റിയാദ്: സഊദിയിൽ മലയാളികൾ അടക്കമുള്ള പ്രവാസികൾ വ്യാപകമായി ഉപയോഗിച്ചിരുന്ന ആമിൽ, ആമിൽ ആദി പ്രൊഫഷനുകൾ ഇനിയുണ്ടാകില്ല. ഈ രണ്ട് പ്രൊഫഷനുകളിൽ ഉള്ളവർക്ക് മറ്റു പ്രൊഫഷമുകളിലേക്ക് സൗജന്യമായി മാറാനുള്ള സംവിധാനവും സജ്ജമായി.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ഇവർക്കായുള്ള 67 പ്രോഫഷനുകൾ ഖിവ പ്ലാറ്റ്ഫോം വ്യക്തമാക്കി. ഇതോടെ, ഏറെ കാലമായി നില നിന്നിരുന്ന അവിദഗ്ദ പ്രൊഫഷൻ ആയിരുന്ന ആമിൽ, ആമിൽ ആദി പ്രൊഫഷനുകൾ ഇഖാമ പ്രൊഫഷനുകൾ അപ്രത്യക്ഷമാകും.
ആമിൽ, ആമിൽ ആദി എന്നിവ ഉൾപ്പെടെ എട്ട് പ്രൊഫഷനുകളിൽ ജോലി ചെയ്യുന്ന വിദേശികളുടെ പ്രൊഫഷന്‍ മാറ്റണമെന്ന വ്യവസ്ഥ അടുത്തിടെ നിര്‍ബന്ധമാക്കിയിട്ടുണ്ട്. ഡോക്ടര്‍, എക്‌സ്‌പേര്‍ട്ട്, സ്‌പെഷ്യലിസ്റ്റ്, എന്‍ജിനീയര്‍, സ്‌പെഷ്യലിസ്റ്റ് എക്‌സ്‌പേര്‍ട്ട്, കണ്‍ട്രോള്‍ ടെക്‌നീഷ്യന്‍,ആമിൽ, ആമിൽ ആദി എന്നീ പ്രൊഫഷനുകളിൽ ഉള്ളവരാണ് മറ്റു പ്രൊഫഷനുകളിലേക്ക് മാറേണ്ടത്. ഈ എട്ടു പ്രൊഫഷനുകളില്‍ വിദേശ തൊഴിലാളികളെ റിക്രൂട്ട് ചെയ്യാന്‍ പുതിയ വിസകള്‍ അനുവദിക്കുകയുമില്ല.
റിക്രൂട്ട് ചെയ്യാന്‍ ഉദ്ദേശിക്കുന്ന തൊഴിലാളികളുടെ പ്രൊഫഷനുകളുടെ കൃത്യമായ വിവരണം തൊഴിലുടമകള്‍ പ്ലാറ്റ്‌ഫോമില്‍ നല്‍കണമെന്നും ഖിവാ പ്ലാറ്റ്ഫോം പറഞ്ഞു. തത്വത്തിൽ ആമിൽ, ആമിൽ ആദി ഉൾപ്പെടെ ഈ എട്ട് പ്രൊഫഷനുകൾ രാജ്യത്ത് നിന്ന് എടുത്ത് മാറ്റപ്പെടും. പകരം ഏതെങ്കിലും തൊഴിൽ ചേർത്ത പ്രൊഫഷൻ ആയിരിക്കും ഉണ്ടാകുക.
ആമിൽ (തൊഴിലാളി), ആമിൽ ആദി (സാദാ തൊഴിലാളി) എന്നിവക്കു പകരം തെരഞ്ഞെടുക്കാവുന്ന 67 പ്രൊഫഷനുകള്‍ ഖിവാ പ്ലാറ്റ്ഫോം നിര്‍ണയിച്ചിട്ടുണ്ട്.
പെട്രോള്‍ ബങ്ക് തൊഴിലാളി, ഭക്ഷ്യവസ്തു സ്ഥാപനങ്ങളിലെ കൗണ്ടര്‍ തൊഴിലാളി, പേഴ്‌സണല്‍ കെയര്‍, റെഡിമിക്‌സ്, വാഹന പെയിന്റിംഗ്, കെട്ടിടങ്ങളുടെ ടെറസ്സ് ക്ലീനിംഗ്, ഫോര്‍ക് ലിഫ്റ്റ്, എംബ്രോയ്ഡറി, ഇലക്ട്രിക് ഉപകരണങ്ങളുടെ റിപ്പയറിംഗ്, ഫര്‍ണിച്ചര്‍ അസംബ്ലി, പ്ലാസ്റ്റിക്, ലോഹ ഉല്‍പന്നങ്ങളുടെ അസംബ്ലി, പച്ചക്കറികളും പഴവര്‍ഗങ്ങളും സൂക്ഷിക്കല്‍, പെസ്റ്റ് കണ്‍ട്രോള്‍, ഖനനം, പേപ്പര്‍ബോര്‍ഡ് അസംബ്ലി, ഹോട്ടല്‍ അറേഞ്ച്‌മെന്റ്, കാര്‍ പാര്‍ക്കിംഗ്, ഓഫീസ്, സ്ഥാപന ക്ലീനിംഗ്, ലോണ്‍ട്രി, ഇസ്തിരിയിടല്‍, കാര്‍പെറ്റ് ക്ലീനിംഗ്, വാഹന ക്ലീനിംഗ്, വാട്ടര്‍ ടാങ്ക് ക്ലീനിംഗ്, മലിനജലം, കന്നുകാലി ഫാം, പൗള്‍ട്രി ഫാം, മൊബൈല്‍ കാര്‍ വാഷിംഗ്, റോഡ് ക്ലീനിംഗ്, പാര്‍ക്ക് ക്ലീനിംഗ്, ഹാച്ചറി, അഗ്രിക്കള്‍ച്ചറല്‍ ആന്റ് അനിമല്‍ പ്രൊഡക്ഷന്‍ ഫാം, നഴ്‌സറി, ഹരിത പ്രദേശങ്ങള്‍, മത്സ്യകൃഷി, ഫോറസ്റ്റുകള്‍, മേയ്ച്ചില്‍പുറങ്ങള്‍, കാട്ടുതീ കെടുത്തല്‍, മത്സ്യബന്ധനം, ഖനി, ക്വാറി, നിര്‍മാണം, റോഡ് മെയിന്റനന്‍സ്, ടാറിംഗ്, ഖബറിസ്ഥാന്‍, പ്രിന്റിംഗ്, ബൈന്റിംഗ് ഫിനിഷിംഗ് ജോലികള്‍, ടെലികോം, ഐ.ടി കേബിള്‍ ഇന്‍സ്റ്റലേഷന്‍, കോണ്‍ക്രീറ്റ് മിക്‌സ്, കോണ്‍ക്രീറ്റ്, പൊളിക്കല്‍, പേക്കിംഗ്, സ്റ്റിക്കര്‍ പതിക്കല്‍, ഉല്‍പന്നങ്ങള്‍ തരംതിരിക്കല്‍, വര്‍ക്ക് ഷോപ്പ്, ട്രോളി ഉന്തല്‍, ചരക്ക് നീക്കത്തിനുള്ള ബൈക്ക്, മൃഗങ്ങള്‍ വലിക്കുന്ന വണ്ടികള്‍ ഓടിക്കല്‍, കയറ്റിറക്കല്‍, ഷെല്‍ഫുകള്‍ നിറക്കല്‍, സ്റ്റോര്‍, അടുക്കള ഉപകരണങ്ങളുടെ ക്ലീനിംഗ്, അടുക്കള, ഡ്രില്ലിംഗ് എന്നിവ അടക്കമുള്ള 67 പ്രൊഫഷനുകളിലേക്കാണ് തൊഴിലാളി, സാദാ തൊഴിലാളി പ്രൊഫഷനുകള്‍ മാറ്റേണ്ടത്.
സ്വകാര്യ സ്ഥാപനങ്ങള്‍ക്കു കീഴിലെ തൊഴിലാളികളുടെ മുകളിൽ പറയപ്പെട്ട എട്ടു പ്രൊഫഷനുകൾ സ്പോൺസറുടെ ഖിവാ പ്ലാറ്റ്ഫോം വഴിയാണ് മാറ്റേണ്ടത്. എന്നാൽ, വ്യക്തിഗത സ്‌പോണ്‍സര്‍മാര്‍ക്കു കീഴിലെ തൊഴിലാളികളുടെ പ്രൊഫഷനുകള്‍ ഖിവാ പ്ലാറ്റ്ഫോം വഴി മാറ്റാന്‍ കഴിയില്ല.
സാധാരണ ഗതിയില്‍ പ്രൊഫഷന്‍ മാറ്റത്തിന് തൊഴിലാളികളുടെ അനുമതി ആവശ്യമാണെങ്കിലും നിലവിലെ സാഹചര്യത്തിൽ ഇത് ആവശ്യമില്ല. പ്രൊഫഷന്‍ മാറ്റത്തിന് വേണ്ടിയിരുന്ന ഫീസും ആവശ്യമില്ല. റദ്ദാക്കിയ പ്രൊഫഷനുകളുടെ തിരുത്തല്‍ ആയാണ് പ്രൊഫഷന്‍ മാറ്റം പരിഗണിക്കുക. ഖിവാ പ്ലാറ്റ്ഫോം നിര്‍ണയിച്ച എട്ടു പ്രൊഫഷനുകൾ ഫീസില്ലാതെ ഒരു തവണ മാറ്റാൻ സാധിക്കും. എന്നാൽ, വീണ്ടും തിരുത്തല്‍ വരുത്തണമെങ്കിൽ പ്രൊഫഷന്‍ മാറ്റ സേവനം തെരഞ്ഞെടുത്ത് ഫീസ് അടക്കണം.
ഡോക്ടര്‍, എക്‌സ്‌പേര്‍ട്ട്, സ്‌പെഷ്യലിസ്റ്റ്, എന്‍ജിനീയര്‍, സ്‌പെഷ്യലിസ്റ്റ് എക്‌സ്‌പേര്‍ട്ട്, കണ്‍ട്രോള്‍ ടെക്‌നീഷ്യന്‍ എന്നീ പ്രൊഫഷനുകളുടെ വിശദാംശങ്ങള്‍ നല്‍കിയാണ് സ്ഥാപനങ്ങള്‍ തൊഴിലാളികളുടെ പ്രൊഫഷനുകളില്‍ തിരുത്തല്‍ വരുത്തേണ്ടത്. ഏതാനും മാസങ്ങൾക്കു മുമ്പ് തന്നെ ആമിൽ പ്രൊഫഷൻ ഒഴിവാക്കുമെന്നും പകരം ഏതെങ്കിലും തൊഴിൽ ചേർത്തിയുള്ള പ്രൊഫഷൻ ആയിരിക്കും ഉണ്ടാകുകയെന്നും റിപ്പോർട്ടുകൾ ഉണ്ടായിരുന്നു.
എട്ട് പ്രൊഫഷനുകൾ ഫീസില്ലാതെ മാറാം; മാറുന്നതിന് തൊഴിലാളിയുടെ സമ്മതം ആവശ്യമില്ല, വിശദ വിവരങ്ങൾ
