് കമ്പനി ശ്രദ്ധയൂന്നും. പ്രാദേശികമായും അന്തർദേശീയമായും അജ്വയുടെ ഗുണനിലവാരമുള്ള മറ്റ് ഈന്തപ്പഴങ്ങളുടെയും വിതരണ ശൃംഖല വളർത്തുന്നതിനും വിപണിയെ പ്രോത്സാഹിപ്പിക്കുന്നതിനും പദ്ധതികൾ ആവിഷ്കരിച്ച് നടപ്പാക്കും.
അത്യാധുനിക കാർഷിക സാങ്കേതിക വിദ്യകൾ സ്വീകരിച്ചുകൊണ്ട് മദീന മേഖലയിലെ സുസ്ഥിര കൃഷിയുടെ വിപുലമായ വികസനത്തിന് വേണ്ടതെല്ലാം ചെയ്യുമെന്ന് പി.ഐ.എഫിന് കീഴിലുള്ള ഇൻവെസ്റ്റ്മെൻറ് വിഭാഗത്തിലെ കൺസ്യൂമർ ഗുഡ്സ് ആൻഡ് റീട്ടെയിൽ മേധാവി മജീദ് അൽ അസ്സാഫ് പറഞ്ഞു.
