റിയാദ്: രാജ്യത്തുടനീളമുള്ള ബന്ധപ്പെട്ട സർക്കാർ ഏജൻസികളുമായി സഹകരിച്ച് സൗദി സുരക്ഷാ അധികാരികൾ നടത്തിയ അഞ്ച് ദിവസത്തെ പ്രചാരണത്തിനിടെ 71 പേരെ അറസ്റ്റ് ചെയ്യുകയും 16.9 ദശലക്ഷം മയക്കുമരുന്ന് ഗുളികകൾ പിടികൂടുകയും ചെയ്തു.
പിടിയിലായവർ മയക്കുമരുന്ന് കടത്ത്, വിൽപ്പന, കൈവശം വയ്ക്കൽ, ഉപഭോഗം എന്നിവയിൽ ഉൾപ്പെട്ടതായി കണ്ടെത്തി.
പെരുന്നാൾ അവധിക്ക് തൊട്ടുപിന്നാലെ ഏപ്രിൽ 25 ചൊവ്വാഴ്ച മുതൽ ഏപ്രിൽ 29 ശനിയാഴ്ച വരെ രാജ്യത്തിന്റെ വിവിധ പ്രദേശങ്ങളിലും ഗവർണറേറ്റുകളിലും റെയ്ഡുകൾ നടത്തി.
17 മേഖലകളിൽ നിന്നും ഗവർണറേറ്റുകളിൽ നിന്നും പ്രതിദിനം 3.3 ദശലക്ഷത്തിലധികം മയക്കുമരുന്ന് ഗുളികകൾ എന്ന തോതിൽ ഏകദേശം 16.9 ദശലക്ഷം നാർക്കോട്ടിക് ആംഫെറ്റാമൈൻ, ക്യാപ്റ്റഗൺ ഗുളികകൾ പിടിച്ചെടുത്തു.
ഏപ്രിൽ 25 ന് പ്രചാരണത്തിന്റെ ആദ്യ ദിവസം, ജിദ്ദ ഇസ്ലാമിക് പോർട്ടിൽ 12,729,000 നാർക്കോട്ടിക് ആംഫെറ്റാമൈൻ ഗുളികകൾ കടത്താനുള്ള ശ്രമം സുരക്ഷാ ഉദ്യോഗസ്ഥർ പരാജയപ്പെടുത്തിയിരുന്നു.
സകാത്ത്, ടാക്സ് ആൻഡ് കസ്റ്റംസ് അതോറിറ്റി (സാറ്റ്ക)യുടെ ഏകോപനത്തിൽ നടത്തിയ റെയ്ഡിൽ രണ്ട് ഈജിപ്തുകാരെയും ഒരു സിറിയൻ, യെമൻ പൗരന്മാരെയും പിടികൂടി.
തെക്കൻ അസീർ മേഖലയിൽ ഹാഷിഷ് കടത്താൻ ശ്രമിക്കുന്നതിനിടെ രണ്ട് എത്യോപ്യക്കാരും ജിദ്ദയിൽ മയക്കുമരുന്ന് മെതാംഫെറ്റാമിൻ ഗുളികകൾ വ്യാപാരം ചെയ്യുന്നതിനിടെ രണ്ട് പാകിസ്ഥാനികളും അറസ്റ്റിലായി.
സംശയാസ്പദമായ എന്തെങ്കിലും പ്രവർത്തനങ്ങളോ മയക്കുമരുന്ന് കടത്തലോ വിൽപനയോ ഉണ്ടായാൽ ഡയറക്ടറേറ്റിന്റെ ടോൾ ഫ്രീ നമ്പറായ 995-ലോ ഇ-മെയിൽ വഴിയോ: 995gdnc.gov.sa എന്ന വിലാസത്തിലോ അറിയിക്കണമെന്ന് ജനറൽ ഡയറക്ടറേറ്റ് ഓഫ് നാർക്കോട്ടിക് കൺട്രോൾ (ജിഡിഎൻസി) പൊതുജനങ്ങളോട് അഭ്യർത്ഥിച്ചു.
