ദോഹ: ഔദ്യോഗിക സന്ദർശനത്തിനായി യു.എ.ഇ പ്രസിഡൻറ് ശൈഖ് മുഹമ്മദ് ബിൻ സായിദ് ആൽ നഹ്യാൻ ഖത്തറിലെത്തി. ഖത്തർ അമീർ ശൈഖ് തമീം ബിൻ ഹമദ് ആൽഥാനിയുടെ ക്ഷണമനുസരിച്ചാണ് ശൈഖ് മുഹമ്മദിന്റെ സന്ദർശനം.
തിങ്കളാഴ്ച രാവിലെ ദേഹാ ഹമദ് അന്താരാഷ്ട്ര വിമാനത്താവളത്തിലിറങ്ങിയ യു.എ.ഇ പ്രസിഡൻറിനെ ഖത്തർ അമീർ നേരിട്ടെത്തി സ്വീകരിച്ചു. അറബ് രാജ്യങ്ങളുടെ ഖത്തർ ഉപരോധം പിൻവലിച്ച ശേഷം ആദ്യമായാണ് യു.എ.ഇ പ്രസിഡന്റിന്റെ ഈ സന്ദർശനം.
നേരത്തെ, ഫിഫ ലോകകപ്പിന്റെ തുടക്കത്തിൽ ശൈഖ് മുഹമ്മദ് ശൈഖ് തമീമിനെ അഭിനന്ദിക്കുകയും വിജയകരമായ ടൂർണമെന്റിന് ആതിഥേയത്വം വഹിക്കുന്നതിന് എല്ലാ പിന്തുണയും അറിയിക്കുകയും ചെയ്തിരുന്നു. യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം ലോകകപ്പ് ഉദ്ഘാടന ചടങ്ങിൽ
പങ്കെടുക്കുകയും ചെയ്തിരുന്നു.
